Stansol Energy enpresak Estatuko ur gaineko parke fotovoltaiko handiena inauguratu du

Enpresaren fundatzaile eta egungo zuzendari nagusi Fermín Ollora.

Stansol Energy neurrira eginiko egitura fotovoltaikoen eraikuntzan espezializatuta dago

Energia sektoreko Stansol Energy euskal enpresak 2017an ireki zituen bere ateak energia fotovoltaikoko egiturak garatzeko. Zazpi pertsonako lantalde baten laguntzaz, egunero planifikatzen ditu egitura horiek Gasteizko Azucarera eraikinean daukan egoitzan. Enpresaren fundatzaile eta egungo zuzendari nagusi Fermín Ollorak esperientzia zabala du egitura handien sektore industrialean eta ezagutza hori baliatzen du etengabe hazten ari den sektore fotovoltaikoan. Ollorak irmoki defendatzen du sektorea, esanaz “bideragarria” eta “errentagarria” dela industriarentzat.

Zure ustez zein da faktore giltzarria zuen egunerokoan?

Pertseberantzia funtsezko faktorea da sektore guztietan, eta gu ez gara salbuespena. Gainera, gure kasuan, pertseberantziaren emaitzak orain ari dira iristen, azken hilabeteotan denon ahotan ibili diren araudi eta dekretuek bultzada eman dietelako jarduera honetan dabiltzan enpresei, autokontsumoa edo sorkuntza banatua egiten duten erabiltzaileei eta autokontsumora jo duten industriei, eta azken horiek funtsezkoak dira Euskadin.

Beraz, une honetako eszenatokia baikorra da, eguzki-ordu gutxi ditugun arren.

 Egia da Euskadin ez daukagula eguzki-ordu askorik, eta egia da ez daukagula orografia egokirik gure sektorean ohikoagoak diren beste instalazio batzuk jartzeko. Halere, milioika metro koadro dauzkagu industrien teilatuetan, eta gure fabriketako prozesuek behar duten ordu kopurua bat dator daukagun eguzki-ordu kopuruarekin, beraz, posible da ustiapen-kostuak nabarmen jaistea.

Zure ustez nola konpentsatu behar litzateke eguzki-ordu falta hori,  indarrak orekatu eta lehiakor izaten jarraitzeko?

 Badaukagu Energiaren Euskal Erakundea, errealitate hori primeran ezagutzen duena, zeinak laguntza handiekin osatzen baitu eguzki-ordu falta hori. Horrekin ez dut esan nahi gure sektorea dirulaguntzen menpe dagoenik, ezta gutxiagorik ere. Ikuspuntu pedagogikotik, uste dut garrantzitsua dela sektore fotovoltaikoaz ditugun usteak aldatzea, uste horiek duela hamabi edo hamabost urte zegoen teknologiari buruzkoak direlako. Gaur egungo eredua desberdina da guztiz: teknologia hobea eta askoz lehiakorragoa da, eta ez dago laguntza edo dirulaguntzen menpe; orain laguntzek beste funtzio bat dute, hau da, gizarteak geldiezina den sektore honekiko duen gogoa akuilatzea eta sustatzea.

Zer egiten duzue Stansol Energy-n?

Lurrari, egiturari, geometriari eta haizeari buruz dakigun guztia integratu dugu sektore fotovoltaikorako konponbide desberdinetan. Zergatik behar dira konponbide desberdinak? Konponbide mota bat beste bat baino aproposagoa delako bezero bakoitzaren premien arabera. Ohituta gaude teilatuetako konponbideak ikusten, baita ere errepide ertzetako parkeak, batzuk ardatz finkokoak eta beste batzuk eguzkiari jarraitzen diotenak, hau da, xaflak biratuz eguzkiaren argira egokitzen direnak… Baina guretzat hori ez da nahikoa. Uste dugu egunero ahalegindu behar dugula fotovoltaika inplementatzen ikuspegi sozial batetik, horregatik, bestelako konponbideak ere sortu ditugu, esaterako, markesina fotovoltaikoak edo ibilgailu elektrikoak birkargatzeko panelak… Teknologia horiek dagoeneko hemen daude, orain sistema berriak sozializatu behar dira abegikor izan daitezen, funtzionalak izateaz harago.

Helburu horrekin, zuen sektorean aitzindari den ur gaineko parke fotovoltaiko bat garatu eta patentatu duzue. Noiz jarriko duzue martxan?

