Nazioarteko startupek euskal industriarekin konektatu dira BIEMHn, Eusko Jaurlaritzaren BIND ekimenaren bitartez
Martxoaren 4an eta 5ean, Eusko Jaurlaritzaren berrikuntza irekiko plataforma den BINDen 10. edizioan parte hartu duten startupak izan dira BIEMHen 33. edizioan, Euskadiko industria- eta teknologia-sarea zuzenean ezagutzeko.
BIEMH fabrikazio aurreratuaren nazioarteko topaketa nagusietako bat da, eta talentu teknologiko globalaren eta euskal enpresaren arteko lotura estrategikoko gune bihurtu da. Startup horiek azokaren esparruan egoteak indartu egiten du Euskadik industria-berrikuntzarako helmuga gisa eta proiektu teknologiko aplikatuak garatzeko ingurune egoki gisa nazioartean duen erakargarritasuna.
Nazioarteko talentua euskal industriarekin konektatu da
BINDen startupak robotika aurreratuan, industria-prozesuetan aplikatutako adimen artifizialean, energy tech-ean, digitalizazioan eta fabrikazio aurreraturako funtsezkoak diren beste teknologia batzuetan espezializatuta daude, eta hainbat autonomia-erkidegotatik eta hainbat herrialdetatik (hala nola Alemaniatik, Erresuma Batutik, Frantziatik eta Mexikotik) iritsi dira Euskadira.
BIEMHn izan diren aldian, bilerak eta bisita estrategikoak egin dituzte klusterrekin (hala nola AFMrekin), teknologia-zentroekin (hala nola Tecnaliarekin) eta erreferentziazko industria-konpainiekin (hala nola Geminis, Zayer, CMI Durango, Fresmak, Dimeco, Smartlog, DanobatGroup, Ingeteam, Korta eta Loire Gestamp-ekin). Ibilbide horri esker, berrikuntzako, produkzioko eta negozio-garapeneko arduradunei beren soluzioak aurkeztu ahal izan dizkiete, eta produkzio-prozesuak, erronka teknologikoak eta euskal industriarekin lankidetzan aritzeko aukera errealak ezagutu ahal izan dituzte hurbiletik.
BINDen 10 edizio arrakastatsu
BIND industria adimendunaren berrikuntza irekiko plataforma publiko-pribatu bat da, Industria, Trantsizio Energetiko eta Jasangarritasun Sailak SPRI Taldearen bitartez sortua. Honako helburu hauek ditu: euskal industriaren efizientzia, lehiakortasuna eta jasangarritasuna bultzatzea, startupen garapena bizkortzea eta Euskadi ekintzailetza aurreratuko hub gisa kokatzea.
2016an jarduera hasi zuenetik, 270 startup baino gehiago bizkortu dira eta 400 proiektu baino gehiago garatu dira, 9,6 milioi euroko fakturazioa gaindituta. Era berean, plataforma erreferente gisa kokatu da sektorean, industriaren digitalizazioari eta lurraldeko enpresa-sareari emandako laguntzagatik.
Otsailean, BINDen azelerazio-programaren 10. edizioko startup parte-hartzaileen berri eman zen. Startup horiek berrikuntza irekiko proiektuak garatuko dituzte euskal korporazio eta ETEekin. 10. edizioan garatutako proiektuen emaitzak uztailaren 2an aurkeztuko dira BIND Demo Day ekitaldian. Ekitaldi hori Bilbao Exhibition Centren (BEC) egingo da, eta zabalik dago jende guztiarentzat.
