Aleovitro, landare in vitro hazkuntzarako euskal bioteknologia
Desagertzeko arriskuan dauden eta ekosistema naturalen osasunerako eta orekarako balio handia duten landareak berreskuratzen espezializatua, Aleovitro Bizkaiko enpresa bioteknologikoa aditua da errendimendu optimoko landareen eta onddoen kimiotipoak in vitro ebaluatu, hautatu eta landatzen labore eta prozesu industrialetan erabiltzeko.
“Gure zerbitzuak zeharkakoak dira, elikagaien, farmaziako, medikuntzako eta kosmetikako sektoreetatik hasi eta ingurumeneraino baitoaz“, azaldu dute arduradunek.
Enpresa 2014an sortu zen eta Zamudioko Enpresa Zentroan du egoitza. Era guztietako “in vitro” landareak landatzen ditu, industria farmazeutikora edo kosmetikora zuzendutako landare mota berriak ikertzeko, besteak beste. Masen espektrometriaren teknika analitikoa aplikatuz, landareen konposizio kimikoaren datu kopuru izugarriak biltzen ditu eta kimiotipo desberdinak ebaluatzen ditu landare-espezie beraren barruan. “Gure laborategian landare-espezieek eskala pilotuan nola jokatzen duten ezagutzeak asko errazten die gure bezeroei laborantzaren ‘scale-u’p-a eta industria-ekoizpena arrisku teknologiko eta ekonomiko txikiagoarekin jorratzea“, nabarmendu dute konpainiatik.
Ikerketa-ildo nagusietako bat desagertzeko arriskuan dauden landare-espezieak berreskuratzeko funtsezko landareak in vitro landatzea edo ugalketa da. Nekazaritzako elikagaien industriaren kasuan, enpresak aplikatzen duen berrikuntzak aukera ematen du lupulua edo sagarrondoak bezalako espezieen optimizazioa bermatzeko, sagardo lupuludunaren ekoizpenean erabiltzeko, gaitasun bikainak dituzten eliteko barietate autoktonoen hautaketa batekin. “Barietate komertzialen laborantzako izurrite eta gaixotasunen arazoen areagotzeak, eta sagardogileentzat % 100 km0 produktuak sortzeko beharrezkoa den material genetiko autoktonoaren beharrak eraman gaitu proiektu honetan sartzera”, diote.
Proiektu horiekin batera, Aleovitrok Malaria bezalako gaixotasunei aurre egiteko lana ere zuzentzen du, eta, horretarako, ‘The Art of Discovery‘ konpainiarekin kolaboratzen du. Konpainia horrek ‘Medicines for Malaria Venture’ elkarteari ematen dizkio zerbitzuak, eta, besteak beste, Bill & Melinda Gates Fundazioak finantzatzen du, malaria desagerrarazteko helburuarekin botiken ikerketa eta saiakuntzak egiteko. Gaixotasun infekzioso horrek 400.000 heriotza eragiten ditu urtero munduan.
