Eusko Jaurlaritzak BasquESG ekimena jarri du abian, euskal ETEen lehiakortasuna eta jasangarritasuna bultzatzeko
- Euskal enpresa traktore handiek eta finantza-entitateek bat egin dute sektore estrategikoetan lurraldeko industria-sarea eraldatzeko proiektu honekin; sektore hauetan, hain zuzen: energia, erregai berriztagarriak, aeroespaziala, sare adimendunak eta biltegiratzea, mugikortasun jasangarria, automobilgintzako osagaiak eta metalurgia
- BasquESG ekimenak euskal ETEei erraztuko die jasangarritasun-txostenen eskakizunak betetzea eta negozio-aukera berriak eskuratzea, haien lehiakortasuna bultzatzeko
- Europako Batzordeak ESGaren garrantzia errekonozitzen du, eta VSMEa lehiakortasunerako eta Europako merkatuetara sartzeko funtsezko estandar gisa errekonozitzen du
Eusko Jaurlaritzak BasquESG ekimena aurkeztu du gaur. Onartu berri den Euskadiko 2030 Industria Planean jasotako proiektu eraldatzaileetako bat da BasquESG, eta euskal ETEen errealitatera egokitutako jasangarritasunaren txosten- eta ebaluazio-sistema propioa sortzea du helburu. Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregirekin batera, euskal enpresa traktore eta finantza-entitate handietako arduradun nagusiak izan dira aurkezpen-ekitaldian, Estatuan aitzindaria den ekimen honetan ahaleginak batu dituztenak: Kutxabank, Laboral Kutxa, Iberdrola, Petronor, ITP Aero, Ingeteam, CAF, Mercedes Benz eta Sidenor.
Finantza sektoreaz gain, parte hartzen duten enpresek 2030 Industria Planean jasotako sektore estrategikoak ordezkatzen dituzte: energia, erregai berriztagarriak, aeroespaziala, sare adimendunak eta biltegiratzea, mugikortasun jasangarria, automobilgintzako osagaiak eta metalurgia. BasquESG ekimenak 2026an enpresa horien balio-kateetako 500 ETE lortzea espero du.
ESG (Environmental, Social and Governance) sistemak enpresen ingurumen, gizarte eta gobernu oneko jarduna neurtzea du helburu. Europako Batzordeak azpimarratu du ESGa funtsezko elementua dela merkatu globaletan Europako enpresen gardentasuna, konfiantza eta lehiakortasuna bermatzeko, eta dagoeneko gomendatu du EFRAGek garatutako VSME estandarra, ESGaren ebaluazioa eta txostena egiteko. EFRAGek aurkezpenean parte hartu du, eta Europako Batzordearen finantza- eta jasangarritasun-informazioaren arloko entitate aholkularia da. Horregatik, ETEetan ESGa ezartzea bultzatzen du, finantzaketa lortzeko, inbertsioak erakartzeko eta bezeroen eta erregulatzaileen eskariei erantzuteko bide gisa.
BasquESG ekimenarekin, Euskadi erreferentziazko lurralde gisa finkatzen da Europan ESG estandarrak ezartzeari dagokionez, lankidetza publiko-pribatu eredugarri bati esker. Parte hartuko duten euskal enpresa handiek beren enpresa hornitzaileak trakzionatuko dituzte, batez ere ETEak. Horiez gain, EAEko bi finantza-entitate nagusiak daude, eta horien zeregina izango da kapitala mobilizatzea ingurumen-, gizarte- eta gobernantza-irizpideak (ESG irizpideak) betetzen dituzten enpresetarantz, horrela ekonomiaren jasangarritasuna sustatzeko. Ekimena berehala jarriko da abian, proiektu pilotu baten bidez, VSME tresnak euskal enpresetan duen aplikagarritasuna ezagutzeko eta gainerako euskal ETEetan behin betiko hedapena prestatzeko.
Enpresa traktoreak eta finantza-entitateak ez ezik, Euskalit ekimenaren parte ere bada, ETEei laguntzeaz eta parte hartzen duten ETE guztiei prestakuntza eta trebakuntza eskaintzeaz arduratzen den entitatea.
Ihobe sozietate publikoak jardungo du proiektuaren idazkaritza teknikoan, Industria, Trantsizio Energetiko eta Jasangarritasun Saila proiektuaren buru dela, Eusko Jaurlaritzako Ogasun eta Finantza Sailarekin eta Lehendakaritza Sailarekin lankidetzan.
Ekimenak kanpoko aholkulari talde bat ere izango du, Confebaskek, Elkargik, MONDRAGON Corporationek eta Eusko Ganberek osatua.
“BasquESG ekimena Euskadiko ETE industrialek jasangarritasunean eta lehiakortasunean jauzi kualitatiboa eman dezaten diseinatuta dago. Horrela, Europatik iristen diren exijentziei aurrea hartu ahal izango diete eta, horri esker, lehiakortasunerako funtsezko abantaila lortuko dute etorkizuneko industria-merkatu jasangarria gidatzeko”, azpimarratu du Jauregi sailburuak proiektuaren aurkezpen publikoan.
Omnibus paketea eta ESG
Europako Batzordearen Omnibus paketea Europar Batasunak otsailaren 26an aurkeztutako lege-aldaketen multzo bat da, eta enpresentzako jasangarritasun-araudia sinplifikatzea du helburu.
Pakete honek lotura estua du ESGarekin. Izan ere, pakete honen eraginpean dagoen Europako zuzentarauetako bat Enpresa Jasangarritasuneko Informazioari buruzko Zuzentaraua da, CSRD izenekoa, eta horrek ESG informazioa (soziala, ingurumen portaerakoa eta gobernu onekoa) modu estandarizatu eta egiaztatuan hedatzera behartzen ditu enpresak.
Euskal ETEentzako aukera
Testuinguru horretan, Eusko Jaurlaritzak aurrea hartu nahi izan du industria-sareari laguntzeko, bezeroen eta bankuen exijentziei erantzun erraza eta estandarizatua emango dien tresna bat eskainita. Horrela, BasquESG ekimenak aukera emango die ETEei modu erraz eta homogeneoan betetzeko enpresa handiek eta finantza-entitateek eskatzen dizkieten jasangarritasun-baldintzak, bikoiztasunak saihestuta eta dokumentuen kudeaketa sinplifikatuta.
Finantzaketarako eta merkatu berrietarako sarbidea hobetzen ere lagunduko du. Europako araudiarekin bat datozen jasangarritasun-txosten errekonozituak izateari esker, euskal ETEek beren erakargarritasuna handituko dute inbertitzaile eta bankuentzat, eta kredituak, laguntzak eta lizitazioak errazago eskuratuko dituzte. Era berean, BasquESG ekimena bere egiten duten ETEak hobeto kokatuta egongo dira enpresa traktore handien lehentasunezko hornitzaile izateko. Horri esker, merkataritza-harremanak sendotu eta negozio-aukerak zabalduko dituzte.
”BasquESG ekimenean parte hartzen duten euskal ETEek aurrea hartuko diete merkatuaren etorkizuneko erregulazio eta eskaerei, eta benetako konpromisoa erakutsiko dute jasangarritasunarekin, lehiakideen aurrean nabarmentzeko. BasquESG proiektuak helburu du, jasangarritasuna ez ezik, industria-sarearen lehiakortasuna ere bultzatzea”, esanez amaitu du Jauregik.
