Kendu: “Produktua behar duzu bezeroa irabazteko, eta zerbitzua kontserbatzeko”
Kendu donostiarra da, gustuko arropa-denden erakusleihoen aurretik igarotzen dugun bakoitzean, argi, kolore eta soinuzko ikuskizun apartaz gozatzeko gelditu eta, finean, horixe baita helburua, saltokira sartzera bultzatzen gaituen joeraren errudunetako bat. Hari zor diogu, besteak beste, lortu arteko bidea produktua bera bezain garrantzitsua bihurtu duen erosketa-esperientzia berriaren sorrera.
Izan ere, duela ia 20 urtez geroztik, zeregin horretan dihardu nazioarteko bokazio argia duen konpainia gipuzkoar honek, Londres, New York eta Singapurren dituen ordezkaritzen laguntzaz eta Miamin finkatua duen lantegiaren bultzadaz. Kenduk 160 langile ditu eta munduko retail marka nagusien erreferentziazko bazkide teknologikotzat lan egiten du. Álvaro Cabrera zuzendari nagusiak euskal konpainia honek mundura esportatu duen talentu eta teknologia bisualaren berri eman digu.
Zeintzuk dira aipa daitezkeen markak?
Donostian, esaterako, Zara, Mango eta Real Sociedaden dendetan ikus daitezke gure produktuak. Eta munduko beste hiri batzuetan, Adidas, L’Oreal eta Dior aipa ditzakegu, baita Madrilgo Gran Vian bost solairuko saltokia ireki eta retailaren arloko erraldoi berrietako bat bihurtu den Primark ere.
Hortaz, janzten gaituztenak jazten dituzue zuek…
Hala esan liteke, bai… Gure lana, funtsean, jendea erostera joaten den espazio horiek ahalik eta erakargarrienak eta deigarrienak bihurtzea da, gure bezeroentzat ahalik eta errentagarrienak bihurtzeko helburuarekin, noski.
Zure ustez, non dago Kenduren indarra?
Paregabekoak gara. Geurea ez da diseinu-agentzia, retail sektorerako nahiz salmenta-gunerako soluzioak diseinatzen ditugun arren. Geurea ez da kudeaketa-enpresa, baina soluzio integralak eskaintzen ditugu, baita bisualak kudeatzeko tresnak eta retailerrentzako logistika-zerbitzuak ere. Kendu ez da enpresa ekoizlea, baina produktuak ekoizten ditugu geure instalazioetan. Kendu bezero bakoitzari egokitutako 360ºko soluzioak eskaintzen dituen partnerra da, eta horixe da paregabekoak bihurtzen gaituena.
Zuen enpresaren tamaina gorabehera, nolako eragina duzue sektorean, nazioarteko enpresa-talde handiak lahiakida eta bezero dituzuelarik?
Guri gustatzen zaigu esatea tamainaz txikiak garela, baina espirituz handiak. Ia 20 urte daramatzagu retailaren munduari lotuta eta gure lantaldea osatzen duten prestakuntza eta eskarmentu handiko 160tik gora pertsonek grina bizi-bizia dute horren berrikuntza eta eskakizun maila handia duen sektore dinamiko honekin. Hamar hizkuntzatan hitz egiten dugu eta gure soluzioak 130etik gora herrialdetara, 4.500 hiritara eta 20.000 salmenta-gune ingurutara hedatuta daude. Ez da gutxi. Gurekin lan egiten duten markak globalak dira, eta ahalik eta zerbitzurik onena eskaintzeko xedez, nazioarteko bokazio sendoa duen enpresa gara betidanik, izan ere, bulegoak ditugu Londresen, Singapurren, New Yorken eta Chicagon, Donostiako eta Miamiko lantegiez gain. Horri esker, bereizgarri dugun kalitateko arreta eta zerbitzu berbera eskaini ahal diegu Durangoko supermerkatuko bati edo Tokioko Adidas denda bati.
Zer dela eta, izen handiko marka horiek zuen tamaina txikiko ETEan duten konfiantza hori?
Nire ustez, produktuaren berrikuntzaz eta zerbitzuaren kalitateaz fidatzen dira, nagusiki. Guk ahalegin handia egin dugu eta baliabide ugari inbertitu dugu produktuaren berrikuntzan, espazioen diseinuan, euskarrietan edo teknologian, baina azkenean horrek guztiak bezeroa irabazteko baino ez dizu balio. Bezeroa mantentzeko eguneroko zerbitzua eskaini behar diozu. Ez dago bestelako sekreturik. Eta berdin dio bezeroa Euskadikoa nahiz Tokiokoa izateak. Berriro diot: produktuen arloko I+Ga behar duzu bezeroa erakartzeko, baina zerbitzuarekin atxikitzen dituzu.
