Ingeteam-ek energia eoliko eta hidraulikoan eta eguzki-energian zentratuko du bere hazkundea
Inoizko krisi energetiko handienetako baten erdian gauden honetan, egoitza Zamudion duen eta aurten bere berrogeita hamarren urteurrena bete duen Ingeteam euskal enpresak 2022-2024 Plan Estrategikoa aurkeztu berri du. Apustu anbiziotsua da, helburutzat duena “beste dimentsio” baterantz jauzi egitea, elektrifikazio jasangarriaren arloko lider bihurtzeko. Besteak beste, aurreikusten du enpresaren fakturazioa 1.000 milioi euroraino handitzea, eta mila lanpostu berri sortzea. Asmo handiko helburuak Euskadiren trantsizio energetikoko eragile garrantzitsuenetako bat den enpresa honentzat. Ingeteam-ek helburutzat du “energia asko sortzea, bai eolikoa eta hidraulikoa eta baita ere eguzki-energia”, dio konpainiako zuzendari nagusi Adolfo Rebollok. Horretarako, egitura nazioartekotu bat dauka, presentzia duena bost kontinenteetako 24 herrialdetan, zeinari esker bere produkzioaren % 80 esportatzen baitu. Une honetan 4.000 langile baino gehiago enplegatzen ditu.
Tapia sailburuak berriki esan du energiaren testuingurua “izugarri kritikoa” dela, eta Gobernuari eskatu dio hartzeko presazko neurriak energiaren fiskalitate arloan… Zein da zure iritzia?
Ezinbestekoa da energiaren prezioaren arazoa konpontzea. Agian publiko orokorrak ez daki Espainian egunero kontsumitzen den argindarraren ia % 70 ez dela saltzen spot prezioan, baizik eta aurrez finkatutako prezio finko batean. Soilik egunero kontsumitzen den elektrizitatearen % 20-30 saltzen da spot prezioan. Arazoa da kontsumitzaile txikiarentzako prezioa zuzenean lotuta dagoela prezio horrekin. Beste herrialde batzuetan ez da halakorik gertatzen, eta energiaren prezioa ez da arazo bat. Zenbait enpresak -eta horien artean badira batzuk elektrizitatean intentsiboak direnak- ez dute prezio finkorik negoziatzen energiaren truke, eta horiek ere arazo handiak dituzte. Europaren independentzia energetikoa bultzatu behar da energia berriztagarriak oinarritzat hartuta eta Errusiako gasaren alternatiba bezala. Ingeteam-en uste dugu badagoela beste modu bat energia sortu, banatu, biltegiratu eta kontsumitzeko, eta konpromisoa hartu dugu energia hori modu garbi, eraginkor eta jasangarrian sortu eta kudeatzeko.
Lehengaien prezioen igoeraren edo lehengaien gabeziaren harira (zuek ere izango zenuten arazo hori), zer irudituko litzaizuke arlo edo sektore desberdinek bat egingo balukete horrelako baliabideak erosteko modu globalagoan, Euskadiko enpresei gauzak modu globalagoan egiten lagunduko liekeen “erosketa zentral” moduko bat sortuz?
Printzipioz ez zait gaizki iruditzen. Materialen eskasia dela medio, behartuta gaude gure hornikuntza-kateetan ahalegin handiak egitera eta lan gehiago egitera osagai alternatiboak eskuratzeko errekorreko denboran. Gure helburua da ahalik eta gutxien atzeratzea gure entrega-epeak. Momentuz, zailtasunak zailtasun, ez dugu inpaktu esanguratsurik jasan. Lanean jarraituko dugu aurrera egiteko.
Duela gutxi aurkeztu duzue konpainiaren datozen bi urteetarako Plan Estrategikoa. Plan anbiziotsua da, zeinaren helburua baita hurrengo hiru urteetan fakturazioa % 44 handitzea -mila milioi eurora iristeraino-, eta mila enplegu kontratatzea. Zein sektoretan hazi nahi duzue?
Gure helburua da mundu jasangarriago bat lortzea. Horregatik, ziklo estrategiko berri honetan lider izan nahi dugu sorkuntza berriztagarriaren arloan (eolikoa, hidraulikoa eta eguzki-energia), biltegiratzean, garraio eta banaketa adimenduneko sare sendoetan, eta energia elektrikoaren kontsumo eraginkor eta garbietan: ibilgailu elektrikoen kargagailuak, bihurgailuak eta motorrak trenentzat eta itsasontzientzat, siderurgiarako eta meatzaritzarako, uraren sektorerako, etab. Gainera, saiatuko gara gure merkatu garrantzitsuenetako kuota handitzen: Europa, Ipar Amerika, Australia, Brasil eta India; Txina ere gero eta garrantzitsuagoa da, eta itsasontzien eskutik iritsi nahi dugu hara.
Menturaz Plan Estrategiko anbiziotsu honen arrazoia al da une honetan bizi dugun energia berriztagarrien aldeko boom-a, gerrak hauspotu duena menpekotasun energetikoa murrizteko, batez ere Errusiako gasarekikoa?
1996tik gaude energia berriztagarrien arloan eta ordutik ari gara lanean energia elektrikoa modu eraginkorrean kontsumitzeko bihurgailuetan; xeheki landutako plan bat garatu dugu, gure esperientzian eta metatutako ezagutzetan oinarritua. Azken asteotan aldatu egin da egoera geopolitikoa, baina gure planteamendua betiko bera da, eta eragile garrantzitsua izango gara gizartea elektrifikatzeko bidean.
Zergatik ez dauzkagu parke eoliko, hidrauliko eta eguzki-parke gehiago Europan, teknologia ezagatik ala burokrazia astunagatik?
