Begiralek industria-instalazioetan suteak detektatzea xede duen begiPLANT izeneko ikusmen artifizialeko plataforma zabaldu du
Euskal konpainiak adimen artifiziala aplikatu dio bideo-kamerek hartutako denbora errealeko irudien azterketari
Gero eta erakunde gehiagok erabiltzen dituzte ikusmen artifizialeko sistemak fabrikazio-prozesuak ikuskatzeko, langileak kontrolatzeko eta lan-arriskuak detektatzeko. Sektore honetan sei urte inguruko esperientzia duen Begirale enpresa erreferentziazko konpainia bilakatu da ikusmen eta adimen artifizialaren abantailak uztartzeko orduan. Hizketan jarri gara Iñigo Zorriketa Begiraleko Zuzendariarekin.
Zein da Begiraleren jatorria?
Begirale Dominionen ekimenez sortu zen 2013aren amaieran, une horretan adimen artifizialarekin uztartzen hasia zen ikusmen artifizialaren ezaguerak eta gaitasunak I+Gari lotutako aparteko erakunde batean nabarmentzeko asmoz. Helburu horrexeri begira, produktu eta teknologia berritzaileak garatzeari ekin genion.
Harez geroztik, nolako produktuak garatu dituzue Begiralen?
Oso arazo zehatzak konpontzen dituzten nitxoetako produktuak izan ditugu ardatz. Horien artean, ikusmen artifizialaren bitartez trenbide-pasaguneen segurtasuna ikuskatzea xede duen begiCROSSING deritzona da ezagunenetako bat. Horrekin batera, begiRAIL aipa dezakegu, aurrekoaren antzekoa, baina trenetarako arriskutsuak diren inguruneetara zuzendutakoa; hala nola, igarobide goratuak, lubakiak, eremu urperagarriak edota tuneletako sarrerak eta irteerak. Babesik gabeko inguruneak izan ohi dira, eta oso garrantzitsua da horien segurtasuna ikuskatzea. Beste produktu bat da begiSTATION, funtzionalitate berberekin, baina tren-geltokietako nasetan gerta daitezkeen pertsonen erorikoak eta bestelako ezbeharrak gertatzeko arriskuari erreparatuz. BegiSTAIRS delakoaren kasuan, eskailera mekanikoak dira ikusmen artifizialaren bidezko ikuskapenaren jomuga. Azkenik, begiPLANT merkaturatzen ari gara, ikusmen artifizialeko sistemen bitartez industria-instalazioetan suteak modu automatikoan detektatzeko.
Produktu espezifiko horiek ditugu ardatz, izan ere, momentuz, ikusmen artifizialak aukera handiak eskaintzen dituen arren, eremua zabaldu ahala detekzioaren fidagarritasuna moteldu egiten da. Gure fidagarritasuna handia da eta gure prozesuak kritikoak dira, nolabaiteko arriskua ekartzen baitute pertsonentzat edo bezeroaren azpiegiturarentzat, eta ondorioz, detekzio batean ezin duzu huts egin. Garaiz detektatzen ez badugu, ondorioak larriak dira. Fidagarriak izateko, beharrezkoa da saihestu nahi duzun arazoari buru-belarri ekitea, hainbat gauza detektatuz makina bat alarma faltsu sortu eta bezeroen errefusa eragin ohi duten bestelako modelo orokorrago batzuek ez bezalaxe.
Nola funtzionatzen dute zuen ikusmen artifizialeko teknologiek?
