Digitalizazioa eta pentsamendu kritikoa: honela bizi izan da CodeOKen 1. edizioa Euskadiko ikasgeletan
Ekimenari amaiera bikaina eman diote ostegun honetan programazioari eta pentsamendu konputazionalari buruzko Euskadiko lehen hackathon ekimenarekin. Hala, Bigarren Hezkuntzako 200 ikasle inguru bildu dira Bizkaia Aretoan. Bertan, talde finalistek ikasturtean zehar eskuratutako konpetentziak proban jarri dituzte, erronkak denbora errealean ebatziz. Proiektu honen bidez, Eusko Jaurlaritzako Hezkuntza Sailak eta GAIA Klusterrak ikasleen artean STEM bokazioak sustatu eta arlo horietan emakumeen presentzia handitu nahi du.
Ikasturte honetan, 280 ikastetxek (Arabako 41, Bizkaiko 145 eta Gipuzkoako 94) eta 12 eta 16 urte bitarteko 4.995 ikaslek parte hartu dute CodeOK ekimenean, eta 224 irakasle inplikatu dira. Helburua hezkuntza-plataforma digital bat txertatzea da, zeina berariaz diseinatuta baitago ikasleen artean pentsamendu konputazionala eta gaitasun digital giltzarriak txiki-txikitatik garatzeko.
GAIAk jakinarazi duenez, proposamen pedagogikoa gamifikazioaren, erronkak ebaztearen eta aurkikuntza bidezko ikaskuntzaren konbinazio eraginkor batean oinarritzen da, eta “teknologia emergenteak txertatzen ditu eskola-ingurunean, modu irisgarri, ludiko eta eraginkorrean”. Izan ere, eta programazioan oinarritutako beste ikuspegi batzuek ez bezala, pentsatzeko modu berri bat sustatzen du: arauzoei modu logikoan, egituratuan eta datuetan oinarrituta heltzeko pentsamolde estrategiko bat.
Hau da: “Plataformaren bidez, programatzen ikasteaz gain, ikasleek pentsamendu konputazionalarekin loturiko trebetasunak eskuratzen dituzte, hala nola analisia, sintesia, abstrakzioa eta ebaluazioa; mundu digitalean moldatzeko funtsezko gaitasunak”. 2024-2025 ikasturtean, parte hartu duten ikasleek 612.000 ariketa baino gehiago egin dituzte eta 11.300 ordu eman dituzte. Proiektuak izandako erantzuna eta lortutako emaitzak ikusita, Hezkuntza Saila eta GAIA edizio berri bat antolatzen ari dira datorren ikasturterako.
GAIAtik, CodeOK proiektuaren arduradun Judit Iriondok honako hau azpimarratu du: “Pentsamendu konputazionalak eta programazio-lengoaiak ikasteak aukera emango die gazteei aro digitalean hobeto integratzeko eta lan-aukera gehiago izateko; edo, bestela esanda, pentsamendu konputazionala zeharkako gaitasun bat da egungo eta etorkizuneko profesional guztientzat”.
Gaurko topaketan hackathoiaren azken fasea egin da, eta zazpi gela finalistak (190 ikasle) parte hartu dute. Ikasleak 4-5 kideko taldetan antolatu dira, eta erronkak gainditu dituzte bi programazio-kategoriatan (Toy Script eta Java Script).
Ekitaldi publikoa
CodeOK proiektuaren amaiera dela eta, beste ekitaldi publiko hau ere egin da Bizkaia Aretoan:
“Hezkuntzako gaitasunak garatzea”, Aitor Uriondo Eusko Jaurlaritzako Hezkuntza Saileko Ikaskuntza eta Berrikuntza zuzendariak inauguratua.
Ekitaldian 300 pertsonak parte hartu dute, eta hezkuntzaren arloa digitalizatzeko “jardunbide egokiak” aurkeztu dira, hala nola CodeOK proiektua bera eta IBILBIDEAK eta SPOOCak proiektuak.
Era berean, ondorengo solasaldi batean, gaitasun digitalak txikitatik garatzearen garrantzia nabarmendu da, eta haur eta gazteengan pentsamendu konputazionala ezartzeari buruzko erronkak eta ikaskuntzak aztertu dira.
Sariak
Amaieran, lehenengo 3 sariak banatu dira bi kategorietan. Toy Script kategorian: Irabazlea: Eskolabarri Ikastetxea (Ermua), Bigarren saria: Lizardi BHI (Zarautz), Hirugarren saria: Bermeo BHI. Java Script kategorian:Irabazlea: Egiluze Ikastetxea (Errenteria), Bigarren saria: Markinako Bera Kruz, Hirugarren saria: Gernikako San Fidel ikastola.
