Mikel Barandiaran, Dominion-en CEOa: “Industrian teknologia digitalak txertatzeko prozesuak ez du atzera bueltarik”
Euskal konpainiako arduradunaren ustez, sentsorikan, konektagarritasunean eta datuen tratamendu aurreratuan oinarrituko da industriaren eraldaketa digitala.
Dominion-ek 20 urte beteko ditu 2019an. Zerbitzu multiteknikoen eta ingeniaritza espezializatuko soluzioen hornitzaile globala da konpainia. Bilbon du egoitza nagusia, 35 herrialde baino gehiagotan ditu bulegoak, eta, gutxi gorabehera, 8.000 langile ditu. Azken bi urteetan, enpresen erosketak sustatu ditu, besteak beste, CDI eta ICC AEBan, Ditecsa Kolonbian eta Scorpio, Seref eta Phone House Spain. Gainera, aurtengo lehen bederatzi hilabeteetan 16,3 milioi euroko irabaziak izan ditu, 2017ko epe berean izan zuen baino % 6 gehiago. Enpresa-ingurunera bideratutako teknologia berrien aldeko apustuari esker, 4.0 industriaren gaitasunen eta erronken ikuspegi osoa du enpresak. Dominion-eko CEO Mikel Barandiaranekin hitz egin dugu.
Zertan lan egiten du Dominion-ek?
Konpainia global bat gara, eta negozio-prozesuen eraginkortasuna hobetzeko teknologia aplikatzea da gure egiteko nagusia. Hiru jarduera-eremutan lan egiten dugu: teknologia eta telekomunikazioak, industria eta energia. Gure bezeroei eraldaketa osoan zehar laguntzeko gai gara; hasi azpiegitura baten kontzeptualizazio-fasetik edo ekipo teknologikoen integraziotik, eta edozein prozesuren funtzionamendura eta mantentze-lanetara arte.
Guretzat ezinbestekoa da negozio-ereduen zeharkako ikuspegia izatea eta kultura sendoa izatea. Horri dagokionez, kudeaketa-eredu berezia dugu “Dominion-en 4 D”-etan oinarritua: digitalizazioa, dibertsifikazioa, kudeaketa deszentralizatua eta finantza-diziplina.
Zer lotura duzue 4.0 Industriarekin?
Konpainia teknologikoa gara, eta industriarekin harreman estua dugu; bi ezaugarri horiek daude 4.0 Industriarekin dugun loturaren muinean. Izan ere, 4.0 Industriaren helburua da prozesu industrialen eraginkortasuna hobetzea, eskura dauden gaitasun teknologiko berriak erabilita. Horretarako, ezinbestekoa da teknologia horiek eta teknologiekin hobetu nahi diren prozesuak aldi berean ezagutzea.
4.0 Industriarekin erlazionatuta egin diren garapen batzuen adibideak eman ditzakezu?
Industrian askotariko digitalizazioak egiten ari gara. Proiektu bakoitza banan-banan lantzen dugu. Guk uste dugu ez dagoela soluzio estandarrik; horren ordez, argi identifikatutako beharrentzat soluzio espezifikoak eman behar dira. Gainera, ikuspegi praktikoarekin egiten dugu lan beti: prozesuaren eraginkortasuna hobetzen duten erabakiak hartzeko beharrezkoak diren datuak soilik sentsorizatu eta landu behar dira. Kasu batzuetan, adibidez, gure soluzio propioak ezartzen ditugu. Esaterako, automobilgintza-sektoreko bezero batzuen ekoizpen-instalazioetan, Proefficiency soluzioa ezarri dugu energia optimizatzeko. Soluzio horren barruan, ekintza hauek sartzen dira: produkzio-aktiboetan sentsoreak jartzea; datu-bolumen handia jasotzeko, komunikatzeko, gordetzeko eta konputatzeko arkitektura konplexua definitzea eta hedatzea; eta, eredu deskriptiboen eta prediktiboen bidez, datu horien analisi aurreratua egitea.
Eraldaketa digitalerako soluzioak eskaintzeko orduan, harrera ona igartzen duzue enpresen aldetik, bereziki ETE-en aldetik? Edo oraindik lana egin beharra dago?
Gero eta harrera hobea sumatzen ari gara. Hala ere, enpresa bakoitzak duen heldutasun-mailaren araberakoa da harrera hori. Ikusten ari garenez, digitalizazio-soluzio askoren kasuan, enpresa horietako arduradunek duten ezagutza teknologiko espezializatuaren mende dago ezarpena. Gainera, oraindik ere ezjakintasun handia dago digitalizazio industrialaren inguruan.
Aldatzearen kontrako jarrera ere nahiko ohikoa da; “hori beti egin da horrela” esaldia entzun ohi da. Industria-sektoreari betidanik kostatu zaio aldatzea, eta kontuan hartu behar da eraldaketa digitalak prozesu guztiei eragiten diela, bai prozesu produktiboei eta komertzialei, bai barne-kudeaketako prozesuei. Aldaketa globala da. Horregatik, gure espezialisten lanaren zati handi batek bezeroari soluzio teknologiko motak irakastearekin du zerikusia. Halaber, aurretiazko aholkularitza-lana egin behar da, eta egindako inbertsioek ekarriko dituzten itzulkinak identifikatu behar dira. Hori guztia ezinbestekoa da, batez ere ETE-ei dagokienez, haien negozioen ezinbesteko digitalizazioari aurre egitea erabaki dezaten.
Zer falta zaio edo zer du ikasteko 4.0 Industriak? Zein dira erronkak?
Lehen esan dudan bezala, erakunde industrialak bere prozesuak aldatzeko gogoz egotea da erronka nagusia. Erakunde horietako arduradunek aldaketarako beldurra gaindituz gero, aldaketa onartzera bultzatuko dute erakundea. Nola ez, erakunde industrialen barruan ezagutza teknologikoa hobetu beharra dago, erakundeak gai izan daitezen gaitzen duten teknologiak identifikatzeko eta sustatzeko, eta teknologia horiek beren prozesu operatiboetan eta negozio-operazioetan duten aplikagarritasuna eta eskaintzen dituzten hobetzeko aukera mugagabeak ezagutzeko. Enpresa da bere prozesuak hobekien ezagutzen dituena, eta berak daki zein diren produktibitaterako eta errentagarritasunerako kritikoak. Prozesu horiek dira lehenetsi beharrekoak, ez besteak.
Edonola ere, horretan jarduten dugun agente guztiok argi izan behar dugu industrian teknologia digitalak txertatzeko prozesua itzulezina dela, eta era proaktiboan ekin behar zaiola.
Lotutako albisteak
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.