IndeusBerri: industria eta euskara uztartzen dituen informazioaren topagunea

Indeusen aurtengo Batzar Orokorra dakarkigu gaur IndeusBerrik azalera, euskararekiko konpromisoa berrestearekin batera kide berri bati ongietorria eman dion bilera, Innobasquek ekimenarekin bat egin baitu. Arkitekturaren esparruko terminoen hiztegia ere nabarmendutako berria da, Enpresa Digitalak martxoaren 3rako antolatutako ikastaro batekin batera, Social Media Marketingi buruzkoa hain zuzen. Eta amaitzeko, ohiturari jarraituz, industria berriaren Spri hiztegiko kontzeptu berri bat: Adimen Artifizial.

Martxoaren 3an Social Media Marketingi buruzko ikastaroa euskaraz: Edukien kudeaketa eta promozioak. Sare sozial batean hainbat formatutako informazioa, datuak eta edukiak partekatzen ditu pertsona-talde batek (eta/edo erakunde batek), elkarren artean interes komun erlatiboa bilatzen duen komunitate birtual bat sortuz. Prestakuntza honetan, komunikazio-bide berri horiek zer, nola, zertarako eta zergatik erabili jorratuko dugu. Era berean, Meta Ads Manager ezagutuko dugu, Facebooken eta Instagramen kanpainak aktibatzeko tresna.

Eusko Jaurlaritzak eta UZEIk arkitekturaren esparruko terminoen hiztegi zabal eta adostua plazaratu dute. Euskaraz jardun nahi duten arkitekturako profesionalek azken urteotan adierazitako premiari erantzutea du helburu; izan ere, hutsune, zailtasun eta segurtasun-falta terminologikoei aurre egin behar izaten diete etengabe. Erreferentziazko lineako tresna bat da, ia 5.100 termino dituen hiztegi elebidun adostu, zabal eta eguneratua, hurrengo faseetan zabalduko dena. Arkitekturaren arloko euskarazko komunikazioa bultzatzeko funtsezko baliabidea da argitaratu berri den hiztegi berria.

2023. urtean euskara industria arloan indartzeko konpromisoa berretsi eta Innobasqueri ongietorria eman dio Indeusek. Urtero legez aurten ere, Industriaren Euskal Plataformak Batzar Orokorra eginez eman dio hasiera urteari. Miren Dobaran, Hizkuntza Politikarako Sailburuordea, Iñigo Ansola, Energiaren Euskal Erakundearen zuzendari nagusia eta Aitor Urzelai, Spriren zuzendari nagusia, buru izan dituen bileraren hasieran, Ainara Basurko, Bizkaiko Foru Aldundiko Sustapen Ekonomikoko diputatuak ongietorria eman die Indeuseko kideei, Batzar Orokor hau berak zuzentzen duen Sailaren egoitzan egin baita.

“Adimen Artifizial” Industria Berriaren Spri Hiztegian. Giza adimenaren prozesuak simulatzen dituzten sistemak egitea helburu duen zientzia eta teknika-multzoa. Informatikaren adar bat da, eragiketa logikoak egiteko eta ikasteko zein arrazoitzeko ahalmena duten sistemak nola diseinatu eta garatu ikertzen duena. Sistema artifizial adimendunek bere inguruko informazioa hauteman eta prozesatzen dute, eta egokitu zaizkien helburuak arrakastaz lortzeko aukera maximizatzen duten ekintzak proposatzen edo abiarazten dituzte.

Lotutako albisteak

26 apirila, 2024 Euskara industrian

IndeusBerri: industria eta euskara uztartzen dituen informazioaren topagunea

Irakurri gehiago

19 apirila, 2024 Euskara industrian

IndeusBerri: industria eta euskara uztartzen dituen informazioaren topagunea

Irakurri gehiago

18 apirila, 2024 Euskara industrian

GKN, Larraioz, Basque Automation eta Soziolinguistika Klusterrak bat egin dute INDEUSekin

Irakurri gehiago

12 apirila, 2024 Euskara industrian

IndeusBerri: industria eta euskara uztartzen dituen informazioaren topagunea

Irakurri gehiago

5 apirila, 2024 Euskara industrian

IndeusBerri: industria eta euskara uztartzen dituen informazioaren topagunea

Irakurri gehiago

Joan blog-era