Olga Martín (Aclima): “Deskarbonizazioa ez da jada betebehar klimatiko bat soilik, industriaren lehiakortasuna definitzen duen palanka da”
Europak 2050ean jarri du klima-neutraltasunerako norabidea, eta euskal industriak bere prozesuak eraldatzeko erronkari egin behar dio aurre, bere lehiakortasunari eusteko. Bilbao Exhibition Centren (BEC) egindako ‘Decarbon Hub’ jardunaldiarekin batera, Aclimako zuzendari nagusi Olga Martínek klusterrak deskarbonizazioaren arloan dituen estrategiaren ardatz nagusiak azaldu ditu, bai eta trantsizio horrek Euskadirentzat irekitzen dituen aukerak ere.
“Deskarbonizazioa jada ez da betebehar klimatiko bat soilik, industriaren lehiakortasuna definitzen duen palanka da”, dio Martinek. “Aclimatik, Euskadi Europako erreferente bihurtu nahi dugu Karbonoaren Ekonomian; baliabide estrategiko bezala kudeatu nahi da, eta trantsizio garbiak negozio-aukera berriak, enplegu berdea eta nazioarteko lidergoa ekarri”.
Aclimako zuzendariaren arabera, Karbonoaren Ekonomia honek “lider izan gaitezkeen balio-kate berritzaileak” sortzen ditu, batez ere Ekonomia Zirkularraren arloan, Deskarbonizazioan, Karbonoa Atzitzean, Erabiltzea eta Biltegiratzean (CCUS) eta konpentsazio-merkatuak bezalako esparruetan.
Martinen arabera, deskarbonizazioari heltzeko aukerak esanguratsuak dira. “Ingurumen-sektore aditua dugu, industria-sare kontzentratua eta dibertsifikatua, lehen mailako zentro teknologikoak eta irtenbide berritzaileak sortzeko gaitasuna duen ingurune naturala”, azpimarratu du. Horrek guztiak, bere ustez, “posizio pribilegiatuan jartzen gaitu balio-kate berriak sortzeko, inbertsioa eta enplegu kualifikatua erakartzeko”.
Aclimak bide hori aztertzen duten proiektu estrategikoak bultzatzen ditu dagoeneko, hala nola CO2 Capture, CO2 Farm edo Ciclicom, eta prest dago ekosistema hori indartzen duten beste proiektu batzuetan laguntzeko. “Hainbat ekimen bultzatu nahi ditugu: industrialdeetako CCUS instalazio pilotuak, hondakinak balioztatzeko azpiegiturak, nekazaritza eta basogintzako proiektuak dituen tokiko karbono poltsa bat edo berrikuntza irekiko zentroak”, amaitu du Martinek.
SPRI Taldea RIS 3 Euskadi estrategia abian jartzen duen eragileetako bat da, energiaren, fabrikazio aurreratuaren, bio-osasunaren eta nanozientziaren arloetan espezializazio adimenduna bultzatzeko.
