Milaka teknologia zale bilduko dira BECen, Euskal Encounter topaketan, sektore digitalaren hitzordu handienean

• • Interesa duten pertsona guztientzako prestakuntza-eskaintza handia izango da: adimen artifizialaren erronkak, sektore teknologikoetako lan-aukerak, ziberindarkeria, hezkuntzarako tresna digitalak eta zibersegurtasuna izango dira hizpide, besteak beste.
  • 33. edizioaren babesle dira Euskaltel Fundazioa, Eusko Jaurlaritza SPRIren bidez, Bizkaiko Foru Aldundia eta BBK Fundazioa, Euskaltelen laguntzarekin. 

  Euskal Encounterrek hedapen teknologiko ikusgarria erakutsiko du, beste behin ere, Barakaldoko BECen. Estatuko LAN party handiena eta Europako garrantzitsuenetarikoa den honek 4.000 ordenagailu baino gehiago, dozenaka kilometro kable eta standak eta milaka zale bilduko ditu, informatikaz, teknologia berriez, berrikuntzaz eta kultura digitalaz giro paregabean gozatzeko.

  
  Euskaltel Fundazioak, Eusko Jaurlaritzak (SPRI taldearen bidez), Bizkaiko Foru Aldundiak eta BBK Fundazioak babesten dute ekitaldia, eta Euskaltelen laguntza du. 33. edizioak abangoardia teknologikoaren eta konpromiso sozialaren aldeko apustua egingo du, eta Euskaltelek eskainitako segundoko 60 gigabiteko Interneterako konexioa izango du, baita prestakuntza, entretenimendua eta networkinga uztartzen dituzten 200 jarduera baino gehiago ere. Gainera, Opengune eremu irekiak dozenaka hitzaldi, tailer eta erakusketa hartuko ditu hainbat gairen inguruan: 3D inprimaketa, bideojokoak, hezkuntza-teknologiak, ekimen solidarioak eta abar. Unibertso digitalaren barruan ikasteko, partekatzeko eta hazteko ezinbesteko topagunea.

  Aurten, adimen artifiziala izango da ardatz nagusia, eta gai hauek ere jorratuko dira, besteak beste: programazioa, ikerketarako eta irakaskuntzarako tresna digitalak, ziberindarkeriak, bideojokoen industria eta zibersegurtasuna. Javier Gómez-Arrue Euskal Encounterreko antolatzaile nagusiak adierazi duenez, “topaketak komunitate berezia sortu nahi du, konbentzioetatik haratago pentsatzen duten pertsonekin, teknologia aplikatzen dutenekin, ezagutza sormenarekin lotzen dutenekin eta datuak eragin sozialarekin konektatzen dituztenekin. Gure helburua da parte-hartzaileek informatikaren muga berriak aztertzea, lankidetza-proiektuak sortzea eta berrikuntza-ekosistemaz elikatzea, ez soilik bilkura honetan baizik eta baita aurrerantzean ere”.

  
  Halaber, ekimenaren arduradunak antolakuntza-taldeko kideen lana nabarmendu du. “70 boluntario baino gehiago ditugu, eta euren dedikazioari eta profesionaltasunari esker erreferentziazko topaketa izaten jarraitzen dugu”, adierazi du.

  Nerea Enbeita Euskaltel Fundazioko zuzendariak adierazi duenez, fundazioaren 25 urteetan “Euskadi konektatuago, prestatuago, berritzaileago eta berdinzaleago baten alde” lan egin dute. “Mende laurden honetan zehar, Euskal Encounter ekimen eraldatzaileenetako bat izan da, 66 milioi euroko inpaktu sozioekonomikoa ekarri baitu. Emaitza hori gure apustuaren isla da: teknologia gizarteari hurbildu, bokazio teknologikoak sortu eta ezagutzaren trukea, berrikuntza eta talentua sustatu nahi ditugu, baita ekintzailetza bultzatu ere”.

  Joseba Mariezkurrena Bizkaiko Foru Aldundiko Ekintzailetza, Talentu eta Enpresa Lehiakortasuneko zuzendariak ziurtatu duenez, “Barrixe Behatokiaren azken digitalizazio-txostenaren datuen arabera, Bizkaiko enpresen % 90k eraldaketa digitalari ekin dio, % 70k aukera gisa ikusten du, baina ia erdiak zailtasunak ditu profil teknologikoak kontratatzeko. Horregatik, Euskal Encounter bezalako ekimenak beharrezkoak dira”.

  Parte-hartzaileak eta bisitariak bilduko dituen Openguneak egunero 2.000 pertsona inguru hartzea espero dute antolatzaileek. Bertan, 50 prestakuntza-jarduera baino gehiago izango dira, eta horien artean daude SPRIk antolatutakoak enpresen formakuntza sustatzeko egungo gai berritzaileenen inguruan: adimen artifiziala, zibersegurtasuna edo bideojokoak, besteren artean. Elixabete Garcia Eusko Jaurlaritzako Eraldaketa Digitaleko zuzendariak adierazi duenez, “argi dugu adimen artifiziala, zibersegurtasuna, 3D edukien sorkuntza eta bideojokoak etorkizuneko sektore industrialak direla, enplegua eta garapen ekonomikoa sortzen baitute. Euskal Encounter ez da aisialdirako gunea soilik, esparru horietan ezagutza-trukea eta berrikuntza sustatzeko aukera ere eskaintzen du. Horregatik, 33. edizio honetan, parte-hartzaile guztiei irekitako sei prestakuntza-arlo izango ditugu, SPRI taldearen Enpresa Digitala programen bidez, Eusko Jaurlaritzak informatika eta teknologia bultzatzeko duen konpromisoaren isla”.

  Partyaren atalak

  
  Euskal Encounterrek ohiko arloak landuko ditu: sormen digitala, hardwarea, software librea, bideojokoak eta aisialdirako jarduerak. Parte-hartzaileek beren talentua probatzeko aukera izango dute arte digitaleko hogei bat lehiaketatan. Gainera, 50 bideojoko-lehiaketa baino gehiago eta software libreko erronka espezifikoak izango dira. Azken horietan, programazioko eta informatikako adituek proba ugari gaindituko beharko dituzte hainbat arlotan: hacking etikoa, kriptografia, logika, puzzleak eta alderantzizko ingeniaritza.

  
  Streaming guneak leku nabarmena izango du partyaren edizio berri honetan. Atal hau edukien sortzaileentzako espazioa da, alor dinamikoenetarikoa; eta ekosistema digitalaren barruan hazkunde betean dagoen sektore honi ikusgarritasuna emango dio.

  Euskal Encounterreko ateak zabalik egongo dira topaketaren giroa ezagutu eta kultura digitalean murgildu nahiz eta teknologia berrien inguruan ikasi nahi dutenentzat. Horregatik, Javier Gómez-Arruek BECera hurbiltzeko gonbita egin die herritarrei, Openguneak adin eta ezagutza-maila guztientzako eskainiko duen jarduera-programa zabalaz goza dezaten.