Maroko, Ipar Afrikako automobilgintzaren hub estrategiko nagusia

Hazkunde jarraitua gertatzen ari da Afrika iparraldeko hainbat herrialdetako automobilgintzaren sektorea

Hazkunde jarraitua gertatzen ari da Afrika iparraldeko hainbat herrialdetako automobilgintzaren sektorean, ibilgailuen ekoizpena nabarmen gehitu delarik. Industriaren garapena sektorearen birlokalizazioak eragin du neurri handi batean, Europako hornidura-kateen hurbiltasunarekin eta Txinan egoitza duten automobil-fabrikatzaileen inbertsioen gorakadarekin batera.

Gainera, kanpoko faktoreek, Itsaso Gorriko itsas-garraioan etenaldiak izateko etengabeko arriskua eta Bruselak eta Washingtonek Txinako ibilgailuei ezarritako merkataritza-mugapenak kasu, inguru erakargarri bihurtu dute eskualde hau euskal enpresak nazioartekotzeko.

Automobilgintza sektorearen azterketa Ipar Afrikan

SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziaren azken txostenak sakon aztertu du automobilgintzaren sektorea Ipar Afrikan, Maroko, Egipto, Aljeria eta Tunisiako merkatuei arreta berezia emanez. Dokumentuak sektorearen bilakaerari buruzko ikuspegi global eta eguneratua jaso du, herrialde horietako datu eguneratuak bilduz.

Automobilgintza sektore estrategiko bihurtu da Marokoko industria-sarean

Dokumentuaren arabera, Maroko da automobilgintzako industriaren hub produktibo nagusia Afrikako iparraldean. Sektorea zutabe estrategiko bihurtu da Marokoko industria-sarean, eta epe luzeko plan estrategikoak ditu abian ekoizpen-gaitasuna handitu ahal izateko. Europarekiko gertutasunari esker, osagaiak merkeago eta azkarrago esporta ditzake kontinentearen erdialdeko beste herrialde batzuek baino.

Horren harira, txostenak argi utzi du hainbat faktore direla Maroko enpresentzat helmuga erakargarri bihurtu dutenak: zona frankoak, merkataritza-akordio mesedegarriak, kostu operatibo lehiakorrak eta sustapenezko gobernu-politikak. Ondorioz, garrantzizko automobil-fabrikatzaileuak, Renault eta Stellantis kasu, Europar Batasuna, Turkia eta hainbat herrialde arabiarretako merkatu estrategikoekin merkataritza askeko akordioak dituen herrialde honetan finkatu dira.

Atzerriko inbertsioaren igoera

 Automobilgintzan egiten den atzerriko inbertsioa Marokon, Egipton, Aljerian eta Tunisian biltzen da

Txostenak Egiptoren garrantzia ere azpimarratu du, izan ere, tokiko pizgarrien laguntzaz, automobilgintzaren industria indartzen ari da. Suezko kanalaren inguruan duen kokapen estrategikoak (merkataritza globalaren % 12 bertatik igarotzen da) posizio pribilegiatua ematen dio atzerriko inbertsioak erakartzeko. Ildo horretan, nazioarteko fabrikatzaile handiak, General Motors, BMW, Hyunday, Toyota eta Nissan kasu, Egipton lanean ari dira dagoeneko, bertako ekonomian inpaktu positiboa eraginez.

Era berean, Afrikako Kontinenteko Merkataritza Askeko Eremuaren (AfCFTA) sorrerak aukera berriak ireki ditu Afrika barruko merkataritza sustatzeko eta balio erantsi handiagoko ondasunen ekoizpena bizkortzeko.

Hala ere, azterketak zenbait defizit nabarmendu ditu Egiptoko automobilgintzan: azpiegitura sendoen falta, ezegonkortasun ekonomikoa eta interes-tasa altuak. Dena den, etorkizunari begira, aurreikuspenak nahiko positiboak dira, industriaren modernizazioa eta proiektu berrien garapena ardatz dituzten inbertsioen eraginez.

