TAK Learning enpresak teknologia berrienak darabiltza langileei prestakuntza eraginkorra emateko
Konpainia donostiarrak hainbat teknologia (gamifikazioa, errealitate birtuala, errealitate areagotua eta machine learning) konbinatzen ditu enpresei prestakuntza didaktiko eta pertsonalizatua eskaintzeko
TAK Learning (Take Away Knowledge hitzen siglak) konpainia donostiarrak hamar urte beteko ditu 2019an. 25 langile ditu plantillan eta bulegoak Donostian, Madrilen eta Bartzelonan. Gainera, datozen hilabeteetan egoitza berri bat ireki nahi du Miamin (Estatu Batuak). Enpresa honek argi erakusten du langileen prestakuntzarako tresna berriak interes handia pizten ari direla, eta tresna horiek eragina dute 4.0 Industrian ere. Oscar Astierrekin hitz egin dugu, TAK Learning enpresako kontseilari delegatuarekin.
Zer egiten duzue TAK Learning enpresan?
2009an sortu ginenean ohartu ginen langileentzako prestakuntza presentziala aspergarria dela, eta badaudela teknologiak ikaskuntza horiek motibagarriago egiteko. Helburutzat hartuz ikaskuntza-ekintza akuilagarriagoak sortzea, arlo desberdinetako (pedagogia, sormena, teknologia…) jendea bildu genuen gure lantaldean. Ikaskuntzaren eraldaketa digitala planteatzen diegu bezeroei. Mundua etengabe aldatzen ari da, eta inoiz baino kaotikoagoa eta azeleratuagoa da. Lehen aldaketak motelago gertatzen ziren eta produktu batek hainbat urte irauten zituen merkatuan. Orain gauzak ez dira horrela. Antolakunde likidoak behar dira, aldaketak azkar transferitu ahal izateko. Hori berdin aplika dakioke ezagutzari ere, askoz azkarrago transferitu behar delako langile guztiengana.
Nolako konponbideak eskaintzen dituzue 4.0 Industriaren arloan?
Adibidez, lanean ari gara Euskadiko enpresa handienarekin, Gasteizko Mercedes Benzekin, zeinak 5.000tik gora langile baititu. Mercedesen gure “eLearning” plataforma instalatu dugu eta orain ikastaro guztiak online egiten dira, ez dira presentzialak. Lehen, langileek toki zehatz batera joan behar izaten zuten, horrek berekin dakartzan denbora- eta logistika-kostuekin. Orain, gure plataformari esker, langileek etxean egin ditzakete beren prestakuntza guztiak, ordenagailuan, tabletean edo sakelako telefonoan. Gainera, lehen presentzialki egin ezin ziren prestakuntza-prozesu batzuk sortu ditugu, adibidez, auto baten fabrikazioko urrats guztiak jarraitzea, urrats horietako batzuk areto itxietan edo txikietan egiten direlako. Hala, prozesu horiek bideoan grabatu ditugu eta ikastaroetan txertatu.
Bestalde, jolas bat garatu dugu Vidrala enpresarekin, prestakuntza emateko langileei lan-arriskuen prebentzioari, segurtasunari eta higieneari buruz. Jolasak bideo-zaintza panel bat irudikatzen du, zortzi pantailaduna, non alertak aktibatzen baitira. Langileak pantailaz pantaila sartu behar du zer gertatzen den ikusteko. Kasu bakoitzean bideo bat ikusiko du, adieraziz zein den balizko arriskua eta azalduz nola jokatu behar duen arrisku hori gainditzeko. Gero, ikasleek hainbat ariketa egiten dituzte jakiteko benetan ikasi duten nola aurre egin behar zaien horrelako egoerei.
Nolako teknologiak erabiltzen dituzue zuen ikastaroetan?
Asko erabiltzen dugu gamifikazioa ikastaroak erakargarriago eta bisualago egiteko. Errealitate birtuala eta errealitate areagotua ere baliatzen ditugu, esparru horietan espezializatutako enpresekin lankidetzan. Horrelako eduki bat eraikitzen dugunean hiru elementu hartu behar ditugu kontuan: ongi pentsatua egon behar du pedagogikoki, erakargarria izan behar du bisualki eta ongi funtzionatu behar du teknologikoki ordenagailuetan, tabletetan eta sakelakoetan.
Baina teknologiaz ari garenean ahaztu egiten zaigu denok ez garela trebeak. Gerta liteke lantegi bateko langileak ez egotea ohituta ordenagailu bat erabiltzen edo digitalizazio-maila oso baxua izatea. Jolas eta ikastaroek sinple eta intuitiboak izan behar dute, langilea motibatzeko eta jolasen bidez ikasten jarraitu nahi izateko.
Langileek ikastaro horietan ikasten duten informazioa bezain garrantzitsua izango da enpresetako arduradunek euren langileen gaitasunei buruz eskura dezaketen informazioa. Ez da hala?
Egia esan, horrelako prozesuetan oso datu esanguratsuak lortzen dira datuen analisirako tresnak eta adimen artifiziala erabilita. Jokoetan badago elementu interesgarri bat: ikasteko edukidun joko bat sortzen dugunean, jendeak igandeetan edo gauez jokatzen du gehien, nahiz eta inoiz ez litzaigukeen bururatuko enpresako prestakuntza-ikastaro bat abiaraztea une horietan. Datuen analitikak erakutsi digu, batzuetan, profil profesional zehatz batzuk izaten direla gai bati buruz gutxien dakitenak; orduan, enpresak badaki zeinek behar duen gai horri buruzko indargarriren bat.
Enpresek nola hartu dituzte zuena bezalako prestakuntza-plataformak?
Gamifikazioaren eta ikaskuntzaren munduek interes handia pizten dute. Krisiaren ondoren, enpresek erakargarri izan nahi dute beren langileentzat. Gero eta gehiago aipatzen dugu talentu ezaren arazoa, horregatik, enpresek erakargarri izan behar dute talentuarentzat. Prestakuntza-plataforma erakargarri bat baduzu, jokoen bidez ikasteko aukera ematen duena, eta langileek ikusten badute euren ikaskuntza-prozesuaz arduratzen zarela, zure marka-irudia hobetu egiten da eta talentu gehiago erakarriko duzu. Eskaera handia da, enpresak gero eta gehiago kezkatzen baitira horrelako kontuez.
Bestalde, enpresek argi izan behar dute prestakuntza funtsezkoa eta estrategikoa dela, ezin garrantzitsuagoa delako ezagutza zabaltzea antolakunde barruan. Aukera izateak prozesu, produktu edo estrategia berri bat sare osora zabaltzeko arinago eta prestatuago egiten du enpresa.
Zein bide hartuko du “eLearning”aren etorkizunak?
Elkarrekin konbinatuko dira prestakuntza-prozesuetan eragina izango duten hainbat teknologia, baina adimen artifizialak garrantzi handia har dezake. Adimen artifizialari esker, posible izango da pertsona bakoitzari eduki pertsonalizatuak eskaintzea bere prestakuntza hobetzeko. Horrek esan nahi du pertsonen denbora optimizatu behar dela, baina oraindik bide luzea dago egiteko.
Beste teknologia batzuei dagokienez, errealitate birtualaren munduak asko eboluzionatu behar du. Teknologiak aprobetxatzen hasiko gara eta horrelako tresnak gero eta gehiago erabiliko dira prestakuntzan.
Lotutako albisteak
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.