Patentatu dugun sistema bakarra da munduan, eta berari esker eguzki-panelak instalatu ditzakegu urtegietan edo ureztapen-putzuetan, oreka maila oso altuekin eta emaitza bikainekin. Zentzu horretan, datorren apirilean hasiko gara gure teknologia erabiliko duen munduko lehen ur gaineko parkea instalatzen Caceresen. Oso proiektu konplexua izango da, munduan bakarra den konfigurazioa izango duelako. 3.000 eguzki-panel inguru instalatuko ditugu Sierra Bravako urtegian (Caceres) 1,17 MW inguruko potentziarekin (7.000 etxek urtebetean egiten duten kontsumoa). Sekulako lana izan da hori guztia prestatzea. Garatu ditugun proiektu guztietatik, hauxe da zailtasun teknologiko handienak planteatu dizkiguna, baina oso ongi laburbiltzen du gure enpresaren izatea: ez gara produktuen portfolioan oinarritua dagoen katalogoko konpainia bat, baizik eta bezeroaren premiei entzuten dien enpresa bat, saiatzen dena konponbide egokiena ematen kualitatiboki eta kuantitatiboki.

Zein da zuen enpresaren balio bereizgarria?

Bi aipatuko nituzke: erabiltzen ditugun ingeniaritza-prozesuak, eta metalezko eraikuntza-proiektu handien zuzendaritzan dugun esperientzia zabala, bai Estatuan eta bai nazioarteko merkatuetan.

Kontuan izanik duela hamar urte burbuila fotovoltaikoa lehertu zela, zergatik uste duzu orain bizi dugun errealitate hau geratzeko etorri dela?

Oraingo produkzio fotovoltaikoaren kostuak ez daukalako zerikusirik ordukoarekin. Gaur egun, produkzio-kostuak duela hamar urte baino zortzi aldiz merkeagoak dira gutxi gorabehera. Bestalde, panel fotovoltaikoen kostua ere txikiagoa da, eta prezioak asko jaitsi dira, sistema fotovoltaiko baten parte diren balio-kateko osagai guztienak bezalaxe. Eta, hirugarrenik, gaur egun badago segurtasun juridiko bat, Estatuko eta Europako araudiek markatzen dutena. Munduak, Europak eta Euskadik 2050erainoko epea daukagu klima aldaketaren aurkako borrokan helburu batzuk (urte horretarako erregai fosilik ez kontsumitzea, besteak beste) erdiesteko, eta ziztu bizian egokitu behar dugu egoera horretara.

Duela gutxira arte, energia-sorkuntza multinazional gutxi batzuen esku zegoen, baina duela denbora batetik hona, badirudi “demokratizatu” egin dela, bai erabiltzaileentzat eta bai enpresentzat…

Hala da bai, egia da. Une honetan, edozein herritarrek edo edozein enpresak instala dezake autokontsumorako behar duen potentzia.  Eta horrek badu irakurketa positibo bat: sektorean jaun eta jabe ziren energia arloko enpresa handiek ulertu dute atzera bueltarik gabeko bidea ibiltzen ari garela, eta horregatik, paper proaktiboa hartu dute fotovoltaikarekin lotutako proiektuen sorkuntzan. Azken urteotan hainbat zailtasun gainditu behar izan dira, baina erregelamendu eta araudiek bide berri hori markatu dute, eta enpresak benetan modu proaktiboan jokatzen ari dira. Eta ez bakarrik energia-enpresa tradizionalak, baita ere erregai fosilen sektoretik datozen konpainiak, dagoeneko berrasmatuta edo horretarako bidean daudenak.

Lehia gehiago, beraz. Hori hobea da erabiltzailearentzat?

Esango nuke hobea dela denontzat. Lehiak hobetu egiten gaitu, eta horrek eragina du azken erabiltzailearengan, izan industria bat edo izan erabiltzaile partikular bat.

Stansol Energy enpresak lau urte bete ditu. Nahi zenuten tokian zaudete une honetan?

Horretan, ez dago asmatzerik. Baina, oro har, ongi goaz, ibilbide-orriari jarraitu diogu, eta finkatu genituen helburuak betetzen ari gara. Ikusten ari naizena da inoiz pentsatu gabeko ildo paraleloak irekitzen ari direla, eta horrek esan nahi du, epe laburrean, osagarri garrantzitsua izango direla gure enpresarentzat.

Lotutako albisteak

15 apirila, 2024 Berrikuntza

Gymchess: “Entrenamendu kognitiboa da gure garuna zaintzeko modu eraginkorrena”

Irakurri gehiago

25 Marzo, 2024 Berrikuntza

“Euskararen aldeko apostua ez da bakarrik emozionala, praktikoa ere bada, enpresari balioa ematen diona” Ion Etxeberria, IKERLAN

Irakurri gehiago

19 Marzo, 2024 Berrikuntza

Sirope: “Brandingaren garrantzia bereganatu ez duten enpresak desabantaila-posizio batetik abiatzen dira”

Irakurri gehiago

11 Marzo, 2024 Berrikuntza

Altzairu herdoilgarria da Didheyaren etxebizitzetarako eta garraio publikorako osagarrien balio bereizgarria

Irakurri gehiago

4 Marzo, 2024 Berrikuntza

Kupsak hogei bat herrialdetara saltzen ditu modu erregularrean bere berniz eta pintura industrialak

Irakurri gehiago

Joan blog-era