Makina batek bideoa denbora errealean aztertzea da helburua, pertsona batek kontrol-gune batean egin lukeen bezala. Baina tren edo metro geltokietan horrenbeste kamera daudenez gero, ezinezkoa da behar adina pertsona izatea gertatzen ari denari begira, une kritikoren batean gerta daitekeena detektatzeko. Adimen artifizialeko zenbait algoritmok bideo-seinalea denbora errealean prozesatu eta alertatzat konfiguratu dugun gertakariren bat detektatzea lortu dugu. Kontua ez da pertsonei edo objektuei begira egotea, gertakari jakin batzuk aintzat hartzea baizik. Teknologia propio hau I+G arloko esperientzia eta proiektuetan oinarrituta garatu dugu, Dominionen ‘background’ teknologikoarekin eta Vicomtech zentro teknologikoaren laguntzarekin. Azkenik, garatu dugun plataformak kamerek hartutako informazioa arakatu eta alarmak gehitu eta kudeatzea ahalbidetzen du, balizko ezbeharren bideoak gordetzeko aukerarekin, gerora azterketa forentserako beharko balira. Areago, bideo horiek sistemari ikasten jarraitzeko aukera ematen diote. Gehiegizko detekzioak eragiten dizkiguten kasuak gertatzen direnean, guretzat garrantzi handikoa da kasu horiek sistemaren ezagutza osatzen duen datu-baseari gehitzea, etorkizunean berriro errepika ez daitezen. Horixe da adimen artifizialaren gakoetako bat.
BegiPLANT da 4.0 Industriarako landu duzue produktua. Zer da, zehazki?
BegiPLANT 2015ean Petronorrekin hasitako esperientzia guztiz interesgarria da. Muskizko prozesuetako bideo-zaintza sistemak baliatu eta, kamera berberen laguntzaz, balizko suteen hasiera saihestea zen asmoa, keak zein garrak detektatuz. Hainbat saio eta proba pilotu egin ondoren, produktu bihurtu den soluzioa garatu genuen, eta Petronorrek Muskizko findegian ezarri du instalazioetako 60 kamera ikuskatzeko. Horrela, adimen artifiziala gehituz, kamera horiek suteen aurkako sentsore bihurtzeko gaitasuna izan dugu, bertan dagoen suteen aurkako sistemaren osagarri.
Zein da ikusmen artifizialaren oraingo heldutasun maila?
Ikusmen artifizialari adimen artifiziala gehitzea erabaki genuenean, 2014-2015 aldean, sekulako aurrerapausoa lortu genuen emaitzen fidagarritasunean, eta horrek prozesu kritikoak ikuskatzea ahalbidetu digu. Baina adimen artifizialak ez du edozertarako balio. Duela zenbait urtetako ‘boom’ haren ondoren, egun hobekuntza adierazkorrak lortzea zailagoa den lasaialdi batean sartuta gaude. Iritsi garen egoera honetan, fidagarritasun-maila berri bat eman diogu teknologiari, baina ezin dugu edozein gauza egin; adibidez, ezohiko jokabideak edo bestelakoak detektatzea. Adimen artifiziala ez da denetara iristen. Hain kasu konplikatuak eta hainbat motatako inguruneak daude, ezen, Adimen Artifiziala ezin baita denetara iritsi.
Zaila da bezeroei ikusmen eta adimen artifiziala gisako teknologia berritzaileetan oinarritutako soluzio hauek helaraztea?
Kosta egiten merkatuan sartzea, izan ere, gure jarduna ingurune kritikoetara zuzenduta dago, erosteko dinamikak eta ohitura teknologikoak oso finkatuak dituzten sektore helduetara, eta ez da erraza horietan honelako teknologia disruptiboak sartzea. Kasu askotan, prozesuak, kontrol-zentroak edota seinaleztatzeko sistemak ez daude prestatuta honelako teknologiez baliatzeko.
Bestalde, produktu hauen funtzionamendua defendatu behar dugu behin eta berriz, garrantzizko erreferentziak finkatu arte. Aitzindariak gara mundu osoan eta ez dago inon begiCROSSING bezalako produkturik. Bezeroek arrakasta-kasuan eskatzen dituzte, eta horrexetan gabiltza ETSren lankidetzaz, izan ere, 18 sistema instalatu behar ditugu haien trenbide-sarean. Gure sistema eta antzekoak munduko gauzarik arruntena izango dira zenbait urteren buruan. Norbaitek kamera bat instalatzen duenean, atzean adimen artifizialeko sistema bat izango du behar duen informazioa ateratzeko. Horixe da gure erronketako bat: erakundeei jakinaraztea gure produktuak onak direla, merkatua garatzea eta gure produktuak nazioartekotzea.
Lotutako albisteak
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.