GH Cranes : “Gure enpresarentzako erronka garrantzitsuak jorratzeko aukera ematen digu BIND 4.0k”
2016an sortu zen BIND 4.0,, startup berriak eta finkatutako enpresak lotzen dituen plataforma publiko-pribatua, helburu komun batekin: berrikuntzaren arloko proiektu berriak martxan jartzea. Eusko Jaurlaritzako Industria, Trantsizio Energetiko eta Jasangarritasun Sailak eta SPRIk martxan jarri zutenetik, Berrikuntza Irekiaren arloko erreferentea bihurtu da industria-ehundurari eta ekintzailetzari emandako babesarengatik. Zortzi ediziotan 250 startup eta 350 proiektu azeleratu ditu, 9,6 milioi euro baino gehiagoko fakturazioa lortuz. Joera on horren enpresa errudunetako bat GH Cranes da, egoitza Beasainen duen familiako enpresa. Enpresa hori Garabien Munduko Fabrikatzaileen TOP 5ean dago. Duela 67 urte sortu zenetik, 125.000 garabi inguru instalatu ditu mundu osoan Made in Euskadi zigiluarekin. Zigilu horren atzean 1.000 pertsonako lantaldea dago bost kontinentetan zehar sakabanatuta. Hala azaldu zuen berriki Inés Puyadena Open Innovation Managerrak.
Ikuspegi oso globala duen tokiko enpresa baten adibide argia da zurea…
GHk urte batzuk daramatza globala izaten. Ekoizpen-fabrikak ditugu AEBn, Mexikon, Polonian, Brasilen eta Dubain, eta presentzia dugu mundu osoan. Filialentzat, nahiko ikuspegi lokala dugu hemengo egoitza nagusian.
Zure enpresaren moduko batek zer bilatzen du BIND 4.0ren moduko plataforma batean parte hartzen duenean?
Enpresaren erronka espezifikoak soluzio teknologiko berritzaileekin jorratzeko aukera ematen du, guk gure barne-baliabideekin egingo genuena baino askoz ere azkarrago. BINDen moduko ekimenek aukera ematen digute azkar iristeko startup askorengana.
Azken edizio honetan startup batekin ‘match’ egiteko zain zaudete (hala esan baldin badaiteke…). Nolakoa da prozesua?
Lehenengo zer arlo, teknologia eta erabilera-kasu interesatzen zaizkigun definitzen dugu. Hortik aurrera, bilatzen ari garenarekin bat egiten dutenak bilatzen ditu BINDeko taldeak hautagaitza bidali duten startup guztien artean. Urri inguruan izaten da hori, pitchingen (aurkezpen laburrak) astea egiten denean. Puntu horretan, erronka jakin bati aurre egiten lagun diezagukeen zerbait proposatzen badu startupen batek, harremanetan jartzen gara harekin eta proiektu pilotu bat sortzeko aukera hasten gara aztertzen. Eta guztia ondo badoa, urtarrilean ateratzen dira pilotuak. Normalean, proiektu laburrak dira, lau eta sei hilabete artekoak.
BINDen zenbat ediziotan hartu duzue parte?
2025ekoarekin seitan dagoeneko.
Eta arrakasta-kasu adierazgarririk izan duzue?
Norleanena. Galiziako startup horrekin biki digital bat definitu genien ekoizpena optimizatzeko eta gaur egun erabiltzen jarraitzen dugu ekoizpena planifikatzeko garaian. BORKena ere beste kasu interesgarri bat izan zen. Txileko startupak ekoizpenean behar ditugun lehengaien prezioak iragartzen ditu. Hala, unerik onenean alderatu dezakegu preziorik onena lortu ahal izateko.
Eta GH Cranesen jarduera propioari dagokionez, nola doa urtea?
Urtea oso ondo hasi zen, lehen hiruhilekoan errekorra egin genuen. AEBren muga-zergek sortutako ziurgabetasunen ondorioz bigarren hiruhilekoa oso ahula izan da. Ez soilik gure herrialdean, baita Mexikon eta Brasilen ere. Eta iraileko datuak eskuan, badirudi merkatua suspertzen hasi dela, beraz, 2025 amaierarako gure helburua da aurreko ekitaldiko eskarien fakturazio- eta -sarrera datuak errepikatzea. Urte amaierara bitarte iraileko joera mantentzen bada, datu horietara gerturatzea espero dugu.
