Albisteak 9 Azaroa, 2023

2.000 lagunek baino gehiagok eman dute izena Basque Open Industryn

Enpresa Txiki eta Ertainen Europako Astearen barruan, eta “Let’s meet in Innovation Land” lelopean, hogeita hamar txosten eta ehun erakusketari inguru, eta bilerak eta hitzorduak izango ditugu gai askoren inguruko joerak ezagutzeko: talentua, nazioartekotzea, eta trantsizio digitala, energetikoa eta ingurumenekoa
-

Euskadiko industria berritzaileenaren ordezkaritza handia bilduko da azaroaren 13 eta 14an Basque Open Industryn. ETEaren Europako Asteak nazioarteko hainbat egitasmo ekarriko du Bilbao Exhibition Centrerera (BEC) eta horietako bat da Euskadiko industriaren ahalmena erakusteko baliagarria izango den hitzordu hau. Hamar egun falta dira ekitaldirako eta izen-emateak zabalik egongo dira egun horretara arte, baina dagoeneko 2.000 lagunek baino gehiagok eman dute izena.

Basque Open Industryren eskaintza zabala izango da eta Euskadiko ekosistema industrial eta teknologiko zabala erakusteko balioko du. ‘Let’s meet in Innovation Land’ lelopean, bi jardunaldi hauetan pandemia arte egin ohi zen Basque Industry 4.0ren lekukotza jasoko da. Eragile publiko, pribatu eta enpresa ugari izango dira bertan. ETEaren Europako Asteak hurrengo egunetan ere aurrera jarraituko du nazioarteko entzutea duten beste egitasmo batzuekin: SME Assembly eta Enterprise Europe Network-EENren urteroko konferentzia.

Eskaintza zabala eta askotarikoa

Baina BOI ez da soilik baliagarria izango Europako erakundeetako ordezkarien aurrean Euskadiko industriaren ahalmena erakusteko. Izan ere, ETE-ei honako aukera hauek ere eskainiko dizkie: industriaren sektoreari zuzendutako laguntzak ezagutzea, teknologiak probatzea eta balioztatzea, nazioartekotze-prozesurako laguntzak ezagutzea eta, oro har, era askotako gaien inguruko joeren berri izatea (talentuarekin lotutakotik hasi eta trantsizio digitalera, energetikora eta ingurumen mailakora arte). Horretarako, BOIren programak 150 protagonista biltzen ditu (espezialistek eskainitako hitzaldiak eta ehunka erakusketari barne). Gainera, enpresen arteko topaketak antolatuko dira haien arteko interkonexioa bultzatzeko.

Lehen mailako hitzaldiak: Tom TerBush

Bi egun horietan BECen egingo diren hogeita hamar hitzaldi horien artean, Tom TerBushek eskainiko duena nabarmendu behar dugu. Tom TerBush EPRIko (Electric Power Research Institute) Zerbitzu Teknikoen eta Kideen presidenteordea, eta EPRI Internationaleko presidentea da. Inaugurazio-hitzaldian eskainiko dituen xehetasunen artean, honako gai hau nabarmendu behar dugu: industria berria sortzeko deskarbonizazioak ematen duen aukera. Iñigo Urkullu lehendakaria ekitaldian izango da.

Talentua Erakartzen eta Adimen Artifizialean adituak.

BOIn aditu gehiago ere izango dira. Hala, mahai-inguruetan eta solasaldietan, gai hauen inguruko azken joerei buruzko informazioa emango dute: Talentua, Adimen Artifiziala, Zibersegurtasun Industriala, Trantsizio Digitala eta Trantsizio Energetikoa eta Ingurumenekoa.

Talentuarekin lotuta, honako hauek izango dira bertan: José María Peiró, Universitat de Valénciako Erakundeetako Psikologia Sozialaren Unibertsitateko katedraduna eta Daniel Mikolta, Pertsonen zuzendaria Ingeteam enpresan.

Adimen Artifizialarekin lotuta, Petra Püchner-ek, Württembergeko Ekonomia, Lan eta Turismo Ministerioaren Europako komisarioak eta Steinbeis Europa Zentrumeko zuzendariak, AAren bidez negozio-eredu berriak gaitzen dituzten Europako ekimen berriak azalduko ditu.

Erakusketariekin biltzeko hitzorduak APP Networking Landen.