Denda guztiek berdinak dirudite. Egun, nolakoa izan behar du denda batek erostera gonbidatzeko?
Zuk une horretan nahi duzun horretara egokitzen den denda izan behar du. Bezeroekin daukagun arazoa da oso espazio handiak direla eta horietan oso inbertsio handia egin dutela, azkar-azkar amortizatu beharrekoa. Horregatik, oso espazio moldaerrazak izan behar dute, bezeroen gustuetara egokitzeko modukoak. Izan ere, bezero batzuek bi minutu baino ez dute egin nahi, beste batzuek ordu erdi, zenbaitek norbaiten arreta nahi dute, beste batzuek ez, badira begiratu baino nahi ez dutenak, baita etxetik baino erosten ez dutenak ere… Horixe da gure erronka, eta horregatik garatzen ditugu erraztasun osoz moldatu, aldatu eta kustomiza daitezkeen euskarriak.
Hilabete batzuk baino ez dituzu egin enpresako buru bezala. Non kokatu nahi duzu?
Dendak ez dira jadanik transakzio-gune hutsak, aisialdirako eta entretenimendurako eremuak baizik, eta Kendu hainbat salmenta-gune eta roll-out handitan erreplika daitezkeen espazio eta esperientzia paregabeak diseinatzeko proiektuei zuzendutako soluzioen enpresatzat posizionatu behar dugu. Bezeroekin eskuz esku lanean jarraituko dugu kontsumitzaileek eta kontsumitzaileentzat asmatutako esperientziak eskaintzeko. Eta jakina, berrikuntzaren alde apustuari eutsiko diogu, produktu berriak sortuz eta bezeroen beharrei erantzungo dieten zerbitzu berriak abian jarriz.
Lotutako albisteak
Nexmachinak Gauzen Interneta industriara zabaltzen du
Enpresak IoT soluzio jasangarriagoak eta eskuragarriagoak eskaintzen ditu mota guztietako enpresa eta erakundeentzat
Geinsak 30 herrialdetan baino gehiagotan presente dauden tratamendu-lerro automatizatuak fabrikatzen ditu
Bizkaiko enpresak 50 urte baino gehiago eman ditu sektorean erreferente gisa, eta gaur egun bere merkatuaren %70 inguru nazioartekoa da.
Amazinglers: “Gazteek TikTok bidez lana bilatu eta aurkitu ere egiten dute, eta horretara egokitu behar gara”
Igone Ruiz de Azua arabarrak sortutako startupak gazteak enpleguekin eta praktikekin konektatzen dituen plataforma bat baino askoz gehiago izan nahi du; talentu bila enpresei aholkuak ematen dizkien eta belaunaldi berrien potentzialaren aldeko apustua egiten duen komunitatea.
Alterity, robotika mugikorrarentzat eta mugikortasun elektriko arinarentzat bateriak fabrikatzen dituen enpresa bizkaitarra
Elkarteak SPRI taldearen nazioartekotze-programaren laguntza bat jaso du, eta bezeroak ditu jada Italian, Suitzan eta Herbehereetan
Sariki, metrologian liderra den ETEa: “BIND SMEk zure erronketarako soluzioak dituzten startupekin konektatzen zaitu”
Gipuzkoako ETEak 40 urte beteko ditu 2025ean, eta BIND SMEren, Eusko Jaurlaritzak sustatutako eta startupekin berrikuntza irekian jarduteko programaren, 2. edizioan parte hartu zuen
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
Haizelur, nazioartekotzearen aldeko apustua egiten duen doitasun-mekanizazioaren arloko Debako ETEa
Enpresaren esportazioek SPRI Taldearen zibersegurtasuneko programaren dirulaguntza jaso dute eta negozioaren % 35era iritsi dira dagoeneko
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
Diseinua, estrategia eta helburua: horrela egiten du lan Dot.-ek, erakundeei aldaketarantz laguntzen dien kooperatibak
Hainbat bulego ditu gaur egun, eta krisi testuinguru batean jaio zen, sortzaileak hainbat eszenatokitara egokitzera behartu dituena.