Fulsion Smart Systems: chatbot-ak gizaki eta makina arteko komunikazioa hobetzeko
Enpresa bizkaitarrak adimen artifizialean oinarritutako konponbideak garatzen ditu hizkuntza naturala interpretatzeko
Adimen artifizialak gero eta presentzia handiagoa du industri sektorean, hor ditugu datuak aztertzeko aplikazioak, makinen mantenimendu prediktiboa, ikusmen artifizialeko sistemen garapena, e.a. Baina ikaskuntzako algoritmoek ere badute eragina hain ohikoak ez diren beste tresna batzuetan, esaterako, chatbot-etan. Fulsion Smart Systems euskal startupa bereziki espezializatu da horrelako garapenetan, hau da, gizaki eta makina arteko komunikaziorako eta bezeroei arreta emateko erabiltzen direnetan. Hizketan aritu gara Luis Gonzalo Allerrekin, Fulsion Smart Systems enpresako bozeramailearekin.
Zein da Fulsion Smart Systems enpresaren jatorria?
2014an jarri ginen martxan chatbot-ak garatzeko asmoarekin. Hasieran, mota guztietako sektoreetara zuzentzen ginen, adibidez, komunikaziora, hezkuntzara eta baita ere aisialdira. Hala, chatbot-ak garatu ditugu Alokabide agentziarentzat, Goiena.eus webgunearentzat, turismo bulegoentzat, eta euskaraz hitz egiteko bideojoko bat ere egin dugu Telegram aplikaziorako: Hizkijalea. Orain, industri sektorera bideratutako proiektuak ere egiten ditugu.
Zer da chatbot bat?
Uste dugu horixe dela modu azkarrena ordenagailu batekin edo makina batekin komunikatzeko. Chatbot batek adimen artifizialeko algoritmoak erabiltzen ditu pertsona batek egiten dizkion galderei erantzuteko. Galdera horiek testuzko txatetan egin daitezke (web orri askotan daude horrelakoak) edo, bestela, ahots bidezko elkarrizketetan. Gu bereziki espezializatu gara hizkuntza naturala interpretatzen duten algoritmoetan, sistemak uler dezan zer den galdetzen zaiona. Horretarako, entrenatu egin behar da algoritmoa eta horixe da prozesu honetako lan zailenetako bat. Horrelako sistemek ongi funtzionatzen dute ingelesez, lan asko eginda dagoelako, baina gaztelaniazkoak astiro doaz aurrera. Guk erronka handiago bati heldu diogu, asmoa baita gure chatbot-ek euskara ulertu eta euskaraz hitz egin dezatela. Zentzu horretan, ia zerotik abiatu gara.
Nolako aplikazioak izan ditzakete chatbot-ek industri arloan?
Uste dugu etorkizun ez oso urrunean gai izango garela makinekin edo sistemekin komunikatzeko gure ahotsa erabiliz. Ez dugu teklaturik edo pantailarik beharko, gure ahotsaz emango dizkiegu aginduak edo eskatuko diegu informazioa. Eta makinak, sistemak edo prozesuak bere ahotsa erabiliko du zer gertatzen zaion esateko edo erabilpenari eta mantenimenduari buruzko iradokizunak egiteko. Are gehiago, makinak gai izango dira euren artean komunikatzeko. Egunen batean, makinekin hitz egin ahal izango dugu, hau da, sistema osoarekin erlazionatuko gara.
Une honetan, enpresek gehienbat bezeroekin komunikatzeko erabiltzen dituzte chatbot-ak. Langileak eduki beharrean bezeroek online egiten dituzten galderei erantzuteko, lan hori chatbot-ek egiten dute, gai direlako galderak ulertzeko eta bezeroen premiei erantzuteko, baldin eta galdera horiek jasota badaude beren programazioan. Hala, posible da egunean 24 orduko eta astean zazpi eguneko arreta ematea. Eta makina ez bada gai bezeroari konponbide bat emateko, beti egongo da aukera bere eskaera pertsona bati bidaltzeko.
Badakit gai arazotsua dela, batzuek uste dutelako horrelako sistemek lanpostuak desagerraraziko dituztela. Nire ustez, lanpostu horietako asko nahiko aspergarriak dira, eta chatbot-ei esker, lan horietan aritzen direnek bestelako lan sortzaileagoak egin ahal izango dituzte, balio handiagoa sortzen dutenak, alegia.