Enpresa parte-hartzaileen artean sortu ohi den interkonexioa da enpresek gehien baloratzen duten eta garrantzi handia duen zatietako bat. Horretarako, APP (Networking Land izenekoa) bat gaitu da. Horren bidez, trukea erraztu ahal izango da eta Euskadiko ETE-ek erakusketariengana sarbide erraza izango dute eta aurrez hitzorduak adostu ahal izango dituzte zibersegurtasun arloko enpresekin, startupekin eta BIND 4.0 programako enpresa bultzatzaileekin, Basque Research & Technology Allianceko (BRTA) teknologia-zentroekin eta abarrekin.

Joeren zuzeneko behatokia

BOI manufaktura aurreratuaren eta Euskadiko industria adimendunaren aplikazio berrien azken joerak zuzenean ikusteko behatoki moduko bat izango da. Euskadik azeleragailua zapaldu du berrikuntzan, eta, izatez, 21 postu egin du gora Europako rankingean.

Programaren barruan konferentziak, mahai-inguruak eta tailer praktikoak daude, elkarri lotuta dauden hiru blokeren egiturarekin; batetik, talentua; bestetik, industria adimendunerako joerak eta; horrez gain, trantsizio energetiko-ingurumenekoak eta teknologiko-digitala.

Gai jakinen inguruan sakontzeko aukera izango da bertan: nazioartekotzea, ekintzailetza, zibersegurtasuna edo teknologia, adibidez.

Nazioartekotze irisgarria eta Ukrainako standa

Nazioartekotzeari dagokionez, nazioarteko hedapena azkartu nahi duten Euskadiko ETE-ek SPRI Taldearen Kanpoko Sarea izango dute eskura, informazioa eskainiko duten stand propioekin. Hala, SPRI Taldeko Kanpoko Sareko 18 bulego egongo dira ordezkatuta, Euskadiko Nazioartekotze Agentziak, Basque Trade & Investmentek (BTI), koordinatuta. Agentziak 90 herrialdetara iristeko ahalmena du.

Standetako batek, gainera, esanahi berezia izango du. Ukraina izango da haren oinarria eta ‘Rebuild Ukraine’ izena izango du. Varsoviako bulegoko kideek (bulego hori arduratzen da Ukrainako merkatuaz), eta Ukrainako enpresek eta elkarteek herrialdea berreraikitzeko programan parte hartzeko aukera eskainiko die Euskadiko enpresei (programa Europar Batasunak babestu du).

BIND 4.0ri lotutako punta-puntako startupak

Ekintzailetzak ere garrantzi handia izango du ekimenean eta BIND 4.0 programari lotutako Euskadiko punta-puntako startupei eskainitako standak izango dira. Programa horrek ia 200 proiektu bizkortu ditu sektore industrial askotako eta neurri desberdinetako Euskadiko beste enpresa batzuekin eratutako loturari esker.

Sustatzaileekin harremanetan jartzeko aukera izango da, industria-sektorerako planteatzen dituzten eta Euskadiko enpresa-ehunduran txertatu daitezkeen irtenbideak ezagutzeko. Halaber, lankidetzarako bideak zabaltzeko lotura-puntua aurkitu dezaketen lehiakideen arteko harremana ere sustatuko da. Astelehenean, hilaren 13an, programako arrakasta-kasuetako batzuk gertu-gertutik ezagutzeko aukera egongo da.

Zibersegurtasunerako tartea

Parte-hartzaileek bereziki estimatzen duten beste gaietako bat zibersegurtasun industrialarekin lotuta dago; izan ere, Euskadi ongi kokatuta dago eremu horretan irtenbide aurreratuak eskaintzen dituen ekosistema baten inguruan. Esparru horretan espezializatutako enpresei eskainitako eremu espezifiko bat egongo da.

BDIHekin teknologiak probatzea, ebaluatzea eta balioztatzea

SPRI Taldeak, Euskadiko industriaren hitzordu handi hau antolatu duenak, agenda oparoa prestatu du Basque Digital Innovation Hubeko (BDIH) taldearekin soluzio teknologikoak aurkitzeko. Horren bidez, enpresek aukera dute beren laborategietan teknologiak probatu, ebaluatu eta balioztatzeko, eta, hala, bakoitzaren beharretarako egokiena zein den erabakitzeko. Hori guztia egun horietan BECen instalatuko den Digitalizazio Jasangarriaren eremuan egingo da.

