Eusko Jaurlaritzak nabarmendu du Euskadiko Kanpo Sareak Euskal Autonomia Erkidegoko industria nazioartekotzeko eta inbertsio estrategikoak erakartzeko betetzen duen zeregina
- “Aukera-merkatuak ditugu, hala nola Europar Batasuna bera, baina baita Kanada, Japonia edo Latinoamerika ere. Euskadik leku horietan guztietan ditu Kanpo Sarearen bulegoak”, nabarmendu du Jauregi sailburuak.
Euskadiko Kanpo Sarea gure lurraldea bisitatzen ari da aste honetan. Bisitaren helburua da Euskal Autonomia Erkidegoko enpresekin harreman zuzena sendotzea, enpresa horiek nazioartekotze-arloan dituzten premiak ezagutzea eta Eusko Jaurlaritzak eskaintzen dituen zerbitzuak modu eguneratuan helaraztea. Bildu diren pertsonen artean, Euskadik atzerrian dituen merkataritza-bulegoetako 22 zuzendariak eta haien lan-taldeak daude. Bulego horiek Basque Trade & Investment SPRI Taldean integratuta daude, hau da, 90 herrialde baino gehiagori zerbitzu egiten dien Euskal Autonomia Erkidegoko enpresak nazioartekotzeko agentziaren sarearen barruan.
Testuinguru horretan, Mikel Jauregi Industria, Trantsizio Energetiko eta Jasangarritasuneko sailburuak bilera izan du Kanpo Sare osoarekin Donostiako Talent Housen. Sailburuarekin izan dira Nagore Bonilla BasqueTradeko zuzendari nagusia eta Andoitz Korta Industria Sustapeneko sailburuordea. Sailburuak, hitza hartu duenean, adierazi duenez, “nazioartekotzea funtsezkoa da gure industriak etorkizunean izango duen lehiakortasunerako”, eta “gure nazioarteko bulegoen lana funtsezkoa da gure enpresak munduarekin konekta daitezen eta Euskal Autonomia Erkidegoko produkzio-sarea indartuko duten proiektuak erakar daitezen”.
Halaber, sailburuak erakundeen eta Kanpo Sarearen arteko elkarlanaren garrantzia nabarmendu du, eta, adierazi duenez, “aliantza hori funtsezkoa da gure enpresei nazioartean hedatzeko bidean lagun dakien, haien premia sektorialei erantzun dakien eta aukera berriak erakar daitezen”. Trumpen Administrazioak abiarazi duen merkataritza-gerrak eragindako ziurgabetasunaren aurrean, beste merkatu batzuk bilatu behar ditugu gure industriarako eta produktuetarako, eta beste herrialde batzuetako enpresei ulertarazi behar diegu gure merkatua interesgarria izan daitekeela. Aukera-merkatuak ditugu, hala nola Europar Batasuna bera, baina baita Kanada, Japonia edo Latinoamerika ere. Euskadik leku horietan guztietan ditu Kanpo Sarearen bulegoak”.
“Euskadi herrialde txikia, baina anbizio handikoa da. Mundura irekita dagoen Europako nazio bat gara, industriarako eta esportaziorako bokazioa duena. Horregatik behar zaituztegu, munduan ditugun 22 antenak zarete, zeuen inguruan ikusten duzuen guztia transmitituko diguzuen antenak. Euskadi izena zabaltzen duzue mundu osoko 90 herrialde baino gehiagotara, eta gure zorionik beroena eta esker ona adierazi behar dizuegu”, aditzera eman du Jauregi sailburuak.
Kanpo Sarearen lan-agenda
Astean zehar, Kanpo Sareko kideek 250 bilera indibidual inguru egin dituzte nazioarteko merkatuak aztertzeko interesa duten Euskal Autonomia Erkidegoko enpresekin. Topaketa horiek Bizkaiko, Gipuzkoako eta Arabako parke teknologikoetan egin dira, eta Euskadiko enpresa txiki eta ertainek nazioartekotzearen inguruan dituzten kezken eta asmoen zuzeneko termometroa izan dira.
Lan-saio horiez gain, Vidrala, Bexen Medical eta Aernnova erreferentziazko enpresetara bisitak egin dituzte. Bisita horietan, nazioarteko arduradunek bertatik bertara ezagutu dituzte ekoizpen-prozesuak, berrikuntza-estrategiak eta nazioartekotzearen arloko premia espezifikoak. Lurraldeko enpresekin izandako zuzeneko harreman horrek aukera ematen du sarearen eta Euskal Autonomia Erkidegoko enpresa-sarearen arteko elkarrizketa sakontzeko eta tokikoaren eta globalaren arteko lotura sendotzeko.
BasqueTraderen Kanpo Sareak aldian-aldian bisitatzen du Euskadi. Bisita horiei esker, Kanpo Sareak tokiko ekonomiaren ekosistemarekin duen lotura estutzen da, Kanpo Sareak bat egiten du Eusko Jaurlaritzaren helburuekin bat eta herrialdearen lehiakortasunaren zerbitzura dagoen tresna estrategiko gisa Kanpo Sareak betetzen duen eginkizuna indartzen jarraitzen da.
2024ko abenduan Kanpo Sarearen 22. bulegoa ireki zen, Australian. Horrekin, Eusko Jaurlaritzak merkataritza-bulegoak ditu Frantzian, Erresuma Batuan, Alemanian, Italian, Txekiar Errepublikan, Eslovakian, Errusian, Turkian, Indian, Singapurren, Txinan, Japonian, Korean, Australian, Kanadan, Ameriketako Estatu Batuetan, Mexikon, Kolonbian, Brasilen, Txilen, Argentinan eta Uruguain.
