BDIH Konexioa programak euskal industriaren berrikuntza digitala eta jasangarritasuna sustatzen ditu eta BDIHk eskaintzen duen adituen laguntzarako, aktiboetarako eta zerbitzuetarako sarbidea errazten du
Dirulaguntzak eskatzeko epea abuztuaren 26an hasi eta urriaren 15ean amaituko da.
2020ko lehen ediziotik, BDIH Konexioa dirulaguntzen programak enpresa gehiago erakarri ditu urtetik urtera eta deialdi honetako aurrekontua 950.000 eurokoa izango da. Hala, eskaera guztiei erantzutea espero da. Euskal industriak apustu argia egiten du berrikuntzaren alde eta SPRI Taldeak enpresei laguntzen die Industria Adimendunaren bide horretan.
Prozesu hori sustatzeko, Euskadiko enpresa industrialek 20.000 euro izango dituzte beren proiektuak finantzatzeko, hainbat sektoretan adituak diren aktiboen laguntzarekin. Programa honen helburua argia da: euskal enpresen lehiakortasuna handitzea teknologiaren bidez, produktuak eta ekoizpen-prozesuak hobetu ahal izateko.
BDIH Konexioari esker beraien sektorean nabarmentzen diren enpresak
Enpresa askok diote BDIH Konexioaren dirulaguntzei esker beren produktuetan bilakaera izatea lortu dutela eta merkatu global lehiakorrean indartsu bihurtu direla. Hainbat sektoretako enpresak dira: osasunarekin lotutakoak, medikuntzako ikerketakoak, automobilgintzakoak, diseinu industrialekoak, tresnen fabrikaziokoak, fluxuen ingeniaritzakoak, piezen fabrikaziokoak… Berrikuntzan ibilbide luzea duten enpresak zein urte gutxiko esperientzia duten startupak dira.
HRE Hidraulic-en adibidea da berrikuntzarekiko konpromiso luzea duten enpresetako bat. Enpresa ingeniaritzako proiektuetan dago espezializatuta, industriako fluxuen arloan. Sektore asko hartzen ditu barne eta BDIH Konexioaren laguntzari esker, proiektu bat sustatu ahal izan du mekanizazioko tresnak hozteko hozte kriogenikoa aplikatzeko eta bere bizia luzatzeko.
Waixo enpresak 6 urte daramatza ehunetako inprimatzeen sektorean. Une honetan 50 ehun pertsonalizagarri eskaintzen dituzte gainean inprimatzeko eta BDIH Konexioari esker proiektu bati ekin diote ehun horiei hirugarren dimentsioa emateko 3D inprimagailuarekin. Ziur daude I+G ezinbestekoa dela beraien enpresa-proiektuan.
Bi adibide baino ez dira, baina euskal industriak berrikuntzaren eta lankidetzaren alde egiten duen apustua erakusten dute, horiek baitira garapen teknologiko handiko sektoreetan lehiakortasuna mantentzeko bide nagusiak.
Euskal industriak berrikuntzarekiko duen konpromisoa handitu egin da urtetik urtera
2024ko deialdiak euskal enpresen 124 proiektu bultzatu zituen, milioi bat euro baino gehiagorekin. 2020an lehen deialdia atera zenetik, programa sendotu egin da enpresetan berrikuntza bultzatzeko funtsezko tresnagisa, eta aurten ere aurrekontu esanguratsua du: 950.000 euro.
Azken deialdietan, material aurreratuetan oinarritutako proiektuek parte-hartze handia izan dute, eta interes handieneko esparruetako bat bihurtu dira. Makina adimendunekin eta konektatuekin lotutako ekimenen kopurua ere nabarmen hazi da, eta horrek erakusten du euskal industriak apustu argia egin duela digitalizazioaren eta ekoizpen-prozesuak hobetzearen alde.
BDIH Konexioaren finantzaketa aprobetxatu nahi duzu berrikuntzan jauzi egiteko?
Lehen urratsa da zure enpresak BDIHk ase ditzakeen zer behar teknologiko dituen hautematea.
BDIHk 8 nodo ditu, bere teknologiaren eta gaitasunen bitartez euskal enpresak eraldatzeko:
- Robotika malgua eta kolaboratiboa: automatizazioaren erronkei aurre egiteko esperimentazioa.
- Fabrikazio gehigarria: prozesuaren fase guztietan baliozkotzea.
- Material aurreratuak: funtzio berriak eta lotutako prozesuak igotzea.
- Zibersegurtasuna: probak, operazioen simulazioa eta zibersegurtasuneko entrenamenduak egiteko ingurune errealak.
- Adimen artifiziala: erabakiak automatizatzeko soluzioen baliozkotzea, prozesuen optimizazioa eta datuetatik abiatutako analisi prediktiboa.
- Makina adimendun eta konektatuak: ziurtagiri digitala duten soluzio aurreratuen entsegua.
- Sare elektriko digitalak: trantsizio energetikorako sareen digitalizazioa.
- Gailu medikoak eta osasun digitala: aplikazio eta gailu berriak diagnostikatzeko eta garatzeko digitalizazioa.
Teknologiaren laguntzarekin jauzi garrantzitsua egin dezakezun arloa identifikatutakoan, BDIHren aktiboen bidez teknologia probatu ahal izango duzu inbertitu aurretik. Zure prozesu eta produktuak hobetzeko eskain diezazukeena ezagutu eta egiaztatu dezakezu.
2025eko berrikuntza: sustatu zure proiektua prozesu industrialetara aplikatutako adimen artifizialarekin
Aurtengo deialdiak berrikuntza bat du: ingurune industrialetan eta horiekin lotutako zerbitzuetan adimen artifizialeko soluzioak aplikatzen dituzten proiektuei laguntzea. Horrela, prozesuak optimizatzeko, erabakiak automatizatzeko eta datuen balioa ekoizpen-eredua aldatzeko aprobetxatzeko modu berriak aztertzeko atea irekitzen da.
Proiektu horiek eraginkortasun operatiboa hobetzera, produktuak edo zerbitzuak pertsonalizatzera edo enpresaren gaitasun prediktiboa indartzera bideratu daitezke. Laguntza horri esker, adimen artifizialaren erabilera balioztatu daiteke, kontzeptu-proba baten bidez, eta hasierako ezarpenari lotutako arrisku tekniko eta ekonomikoak murriztu.
Laguntzaile aditu batekin berritzeak dituen abantailak
BDIH Konexioaren bidez proiektuak finantzatu dituzten 400 enpresa baino gehiagoren esperientziak oso desberdinak izan dira, baina ia denek dute zerbait komunean: prozesuei ekiteko hasierako finantzaketaren bultzada izan dute eta BDIHren laguntza integrala jaso dute, bestela ez luke emaitza hori lortuko. Aholkularitza pertsonalizatua izatea eta probak egiteko eta teknologia baliozkotzeko aktiboen azpiegiturak erabiltzeko aukera izatea dira Industria Adimendunaren erronkei aurre egiteko enpresak urrats sendoak egitera bultzatzen dituzten elementuak.
Euskadiko industria-enpresa bat baldin bada zurea, eta jauzi berritzailea egin ahal izateko teknologia digital eta jasangarriak ezagutu, probatu edo garatu nahi badituzu, aprobetxa ezazu BDIH Konexioaren bidez proiektua finantzatzeko aukera eta eska ezazu dirulaguntza urriaren 15a baino lehen.
