BIND 4.0 programak ETE-en digitalizazioa bultzatzen du, haien lankidetzaren bitartez eta startup teknologikoekin kontratuak sinatuta

Euskal ETE-ek, Uptek, Aclima, Energiaren Klusterra eta Acicae klusterrak dinamizatzeko erakundeen (KDE) bitartez, hainbat erronka sektorial proposatuko dituzte, startupek horietan oinarritutako proposamen teknologikoak aurkez ditzaten.

Hautatutako startupek kontratuak sinatu ahal izango dituzte parte hartzen duten ETE-ekin, proiektua elkarrekin garatzeko.

BIND 4.0 berrikuntza irekiko plataformak euskal ETE-en digitalizazioa bultzatzeko ekimena jarriko du abian. Horretarako, kontratuak sinatuko ditu azaroaren 5etik abenduaren 22ra arte hautagaitza aurkezten duten startup teknologikoekin. BIND 4.0 SME Connection izeneko ekimenak Euskal Autonomia Erkidegoko ETE industrialen eta startup teknologikoen arteko lankidetza eragin nahi du, proiektu berritzaileak elkarrekin gara ditzaten sustatzeko.

Eusko Jaurlaritzako Eraldaketa Digitalaren eta Ekintzailetzaren zuzendari Leyre Madariagak azaldu duenez, “BIND 4.0 SME Connection ekimena sortu dugu euskal ETEak BIND 4.0 programaren esparruan garatutako esperientziaz balia daitezkeelako startupekiko interakzioa bultzatzeko eta beren lehiakortasuna hobetzeko, teknologia berrien eta digitalizazioaren aplikazioaren bitartez. Euskal Autonomia Erkidegoak ETEak buru dituen industria-ehuna du, goi-mailako teknologia eta negozio-eredu berritzaileak”.

BIND 4.0 SME Connection industriako klusterrak dinamizatzeko erakundeekin eta Euskal Autonomia Erkidegoko erreferentziako ETE-ekin lankidetzan sortutako ekimen publiko-pribatu berria da. Programa horrek hiru helburu nagusi ditu: euskal ETE industrialen eraldaketa digitala bultzatzea, startupekiko lanaren bitartez (berrikuntza irekia); startupei merkaturako sarbidea erraztea eta industriaren egungo erronkei erantzuteko soluzioa garatzeko aukera ematea, finkatutako ETE-ekiko lankidetzaren bitartez; eta, azkenik, startupak ekintzailetzaren eta berrikuntzaren euskal ekosisteman sartzea.

Industriaren erronka berriei erantzutea

Dagoeneko 20 ETE industrialetik gorak baieztatu dute BIND 4.0 plataformaren programa berri horretan parte hartuko dutela, Euskal Autonomia Erkidegoko kluster sektorialak dinamizatzeko erakundeen bitartez, hala nola Uptek (AFM), makina-erremintaren klusterra, Aclima, ingurumen-sektoreko klusterra, Energiaren Klusterra eta Acicae, automobilgintzako klusterra. Parte-hartzaileak hautatzeko, lehenik, klusterrak dinamizatzeko erakundeek parte hartuko duten ETE-en beharrak identifikatuko dituzte, eta, horretan oinarrituta, hainbat erronka sektorial proposatuko dituzte, hautagaiek soluzio teknologiko disruptiboak aplikatuz irtenbidea eman diezaieten. Erronka horiek hobekien konpontzen dituzten proposamenak beren proiektuak euskal ETE-ekin lankidetzan garatzeko hautatu ahal izango dituzte BIND 4.0 SME Connection ekimenaren lehen edizio honetan.

Programa horrek, BIND 4.0 plataformak bezalaxe, onura ugari ditu startupentzat zein ETE-entzat. Alde batetik, startupek proiektu erreal bat gara dezakete, fakturazio errealarekin, eta aukera dute merkatuan sartzeko, sektorean finkatutako bezeroen esperientzia eta erreferentzia eskueran izateko, proiektuaren garapen arina lortzeko, tamaina txikiagoko enpresekin lan egiteari esker, eta beren startuparen irudiaren eta markaren posizionamendua lortzeko. ETE-ek, bestalde, zuzenean eskura dezakete talentu berritzailea, negozio-aukera berriak sor ditzakete eta beren lehiakortasuna hobetzeko barne-gaitasunak gara ditzakete.

Zeinek parte har dezake?

Parte hartu ahal izateko, startupek honako baldintza hauek bete behar dituzte:

• Industria-sektoreari aplikatutako teknologia berrien garatzaile izatea.
• Ikusi, testatu edo probatu daitekeen edo merkatuan eskuragarri dagoen produktu edo zerbitzu bat edukitzea.
• 8 urtetik gorako antzinatasuna ez izatea.
• Industria-prozesuak hobetzeko teknologia berriak erabiltzea.

Startupek azaroaren 5etik abenduaren 22ra arte eman ahal izango dute izena programaren webgunearen bitartez: www.bind40.com.

BIND 4.0-ri buruz

BIND 4.0 industria adimenduneko berrikuntza irekiko plataforma publiko-pribatu bat da, Ekonomiaren Garapen, Jasangarritasun eta Ingurumen Sailak SPRI Taldearen eta Euskal Autonomia Erkidegoko ekintzailetzaren ekosistemako UpEuskadi plataformaren bitartez sortua. Gaur egun, Euskal Autonomia Erkidegoan egoitza duten erreferentziako 65 enpresa nagusirekin lankidetzan dihardu, eta nazioarteko laguntzaile teknologikoek ere parte hartzen dute, hala nola Siemens, Microsoft eta Amazon Web Services-ek. Ekimena helburu bikoitzarekin sortu zen, hots, industriaren transformazio digitala bultzatzeko, eta, aldi berean, ekimen berritzaileak sendotzeko prozesua enpresa handien eta startupen arteko lankidetza-eredu baten bitartez azeleratzeko. 2016. urteaz geroztik, BIND 4.0 plataformak 130 startupek baino gehiagok garatu dituzten 200 proiektu azeleratu ditu egin dituen bost edizioetan.

Lotutako albisteak

24 apirila, 2024 Ekintzailetza

“Bizkaia enpresekin eta pertsona ekintzaileekin lankidetzan ari da jasangarritasuna eta berrikuntza sustatzeko”

Irakurri gehiago

23 apirila, 2024 Ekintzailetza

Emen4sport, kirol-arrakazta edonoren eskura I+G+b baten bidez

Irakurri gehiago

23 apirila, 2024 Ekintzailetza

Brandfy, markak diseinatzeko prozesua birdefinitzen duen Adimen Artifizial Sortzaile tresna

Irakurri gehiago

22 apirila, 2024 Ekintzailetza

Absentixek lan-absentismoaren kostuak murrizten ditu, enpresen lehiakortasuna eta produktibitatea handitzeko

Irakurri gehiago

19 apirila, 2024 Ekintzailetza

Wake Up! Albiste ekintzaile batzuk sarean

Irakurri gehiago

Joan blog-era