Koreako Jeollanam-do probintziak Euskadi bisitatu du itsas energia eolikoan eta trantsizio energetikoan aukerak aztertzeko
Jeollanam-doko (Hego Korea) Gobernu Probintzialeko ordezkaritza bat Euskadin izan da aste honetan, eta euskal energia-sektoreko eragileekin lehen harremana izan dute, itsasoko energia eolikoan arreta berezia jarriz.
Zehazki, Basque Trade & Investment (BasqueTrade) SPRI taldearen baitan dagoen euskal enpresa nazioartekotzeko agentziak koordinatutako misioaren helburua Koreako probintziaren beharrak ulertzea eta teknologia eta industria-lankidetzarako aukerak aztertzeaizan da. Helburuen artean egon dira, besteak beste, trantsizio energetikoaren euskal eredua eta haren politika publikoak ezagutzea, offshore energiaren balio-katean funtsezko eragileak identifikatzea eta lurralde testuinguruari aplika dakizkiokeen industria-azpiegiturak aztertzea.
Jeollanam-do probintzia Hego Korea osoan itsas energia eolikoa garatzeko potentzial handiena duen probintzia da, 15 GW aurreikusiz, hau da, estatu osoaren % 55, eta duela gutxi itsas energia eolikoaren lege berri bat onartu da, 2025ean indarrean sartuko dena eta gobernu probintzialaren papera indartzen duena. Hori dela eta, ordezkaritzak interes berezia du offshore-n esperientzia duten euskal enpresekin aliantzak sortzeko eta bere lurraldean aplikagarriak diren trantsizio energetikoko ereduak aztertzeko.
Bisitan, Nagore Bonilla Basque Trade-ko presidenteordeak eta Cristina Oyon SPRI taldeko zuzendariorde nagusiak egin diote harrera delegazioari, eta euskal energia-sektoreko hainbat eragilerekin bilerak egin ahal izan dituzte, besteak beste, Energiaren Euskal Erakundearekin (EEE) eta Euskadiko Energiaren Klusterrarekin.
Ekimenaren baitan, ordezkaritza Bilboko Portuko instalazioetara hurbildu da, eta, bertan, kate logistikoaren karbono-aztarna murrizteko garatzen ari diren proiektuak ezagutu ahal izan ditu, Andima Ormaetxe Bilboko Portuko Agintaritzako Operazio, Merkataritza eta Logistika zuzendariaren eskutik.
Euskadin programatutako agendarekin amaitzeko, delegazioak Saiteceko instalazioak bisitatu ditu, Euskal Autonomia Erkidegoan sarera konektatutako lehen aerosorgailu flotatzailearen proiektua bertatik bertara ezagutzeko asmoz. Aerosorgailu horrek trantsizio energetikorako soluzio berritzaileetan nazioarteko erreferente gisa kokatzen du enpresa, eta Euskadi itsas berriztagarrien munduko mapan kokatzen du.