Energia berriztagarrietarako teknologia europarra da mundu osoan erabiltzen dena, eta euskal teknologia punta-puntakoa da. Beraz, Europan ez da energia berriztagarri gehiago sortzen, batez ere, zaila delako baimenak eta argindarra ebakuatzeko konexio-puntuak lortzea, eta ez teknologiarik ez dagoelako edo sorkuntza-metodo horiek lehiakorrak ez direlako. Une honetan emanda dauden sarerako sarbide- eta konexio-baimenak 150 GWraino iristen dira guztira, eta horietatik 103 GW energia fotovoltaikotik datoz. Zifra hori kontestuan jartzeko, nahikoa da esatea gaur egun Espainian instalatuta dagoen potentzia elektrikoa (teknologia guztiak kontuan hartuz) 112 GWkoa dela.
Martxan jarri berri duzuen plan honek 210 milioi euroko inbertsioak aurreikusten ditu. Izango dute eraginik Euskadin? Nolakoa izango da eragin hori eta non zehazki?
Ingeteam-ek 210 milioi euroko inbertsioa egingo du datozen hiru urteetan; 140 milioi I+G-ra bideratuko dira, eta 70 milioi instalazio berriak sortzera eta lehendik dauzkagunak hobetzera. Autokontsumorako bi planta fotovoltaiko sortuko ditugu Beasainen (Gipuzkoa) eta Sesman (Nafarroa) ditugun lantegietarako. Lehenengoan ekoizten dira itsasontzientzako motorrak, energia mekanikotik abiatuta energia elektrikoa sortzeko sorgailuak (eolikoak, itsasokoak, zentral hidraulikoetakoak eta zentral estazionarioetakoak ) eta punpak. Eta denak “Indar” markarekin. Bigarrenean, berriz, eguzki-inbertsoreak egiten dira, hots, eguzki-xafletatik sarean injektatu daitekeen argindarra sortzen duten gailuak. Bertan fabrikatzen dira baita ere biltegiratze proiektuetarako bateriak kargatu eta deskargatzeko inbertsoreak, ibilgailu elektrikoentzako kargagailuak eta turbina eolikoentzako bihurgailuak, hots, turbinek sarean injektatzeko moduko argindarra sortzeko behar dituzten gailuak. Bestalde, lantegia handituko dugu gai izan dadin eremu horien guztien hazkundea barne hartzeko.
Lotutako albisteak
Tecoplasek plastiko teknikoen eraldaketan erreferentzia gisa sendotzea du helburu
Bizkaiko enpresak industria-sektorerako eta uren tratamenduko sektorerako lantzen du material hori, eta akuikultura- edo elikagaigintza-sektoreetan duen posizioa handitzea esploratzen ari da.
Surphasek merkatuan parekorik ez duen teknologia garatzen du eta gatzgabetzeko planten eraginkortasuna handitzea lortzen du
Donostiako ETEak, Europako Batzordearen 2,5 milioiko dirulaguntza lortuta, iragazkien egoera aurreikusten du denbora errealean; hala, geldialdi teknikoen % 60 murrizten du
TECH friendly-k plangintza estrategikoa eta hiri-inguruneen eraldaketa digitala eta fisikoa uztartzen ditu
Bizkaiko enpresa hiriaren garapenean eta tokiko administrazio publikorako aholkularitza teknologikoan aritzen da.
Lansolar Ingenieros, bi hamarkada inguru abangoardiako irtenbideak eskaintzen trantsizio jasangarriagoa bultzatzeko
Bizkaiko enpresak hidrogenoarekin lan egiten hastea du helburu datozen hilabeteetan, energia fotovoltaikoa biltegiratzeko sistema gisa.
Optimus3Dk neurrira egindako gailu medikoak landuko ditu Gregorio Marañón ospitalearekin batera
Arabako enpresak bidalitako Lorena Cros doktoreak 3D modelaketan, inplanteen diseinuan eta irudi medikoen segmentazioan lagunduko du.
Agua Embrujadak infusioen sektorea gama handiko alternatiba jasangarriekin irauli du
Arabako enpresak osagai naturalen eta prozesu iraunkorren aldeko apustua egin du, kalitate handiko teak eta infusioak eskaintzeko.
Eurozon, desinfekziorako eta iraunkortasunerako ozono-teknologian aditua
30 urteko esperientziarekin, Bizkaiko enpresa elikagaien, uraren eta barruko espazioen higienizazioko berrikuntzaren buru da, ingurumena errespetatzen duten konponbideen alde eginez.
Lufe: “Bezeroaren esperientzia modu aktiboan entzutea da hobetzen laguntzen dizuna”
Enrique Arrillagak duela hamar urte sortu zuen % 100 Euskadiko lehengaiez diseinatu eta fabrikatutako altzarien enpresa, eta dagoeneko hainbat herrialdetara saltzen du, hala nola Frantzia, Italia eta Portugalera.
Ikerlanek bi norabideko bihurgailu bat garatu du ibilgailu elektrikoak trenbide-energia berrerabiliz kargatzeko
Zentro teknologikoa Kataluniako Salicru konpainiarekin elkarlanean ari da 2021etik, sare elektrikoaren azpiegitura optimizatu nahi duen CS-MV produktua sortzeko.
Psifiacosek plataforma berritzaile bat sortu du osasun mentalaren adierazleak urrunetik eta denbora errealean monitorizatzeko
Helburua esku-hartze goiztiarrak erraztea eta familientzako zein osasun-profesionalentzako txosten pertsonalizatuak ematea da.