AAren laborategiak eskaintzen dituen aukerak ezagutzea

Bestalde, Euskadiko ETE-ek kongresuan zehar Basque Artificial Intelligence Center-eko (BAIC) Adimen Artifizialeko laborategiak eskaintzen dituen aukerak ezagutzeko aukera izango dute. Proiektuak esperimentatzeko eta bizkortzeko diseinatuta dago laborategia.

ETE-en esku dagoen teknologia

BRTAren (Basque Research & Technology Alliance) bueltan dauden Euskadiko 17 zentro teknologikoek eta ikerketa-zentroek ere izango dute haien lekua, I+G+b ETE-ei hurbiltzeko.

Energiari eta mikroelektronikari buruzko sektore mailako guneak

Trantsizio energetiko-ingurumenekoari eta teknologiko-digitalari zuzendutako espazioan Euskadiko estrategia mikroelektrikoaz (Basque Microelectronics Hubekin), energiaren arloan dauden aukerez (Energia Klusterrak moderatuta), ekonomia zirkularraz (Ihobe ingurumen-kudeaketarako sozietate publikoak zuzendutako hitzaldi batzuekin) eta nazioartekotzeaz arituko dira.

Speaker Corner BOI: Eraldaketa digitaleko kasu praktikoak

Gainera, aurten, proposamen berri gisa eta parte-hartzaileek bertan esku hartzeko aukera izan dezaten, formatu dinamikoa eskainiko da 15 minutuko erakustaldi laburrak egiteko. ‘Speaker corner BOI’ txokoa izenekoan, zibersegurtasuneko, Adimen Artifizialeko erabilera praktikoen eta 5G teknologiaren arloko kasuak azalduko dituzte.

BOIn izena emateko aukera oraindik ere zabalik dago (bertan parte hartzeko eta beste enpresa batzuekin egingo den networkingean izena emateko).

SME Week 2023

Bestalde, ETE-en Europako Asteak hurrengo egunetan jarraituko du nazioarteko dimentsioa izango duten beste ekitaldi batzuekin. Alde batetik, SME Assembly egingo da (azaroaren 13tik 15era bitarte) eta horixe izango da Europako enpresa txiki eta ertainentzako (ETE) ekitaldirik garrantzitsuena. Formatu hibridoa izango du (aurrez aurrekoa eta online), eta goi-mailako hitzaldiak eta elkarrizketak, adituen mahai-inguruak, tailer interaktiboak eta eskola informatibo magistralak izango dira.

Bestalde, Europe Enterprise Network-EEN erakundearen urteko konferentzia egingo da (azaroaren 15etik 17ra bitarte). Euskadi erakunde horren parte da hasieratik, eta, izatez, SPRI Taldea EENen euskal partzuergoaren burua da. Europako mila ordezkari inguruk osatzen dute erakundea. Enpresa txiki eta ertainentzako munduko babes-sarerik handiena da, mundu osoan dago aktibo eta enpresei laguntzeko bikaintasunagatik ezagunak diren erakundeetako adituak biltzen ditu. Merkataritza-ganberak eta industria, eskualdeko garapenaren erakundeak, unibertsitateak eta ikerketa-institutuak eta berrikuntza-agentziak biltzen ditu.

 

Lotutako albisteak

Irundinek,  oso  nazioartekotutako  ETEak,  negozioa  % 50  baino  gehiago  handitu  du
12/09/2025 Nazioartekotzea

Irundinek, oso nazioartekotutako ETEak, negozioa % 50 baino gehiago handitu du

Irungo enpresak SPRI Taldearen Fast Track Innobideak programako laguntza jaso du eta botilatzeko makinak fabrikatzen ditu 1994tik

Global  Training  beken  epea  irailaren  19ra  arte  luzatu  da
12/09/2025 Nazioartekotzea

Global Training beken epea irailaren 19ra arte luzatu da

Global Training laguntza-programa Euskadiko gazteen nazioarteko mugikortasuna eta prestakuntza errazteko diseinatuta dago. Programaren aurrekontua 6.445.000 €-koa da eta laguntzek ordaindutako praktika profesionalak eskaintzen dituzte atzerrian.

