Euskadi liderra da automobilgintzako eskualdeen aliantzan, eta ibilbide-orri berri bat eskatu du
Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak, Andoitz Korta Industria Sustatzeko sailburuordeak, Nagore Bonilla Basque Trade & Investment-eko (BasqueTrade) zuzendari nagusiak eta automobilgintzako euskal industriaren ordezkariek, ACICAEren bidez, Munichera bidaiatu dute aste honetan, Municheko Adierazpena sinatzen parte hartzeko. Eskualde Automotrizen Aliantzak (ARA) sustatutako konpromisoa da, eta horren helburu nagusia da ziurtatzea Europako Batzordeak automobilgintzaren industriari eusten jarraitzen duela, Europako lehiakortasunaren eta ongizatearen zutabe gisa, mugikortasun jasangarriranzko bidezko trantsizioaren bidez. Europan sektoreko 30 milioi langileen gehiengoa ordezkatzen dute eskualde horiek.
Testuinguru horretan, ekitaldian Jauregi sailburuak azpimarratu zuen euskal industriak Europako automobilgintzaren sektorean duen garrantzi estrategikoa. Hurrengo urteetarako ibilbide-orri gisa, apustu hirukoitza nabarmendu zuen: finantziazioa, berrikuntzan inbertitzea eta sektorearentzako eskari berria sortzea. Halaber, nabarmendu zuen Euskadiko automobilgintzak deskarbonizazioarekin duen konpromiso irmoa, betiere neutraltasun teknologikotik abiatuta, eta adierazi zuen neutraltasun hori garrantzitsua dela mugikortasun jasangarriagorantz aurrera egiteko.
Horren harira, Emisio Gutxiago programaren emaitzak aurkeztu ditu sailburuak. Programa horren bidez, parke mugikorra berritzea bultzatu behar dela adierazten da, ibilgailu kutsagarrienen ordez berriak erostea sustatuta. Nabarmendu behar da plan horrek 2024arekin alderatuta % 30 inguru areagotu duela matrikulazio-eskaera Euskadin, eta neutraltasun teknologikoa bultzatzen duten laguntzen adierazle gisa aurkeztu du, deskarbonizazioan aurrera egiteko eta eskaera eta jarduera ekonomiko berria sortzeko bide gisa. Gaineratu duenez, Estatura zein Europara esporta daitekeen eredua da, eta administrazioen eta automobilgintzaren arteko lankidetzaren adibidea da. Halaber, eragin zuzena du parkea berritzeko, emisioak murrizteko eta herrialdea ekonomikoki aktibatzeko.
Ildo horretan, sailburuak iragarri du, programak herritarren harrera ona ikusita, Eusko Jaurlaritzak erabaki duela Emisio Gutxiago programaren eskaerak egiteko epea aurtengo urriaren 15era arte luzatzea, hau da, aurreikusitakoa baino hilabete bat gehiago ematea, interesdunek espedienteak izapidetzen jarrai dezaten.
Bestalde, Mikel Jauregik positibotzat jo du Ursula Von der Leyen Europako Batzordeko presidenteak 2035 ibilbide-orria berrikusi izana, eta Europako automobilgintzaren industriari laguntzeko premiazko neurriak hartzeko eskatu du. Era berean, adierazi du Europako automobilgintzaren sektoreak eta, bereziki, Euskadiko sektoreak, Europakoak ez diren automobilgintzako enpresei Europatik kanpo Europako enpresei eskatzen dizkieten betebehar berberak aplikatzeko beharra dutela; hau da, oinarrizko arau gisa, Europakoak ez diren enpresa horiek tokiko edukiarekin lan egiteko eta Europako osagaiak erosteko betebeharra izatea.
Munichen ARAren Batzar Nagusian sinatutako adierazpenak azpimarratzen du Europako industria-lehiakortasunari eusteko beharrezkoak direla finantziazio espezifikoa, erregulazio-malgutasuna eta eskualdeekin elkarrizketa egituratua, enplegua, talentua eta berrikuntza babesteko, trantsizio berdeko eta nazioarteko merkataritza-tentsioz betetako testuinguru honetan.
Adierazpenak nabarmentzen du eskualdeak gehiago hartu behar direla aintzat Automotive Action Planean eta Elkarrizketa Estrategikoan, eta proposatzen du trantsiziorako programa bidezkoa ezartzea 2028-2034 urte anitzeko finantza-esparruan, bai eta malgutasun handiagoa ere automobilgintzarekin lotutako estatu-laguntzetan eta lurraldeetarako funtsen aurre-esleipenean.
Konpromisoaren helburua da balio-kate osoari laguntzea, eta, horretarako, inbertsioak eta lan kualifikatua ziurtatzea, 2028–2034 urte anitzeko finantza-esparruaren bidez, eta eskualdeek Automotive Action Planean eta elkarrizketa estrategikoan parte-hartze handiagoa izan dezaten bultzatuta.
Sinaduraren esparruan, sailburuak goi-mailako aldebiko bilerak egin ditu euskal industriarentzako eskualde nagusietako ordezkariekin, hala nola Bavariarekin, Herri Gotthardt Bavariako estatu-idazkaria buru dela, eta Grand Est eskualdearekin (Conseillere Regionale), Anne Sander Europako Parlamentuko diputatu ohia buru dela. Euskal industriaren interesak defendatzeko ahaleginak bateratzea da helburua, Europako automobilgintzarako funtsezkoa den une honetan, irismen handiko trantsizio teknologikoak eta hornidura- eta merkatu-kateak berrantolatzen dituzten tentsio geoestrategiko eta komertzialak gertatzen ari diren honetan.
Euskadi, gaur egun, ARAko lehendakariordea da, Gran Est-ekin (Frantzia) batera, joan den azaroaren 29an Monzan (Italia) egindako konferentziaren ondoren. Horrek indartu egiten du Euskadik neutraltasun klimatikorako trantsiziora bideratutako ekimen eta proiektu europarrak koordinatzeko duen ahalmena.
Aldi berean, Alemaniara egindako bisitan, euskal ordezkaritzak IAA Mobility bisitatu du, mugikortasun, jasangarritasun eta teknologian munduko plataforma liderra: aste honetan Munichen egiten ari dira eta sektoreari lotutako hainbat euskal enpresak parte hartu dute.
