Albisteak 12 iraila, 2025

IndeusBerri: Industria eta Euskararen plaza

Gaur albiste dira EHUren Udako Ikastaroak, Enpresa Digitala eta Adimen Artifiziala, BAIC eta Inklusio digital.

Adimen Artifizialari buruzko lau ikastaro eta tailer eskainiko ditu Enpresa Digitalak euskaraz irailean zehar. Adimen Artifizialak lagundutako kontroldun irudiak sortzea; Microsoft 365 Copilot: Produktibitatea Adimen Artifizialarekin eraldatzen; Sarrera Adimen Artifizial Generatiboan: ulertu, erabili eta prestatu etorkizunerako; eta ChatGPT Prompt Engineering eraginkortasunez erabiltzea dira irailaren 23 eta 30a bitartean Enpresa Digitalaren zentro desberdinek emango dituzten ikastaro eta tailerrak, batzuk onlinekoak izango dira eta besteak aurrez aurrekoak, guztiak ere Adimen Artifizialari lotutako tresna desberdinak erabiltzen ikasi nahi dutenei zuzendutakoak.

EAEko Zientzia eta Teknologiaren 45 urteko garapena Pedro Miguel Etxenikeren begiradatik. EHUren Udako Ikastaroen barruan, datorren irailaren 30ean egingo da ekitaldia Donostiako Miramar Jauregian. Azken 45 urteotan Zientzia eta Teknologia politikek Euskadin izan duen bilakaera aztertuko da. Pedro Miguel Etxenike izango da bidelagun, Eusko Jaurlaritzaren etapa desberdinetan zehar eta, hasiera-hasieratik, figura konstantea eta eragin handia izan duena. Zientzia, teknologia, berrikuntza eta unibertsitatea nola garatu diren aztertuko da, hiru printzipio nagusi gidariren arabera: adostasun politiko zabalak, epe ertain eta luzerako begirada eta konpromisoa, eta lurraldean eragin handiko emaitzak lortzea.

Oporretatik ohiko errutinara itzultzeko 5 AA tresna gomendatzen dizkigu BAIC zentroak. Uda ostean errutinara itzultzea erronka handia izan daiteke: agenda beteak, metatutako zereginak eta erritmoa berreskuratzeko zailtasunak. BAICen esanetan Adimen Artifiziala aliaturik onena izan daiteke antolatzeko, denbora aurrezteko eta egunetik egunera emankorragoa izateko... baita goizean 5 minututxo gehiago lo egiteko ere. BAIC zentroan AAren bost tresna bildu dituzte, horiekin errutinara itzultzea errazagoa izango delakoan: ChatGPT, Trevor AI, Sunsama, Reclaim eta Power Automate.

“Inklusio digital” Industria Berriaren Spri Hiztegian. Mundu digitalerako sarbide mugatua izan dezaketen pertsonei digitalki alfabetatzeko eta Interneterako sarbidea izateko aukera emateko asmoz egiten diren ekintzen multzoa. Bazterketa digitalari kontrajarria da, eta hura saihesteko bultzatzen da. Horrekin batera, adierazi dezake, baita ere, testuinguru digitalak eskaintzen dituen aukerak aprobetxatzea baliabide gutxien duten pertsonak eta eremuak gizartean integratzeko.

Lotutako albisteak

05/09/2025 Euskara industrian

Bilaketa iragazi

IndeusBerri: Industria eta Euskararen plaza

Lotutako albisteak