Euskadiko  enpresa-ordezkari  batzuk  Alemaniako  automobilgintzaren  eraldaketa  aztertzen  ari  dira  Munichen

Euskadiko enpresa-ordezkari batzuk Alemaniako automobilgintzaren eraldaketa aztertzen ari dira Munichen

SPRI Taldeko Basque Trade & Investmentek eta ACICAE Euskadiko Automobilgintza Klusterrak elkarrekin antolatu dute

Euskadi  liderra  da  automobilgintzako  eskualdeen  aliantzan,  eta  ibilbide-orri  berri  bat  eskatu  du
10/09/2025 Nazioartekotzea

Euskadi liderra da automobilgintzako eskualdeen aliantzan, eta ibilbide-orri berri bat eskatu du

Ekitaldian Jauregi sailburuak azpimarratu zuen euskal industriak Europako automobilgintzaren sektorean duen garrantzi estrategikoa. Hurrengo urteetarako ibilbide-orri gisa, apustu hirukoitza nabarmendu zuen: finantziazioa, berrikuntzan inbertitzea eta sektorearentzako eskari berria sortzea

Brasilen  ezarritako  euskal  enpresek  EB-Mercosur  akordioa  eta  erga-erreforma  aztertu  dituzte
09/09/2025 Nazioartekotzea

Brasilen ezarritako euskal enpresek EB-Mercosur akordioa eta erga-erreforma aztertu dituzte

Bilera BasqueTradek São Paulon duen bulegoak antolatu du, eta agentziak euskal enpresei Brasil bezalako merkatu estrategikoetan ematen dien laguntzaren barruan kokatzen da

Euskal  zentro  teknologikoek  Euskadiko  garapen  industrialean  duten  garrantzia  azpimarratu  du  Jauregik
05/09/2025 I+G+B

Euskal zentro teknologikoek Euskadiko garapen industrialean duten garrantzia azpimarratu du Jauregik

Industria, Trantsizio Energetiko eta Jasangarritasuneko sailburuak bereziki azpimarratu du TECNALIAk herrialdearen garapen teknologiko eta industrialarekin duen konpromisoa, Jesús Valero zuzendari nagusiarekin Gipuzkoako Parke Teknologikoan duen egoitzan egin duen bileran

Koreako  Jeollanam-do  probintziak  Euskadi  bisitatu  du  itsas  energia  eolikoan  eta  trantsizio  energetikoan  aukerak  aztertzeko
05/09/2025 Nazioartekotzea

Koreako Jeollanam-do probintziak Euskadi bisitatu du itsas energia eolikoan eta trantsizio energetikoan aukerak aztertzeko

Euskadin programatutako agendarekin amaitzeko, delegazioak Saiteceko instalazioak bisitatu ditu, Euskal Autonomia Erkidegoan sarera konektatutako lehen aerosorgailu flotatzailearen proiektua bertatik bertara ezagutzeko asmoz.

Mikel  Jauregi  Industriako  sailburuak  Satlantis  enpresa  bisitatu  du;  satelite  espazialetan  espezializatutako  enpresa  da
04/09/2025 I+G+B

Mikel Jauregi Industriako sailburuak Satlantis enpresa bisitatu du; satelite espazialetan espezializatutako enpresa da

Satlantisek Leioako campusean du egoitza. Liderra da Lurra behatzeko teknologia miniaturizatuetan, eta handitze-fasean dago; fabrika berri baten proiektua du

Trumpen  muga-zergen  zati  bat  legez  kanpokotzat  jo  du  AEBko  apelazio  auzitegi  batek
03/09/2025 Nazioartekotzea

Trumpen muga-zergen zati bat legez kanpokotzat jo du AEBko apelazio auzitegi batek

Europako Batzordeak ez du epaiaren inguruko iritzirik eman, baina Washingtoni eskatu dio akordioan hitzartutakoa betetzeko eta autoen muga-zergak % 27,5etik % 15era murrizteko.

Wolco,  nazioartekotzearen  aldeko  apustua  egin  duen  ebaketa-erreminta  pertsonalizatuen  fabrikatzailea
28/08/2025 Nazioartekotzea

Wolco, nazioartekotzearen aldeko apustua egin duen ebaketa-erreminta pertsonalizatuen fabrikatzailea

Lemoako enpresak SPRI Taldearen Industria Digitala programaren dirulaguntza jaso du, eta bere negozioaren % 25 esportatzen du dagoeneko

Joan blogera

Jarrai gaitzazu

Kanal espezializatuak eta eguneroko gaurkotasuna gure sareetan.