Aljeria da automobilgintzaren industria bultzatzen ari den eskualde honetako beste herrialdeetako bat, atzerriko zuzeneko inbertsioaren igoera nabarmenari esker. Gainditu beharreko erronken artean, inportazioekiko mendekotasuna, administrazioaren konplexutasuna eta azpiegiturarik eza azpimarra daitezke. Epe luzera, herrialdearen arrakasta Europar Batasunarekiko eta Afrikako beste merkatu batzuekiko merkataritza-harremanen egonkortasunaren araberakoa izango da.

Azkenik, Tunisia automobilgintzako osagaien garrantzizko hornitzaile bihurtu da Europako merkatuan, hurbiltasun geografikoagatik eta merkataritza-akordioengatik. Nolanahi ere, sektoreak ez du lortu Ipar Afrikako eremuan erreferentziazko merkatutzat posizionatzea, aduanen erregulazio zorrotzagatik, piezen inportazioekiko mendekotasunagatik eta burokraziagatik.

Afrikako Iparraldeko automozio-hubean nazioartekotzeko gakoak

Maroko Afrikako Iparraldeko automozio-sektoreko ekoizpen-polo nagusi bihurtu da, esportazio-gaitasun gero eta handiagoarekin eta inbertsiorako baldintza erakargarriekin. Harekin batera, Egipto, Tunisia eta Aljeria bezalako herrialdeek eraldaketa fasean dagoen industria-ekosistema bat osatzen dute, eta aukera berriak eskaintzen dizkiete euskal enpresei.

Aukera horiek identifikatzen eta aprobetxatzen laguntzeko, Basque Trade & Investment (BTI) erakundeak eskualdeko automozio-sektoreari buruzko txosten estrategiko hau argitaratu du. Gainera, nazioartekotzerako laguntza eta zerbitzu espezializatuak eskaintzen ditu, bai eta sektoreko azoka esanguratsuetara hurbiltzeko ekimenak ere.

Euskadik gero eta interes handiagoa du ekonomia emerjenteekin harremanak sendotzeko, eta horren adibide da Egiptorekin azkenaldian sendotu den lankidetza ekonomikoa, eskualde horrek euskal enpresa industrialentzat duen potentziala agerian utziz.

Horrez gain, merkatu berrietarako merkataritza-misioen plan berria abiarazi da, eta SPRI Taldeak hainbat nazioartekotze-laguntza eskaintzen ditu enpresen ezarpena eta hedapena sustatzeko.

Sektore-txosten, nazioarteko nobedade eta hurrengo ekitaldi estrategikoei buruz egunean egon nahi baduzu, harpidetu SPRI Taldearen buletinera eta eskuratu nazioartekotze-prozesuan hurrengo urratsa ematen lagunduko dizun informazio guztia.

Zerikusia duten beste txosten batzuk:

• BT&Iren Automobilgintzako Behatokia
  Munduko automozio-industriaren ikuspegi xehea eskaintzen du azterketa horrek, eta haren egituran, eragile nagusietan eta estrategietan jartzen du arreta, euskal enpresek negozio-aukerak aurkitu eta nazioartekotze-planak garatu ahal izan ditzaten.
• Indiako automobilgintza-merkatuaren azterketa
• Italiako automobilgintza-merkatuaren azterketa
• Japoniako automobilgintza-merkatuaren azterketa
• Turkiako automobilgintza-merkatuaren azterketa
• Mexikoko automobilgintza-merkatuaren azterketa
• Txinako automobilgintza-merkatuaren azterketa
• Brasileko automobilgintza-merkatuaren azterketa
• Marokoko automobilgintza-merkatuaren azterketa
• Argentinako automobilgintza-merkatuaren azterketa
• Estatu Batuetako automobilgintza-merkatuaren azterketa
• Errusiako automobilgintza-merkatuaren azterketa
• ASEANeko automobilgintza-merkatuaren azterketa
• Txinako sektore automotrizak Europan duen azkundeari buruzko oharra
• Ibilgailu astunen elektrifikazioari buruzko txostena