ApplAI 2025 Kongresuak Adimen Artifizial Aplikatuaren erreferente gisa finkatu du Euskadi nazioartean
ApplAI 2025 Kongresuak argi utzi du Adimen Artifiziala ez dela etorkizuneko promesa bat, benetako inpaktua duen erreminta eraldatzaile bat baizik. Bigarren edizioa egin da Euskalduna Bilbao Jauregian, eta Basque Artificial Intelligence Center (BAIC) erakundeak antolatu du. Kongresuan 230 erakunde baino gehiagoko 500 lagun bildu dira. Enpresek, administrazio publikoek, unibertsitateek, zentro teknologikoek eta startupek dagoeneko inpaktua sortzen ari diren esperientziak eta benetako irtenbideak partekatu dituzte.
Ekitaldiak AAren euskal ekosistemaren sendotasuna nabarmendu du; ekosistema hori agente ezberdinen arteko lankidetzaren eta garapen teknologikoa helburuarekin bultzatzeko konpromiso partekatuaren gainean eraiki da. BAICek komunitate dinamiko hori indartzen duen koordinazio-eredua sustatzen du, Euskadin AA modu arduratsuan eta eraginkorrean ezartzeko bidean prestatua. ApplAI ekintza-eredu horren erakusketa praktikoa izan da.
Kongresuan zehar, AAn erreferenteak diren 25 hizlari baino gehiagoren bitartez, AA sendo eta iraunkorra izateko funtsezko osagaiak jorratu zituzten: etika eta araudia eta datuaren estrategiatik talentuaren prestakuntza, kultura aldaketa, iraunkortasuna eta azpiegitura teknologikora bitarte. Hori guztia ikuspegi partekatu baten barruan; hau da, industriarentzat, zerbitzu publikoentzat eta herritarrentzat benetako balioa sortu duen AA batean aurrera egitea.
Eraldaketarako gakoak
Jardunaldian zehar, ikaskuntza praktikoak eta benetako esperientziak partekatu ziren Adimen Artifiziala modu eraginkorrean hartzearen eta ezartzearen inguruan. Besteak beste, honako hauek bezalako oinarrizko alderdiak jorratu zituzten: AAren integrazio eraginkorra lehendik dauden prozesuetan, talentu espezializatuaren garrantzi estrategikoa, datuen kudeaketa eta kalitatea nahiz horien erabilerari lotutako erronka etikoak eta Euskadin enpresen eta gizartearen lehiakortasuna hobetzeko aukerak. Nazioarteko hizlariek arlo akademikoaren, enpresarialaren eta gobernukoaren arteko lankidetza azpimarratu zuten, Adimen Artifiziala produktuetan, zerbitzuetan eta prozesuetan jada eragin nabarmena izaten ari dela erakustearekin batera.
Jaione Ganzarain Eusko Jaurlaritzako Teknologia, Berrikuntza eta Eraldaketa Digitaleko sailburuordeak inaugurazioan nabarmendu duenez, “adimen artifiziala ez da gorabidean dagoen teknologia bat soilik, aurrekaririk gabeko industria-iraultza baten motorra da. Euskadin, gure industrian IAren hedapena gidatu nahi dugu, lehiakortasuna areagotzeko helburuarekin. Gure abiapuntua oso ona da: dagoeneko 7.500 profesional baino gehiago ari gara lanean adimen artifizialaren hainbat arlotan, baita 1.300 profesional ikertzaile ere 90 lantaldetan. IA ezarri duten enpresen % 70 industria- eta teknologia-arlokoak dira, eta lehen mailako euskal konpainiak arlo horretako proiektuak garatzen ari dira dagoeneko”.
“ApplAI kongresuak erakutsi du agente guztien arteko lankidetza funtsezkoa dela Adimen Artifizial aplikatua, arduratsua eta partekatua lortzeko bidean aurrera egiteko. Euskadik ekosistema kohesionatua eta konprometitua du, nazioartean ondo kokatua eta teknologia horrek aurkezten dituen erronkei erantzun kolektiboak emateko gai dena”, adierazi du BAICeko zuzendari nagusia den Laura Marronek.
Nobedade gisa, ApplAI 2025 Kongresuak ekitaldia online publikoarengana ere hurbildu du ApplAI OnAIr-ekin; hau da, Iñaki Leturiak eta Bego Zubiak (Elhuyar) gidatutako bideo-podcasta, zuzenean eman baititu elkarrizketak, eztabaidak eta eguneko berri garrantzitsuenen laburpenak.
Euskadin AA jada abian da
ApplAI 2025 Kongresuak berretsi du AA dagoeneko Euskadiko orainaren parte dela. Etorkizuna imajinatzeaz haratago, Kongresuak gaur egun eraikitzen ari direnak bildu ditu, esperientziak, erronkak eta emaitzak partekatuz, eragin handiagoarekin aurrera egiteko.
“Zer etorriko den imajinatzea baino gehiago, ApplAI Kongresuak balio izan du jada zer gertatzen ari den eta inpaktu handiagoarekin nola egin ulertzeko”, nabarmendu du Arrate Jauregibeitiak, BAICeko Estrategia zuzendariak.
Programa osatzeko, mahai-inguruak eta networking espazioak egin ziren, eta ideiak trukatzea eta aliantza berriak sortzea sustatu zuten.
ApplAI 2025 Kongresuak Eusko Jaurlaritzaren, SPRIren eta Bizkaiko, Gipuzkoako eta Arabako Foru Aldundien laguntza instituzionala izan du. Gainera, Urrea modalitatean babestu duten 14 erakunderen laguntzari esker egin ahal izan da: Bilbomática, CYC, Entelgy, Euskaltel Fundazioa, Eustat, Ikerlan, Laboral Kutxa, LKS Next, NWorld, Orai, Petronor, Seidor, Versia eta Vicomtech. Zilarra modalitatean, berriz, beste lau izan dira: Datua (Teknei Taldea), Lantek, Satlantis eta Tekniker.