Lanpostuen galerari buruzko eztabaida alde batera utzita, gizartean bada beste eztabaida etiko bat adimen artifizialaren inguruan: enpresa batek jakinarazi behar dio bezeroari adimen artifizial batekin ari dela hizketan ala ez? Zein da zure iritzia?
Duela hilabete batzuk, Google enpresako adimen artifizial batek (Google Duplex) ile-apaindegi batera deitu zuen hitzordu bat eskatzeko. Langilea ez zen ohartu adimen artifizial batekin ari zenik eta hitzordua eman zion. Horrek erakusten du komunikatzeko gaitasuna duen AAk ongi funtzionatzen duela. AAk beste erabilpen batzuk ere izan ditzake, adibidez, erabil daiteke aurpegiak errekonozitzeko edo pertsonen nortasuna ordezkatzeko. Egia esan, chatbot batekiko komunikazioan egon daitezke elkarreragin hibridoak ere, hau da, gizakien esku-hartzearekin egiten direnak, gizakiak garelako balio erantsi handiena ematen dugunak. Zentzu horretan, uste dut zaila dela zehaztea norekin (zein izakirekin) ari garen hizketan.
Zergatik bizi dugu adimen artifizialean oinarritutako tresnen goraldi hau?
Teknologia helduarora iritsi delako. Adimen artifizialeko algoritmoak ezagunak dira aspalditik, baina orain konputazio gaitasuna handitu egin da, tresnak merkeagoak eta eskura errazagoak dira eta, beraz, gero eta gehiago erabiltzen dira. Chatbot-en kasuan, hizkuntza naturalaren prozesamenduaz gain, asko garatu dira baita ere analisi semantikorako tresnak, gai direnak idatzizko testu baten esanahia ulertzeko. Teknologia oraindik berde samar dago arlo horretan, baina ari dira bidea egiten. Ia edozein dispositibok edo Interneteko gailuk dauka adimen artifizial pixka bat.
Chatbot-ei dagokienez, zein urrats emango dituzue hemendik aurrera?
Eraikin bateko zati desberdinekin komunikatzeko proiektuak lantzen ari gara. Sentsoreak eta gure chatbot-ak erabiliz, zutabe batek edo hodi batek informazioa eman dezake arazo bat duenean eta ahots bidez jakinarazi arazo bat duela.
Horrez gain, bada lortu beharreko beste erronka handi bat: chatbot baten elkarrizketa beste informazio gehigarri batzuekin elikatu behar da, elkarrizketa aberasteko. Geo-kokapena erabiliz jakin badezakegu non dagoen solaskidea, bakarrik dagoen ala ez edo zertan ari den, gai izango gara zerbitzu zehatzagoak eskaintzeko. Hala ere, badaude mugak solaskidearen pribatutasuna errespetatzeko, eta aztertu beharko da zeintzuk diren zerbitzuak eskaintzeko balio dezaketen informazioak eta zeintzuk diren informazio pertsonalak.
Lotutako albisteak
Nexmachinak Gauzen Interneta industriara zabaltzen du
Enpresak IoT soluzio jasangarriagoak eta eskuragarriagoak eskaintzen ditu mota guztietako enpresa eta erakundeentzat
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Amazinglers: “Gazteek TikTok bidez lana bilatu eta aurkitu ere egiten dute, eta horretara egokitu behar gara”
Igone Ruiz de Azua arabarrak sortutako startupak gazteak enpleguekin eta praktikekin konektatzen dituen plataforma bat baino askoz gehiago izan nahi du; talentu bila enpresei aholkuak ematen dizkien eta belaunaldi berrien potentzialaren aldeko apustua egiten duen komunitatea.
Alterity, robotika mugikorrarentzat eta mugikortasun elektriko arinarentzat bateriak fabrikatzen dituen enpresa bizkaitarra
Elkarteak SPRI taldearen nazioartekotze-programaren laguntza bat jaso du, eta bezeroak ditu jada Italian, Suitzan eta Herbehereetan
Sariki, metrologian liderra den ETEa: “BIND SMEk zure erronketarako soluzioak dituzten startupekin konektatzen zaitu”
Gipuzkoako ETEak 40 urte beteko ditu 2025ean, eta BIND SMEren, Eusko Jaurlaritzak sustatutako eta startupekin berrikuntza irekian jarduteko programaren, 2. edizioan parte hartu zuen
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.