Sprik Euskadi Agenda 2030 sarietako “Bidean” aintzatespena lortu du
SPRIk, Eusko Jaurlaritzako Industria, Trantsizio Energetiko eta Jasangarritasun Sailaren Enpresen Garapenerako Agentziak, Euskadi Agenda 2030 Sarietako Bidean aintzatespena lortu du. Sari horiek Lehendakaritzako Komunikazio eta Berrikuntza Sozialaren Idazkaritza Nagusiko Berrikuntza Sozialaren eta 2030 Agendaren Zuzendaritzak sustatzen ditu, eta horien xedea da GJHak kudeaketan txertatzearen garrantziari buruz dibulgatzea eta garrantzi hori azpimarratzea, lehiakortasun jasangarriko elementu gisa, bai eta erakundeen benetako konpromisoa lortzea ere.
SPRI erakundearen kudeaketa-sistema bat dator kudeaketa aurreratuaren printzipioekin. Hori dela eta, aspalditik lan egiten da alderdi hauek modu orekatuan asetzeko: interes-talde guztiak, gizartean duen inpaktu positiboa eta ingurumenaren zaintza, erakundeko pertsonentzako arreta, berrikuntza, emaitzen neurketa… Horrenbestez, GJHak lantzea aurretik egindako guztiaren jarraipena besterik ez da, ekindako bidearekiko koherentziari eusten diona. Azpimarratzekoa da GJHetan inpaktuek duten alderdi bikoitza: erakundearen barruan eta kanpoko esparruan, non enpresak eraldatzeko gaitasuna baitute (industria, gehiago, industria hobea, emisio gutxiago); izan ere, horrek koherentzia erakusten du. Hori guztia baieztatu egin zen urtarrilaren 27an egindako kanpo-egiaztapenean, eta horrek ekarri du, hain zuzen ere, bitarteko aintzatespen hau eskuratzea.
Tamaina eta jarduera-sektore guztietako 102 erakundek jasoko dituzte 2030 Euskadi Agenda Sariaren aintzatespenak bihar, apirilak 29, Bilboko Euskalduna Jauregian.
Bi helburu dituzte aintzatespen horiek:
- Erakunde aurreratuenak identifikatzea, GJHei lotutako kudeaketa-jardunbide egokiak pizgarri eta erreferentzia izan daitezen beste batzuentzat.
- Erakunde horiek egindako ahalegina eta lortu duten GJHen aurrerapen- eta ekarpen-maila publikoki aitortzea.
Aintzatespen horiek lortzeak aurrerapen maila eta emaitza jakin batzuk lortu izanaren froga ematen dio erakunde bati. Horretarako, EUSKALIT Fundazioak ebaluaziorako online plataforma bat garatu du, eta erakunde eta enpresei kanpo-kontrasterako zerbitzua ematen die, GJHak kudeaketan txertatzeko Markoa erreferente hartuta.
Kanpo-kontrastea erakundeko zuzendaritza-taldearen eta EUSKALITeko GJH Ebaluazio Klubeko pertsonen arteko bilera bat da. Pertsona horiek kudeaketa aurreratuan eta jasangarritasunean adituak dira, eta erakundeari bere egoera ezagutzen eta arlo horretako erronka nagusiak identifikatzen lagunduko dion kanpo-ikuspegi bat ematea dute helburu.
Euskadi 2030 Agenda Sariaren mailak
Autoebaluazio osoa online plataforman egiten duten erakundeek Konpromisoa oinarrizko mailaren aitorpena jaso ahal izango dute.
Gainera, kanpo kontrastea jaso ostean, ezarritako gutxieneko baldintzak betetzen dituzten erakunde guztiek, Bidean aintzatespena eskuratu ahal izango dute.
Gainera, kanpoko kontrastean erakundeak maila jakin bat gainditzen badu, Aurreratua maila lortzen dute. Aurreko edizioan Aurreratua lortu zutenek, aurten beren jardunbide egokietako bat aitortzeko aukera izan dute eta aurten Jardunbide Egokiak saria lortu dute.
Bigarren edizio honetan, 2030 Agenda Sarian, Eraldatu ekimenaren Eragin aintzatespenak batu dira. Ekimen hori Antonio Aranzábal Fundazioak, Artizarra Fundazioak, Deusto Business Schoolek, Rural Kutxa Gizarte Ekintzak eta Sinnplek bultzatutako Euskadiko gizarte-eragineko eragileen topagunea da.
Enpresen eta erakundeen kudeaketan GJHak sartzeko Markoa
2030 Agendarekiko eta Garapen Jasangarriko Helburuekiko (GJH) konpromisoaren bidez garapen jasangarriaren alde egin nahi duen edozein erakunde motari buruz hausnartzeko, diagnostikoa egiteko eta hobetzeko tresna gisa eskaintzen da marko hori. Erakunde bakoitzak bere egoera, interes eta beharretara egokitu dezakeen lan-tresna da.
Helburua da erakunde baten kudeaketa-sistemak GJHekin duen lerrokatze-maila aztertu ahal izateko metodo bat eskaintzea, garapen jasangarriaren ikuspegitik. Premisa honetatik abiatzen da: Agenda 2030en aldeko apustua ez da erakundearen jarduerarekin zerikusia duten ekintza puntualak eta zeharkakoak egitea, baizik eta hausnarketa egituratua behar da kudeaketaren eremu guztietatik.
GJHei eta Kudeaketa Aurreratuari buruzko ebaluazio-kluba
GJHei eta Kudeaketa Aurreratuari buruzko Ebaluazio Kluba, gaur egun, 100 pertsona inguruk osatzen dute. Pertsona horiek modu altruistan lagundu nahi diete euskal erakundeei arlo horietan, eta, hala, GJHetan eta Kudeaketa Aurreratuan duten ezagutza eta esperientzia handitu eta garatu nahi dute. Guztiek prestakuntza espezifikoa jasotzen dute esparruari buruz eta kanpo-ebaluazio eta -kontrastearen dinamikari buruz, ekimen honetan parte hartu nahi duten erakundeei laguntzeko eta ezagutza hori beren erakundeetara hedatzeko.
