Metalean inprimatzeko Estatuko lehenengo 3D SLM inprimagailua garatu du SamyLabs enpresak
Enpresa bizkaitarrak asmoa du datorren urtean teknologia propiodun makina bat merkaturatzeko prezio lehiakorrean
SamyLabs enpresaren atzean hiru ekintzaile daude, zeintzuek beren ezagutzak (diseinua, mihiztadura, mekanika, automatizazioa, elektronika eta programazioa) elkartu baitituzte mota guztietako asmakizun mekanikoak garatzeko, hutsetik hasita eta osagai berrerabilgarriak baliatuz: laser markagailuak, robotak, elizetarako lanpadario elektronikoak eta material plastikoan inprimatzeko 3D gailu bat. Beren ametsa betetzeko zorian dauden Amador García Usábelek, Jose Félix Torre Santosek eta Jon Martínez Garcíak oso barneratuta dute Maker kultura eta DIY (Do It Yourself ingelesezko siglak) filosofia.
Duela bi urte metalean inprimatzeko Trumpf enpresaren 3D inprimagailua deskubritu zuten ADDIT3D azokara eginiko bisita batean. Makina haren osagaiak eta teknologia aztertu ostean, pentsatu zuten metalean inprimatzeko 3D makina bat fabrikatu zezaketela SLM teknologia erabiliz. Bi prototipo eta makina erdi-funtzional bat garatu ondoren, Ekintzaile programaren laguntza (SPRI Taldea eta Eusko Jaurlaritza) eta Bizkaiko Foru Aldundiaren 1. Arloko diru-laguntza jaso ondoren, eta Europar Batasunaren OpenMaker programan parte hartu eta ONA Electroerosión enpresarekin lankidetzan aritu ondoren, orain badute makina komertzial bat: Alba 500. Jon Martínezek hartu du hitza SamyLabs enpresako hiru bazkideen izenean.
Zein abantaila eskaintzen ditu SLM teknologiak metalean inprimatzeko orduan?
SLM teknologiak (Selective Laser Melting edo Laser bidezko Fusio Selektiboa) aukera ematen du tamaina txikiko pieza konplexuak sortzeko, laser bidez fusionatutako metal-hautsa gehituz. Abantaila handiena da teknologia honekin posible dela beste mekanizatu-prozesu batzuekin sortu ezin daitezkeen piezak sortzea, esaterako, pieza hutsak, barruko egitura duten elementuak (arinagoak eta gogorragoak) eta barruko hodiak dituztenak. Gainera, amaierako pieza funtzionala fabrikatzen du. Beste abantaila bat da material asko erabil daitezkeela inprimatzeko, hala nola, aluminioa, altzairua, titanioa edo kobaltoa.
Zein sektoreri interesatzen zaio gehien teknologia hori?
Indarrez sartu da aho-hortzetako medikuntzaren eta protesien sektoreetan. Horrelako inprimagailu batek hortzetako 50 inplante ekoitz ditzake tirada bakar batean eta ordu gutxi batzuetan, denbora asko aurrezten delarik. Industria sektorean ere erabiltzen da, moldeak edo moldeetako txertatuak fabrikatzeko edo stock-ean ez dauden ordezko piezak egiteko. Erabilpen handia du baita ere automozio sektorean eta aeronautikarenean. Oso enpresa gutxik garatzen dute teknologia hori. Hain zuzen, Europan hamar baino gutxiago dira 3D SLM inprimagailuak merkaturatzen dituzten konpainiak, eta Estatuan geu gara bakarrak.
Zein unetan dago SamyLabs proiektua?
Une honetan badugu prototipo komertzial bat, Alba 500 izenekoa, ONA Electroerosión enpresarekin lankidetzan garatua. Makina fabrikatzen lagundu digute, eta guk jarri ditugu elektronika, laserra, kontrola eta ijezketa-softwarea. Bestalde, lau bezero trakziogile bilatu ditugu eta makina eskaini diegu kostu-prezioan, trukean aukera eman diezaguten probak egiteko, teknologia orrazteko eta egiaztagiriak lortzeko. Garrantzitsua da makina ahalik eta gehien hobetzea merkatura atera baino lehen, eta bezeroek horretan laguntzen digute. Prozesu horren erdian gaude orain, eta Europa mailako egiaztagiriak lortzen ari gara. Gure asmoa da datorren urtean merkaturatzea.
Zerk bereizten du zuen 3D inprimagailua merkatuan dauden beste batzuengandik?
Gure helburua da Asiako merkatuak eskaintzen dituen inprimagailuak eskaintzea, antzeko prestazioekin eta Asiako merkatuko prezioetan. Produktu bat Asian erostearen arazoa da laguntza behar duzunean ez dela erraza laguntza hori lortzea eta ezin duzula eskuratu ezinbestekoa den know-how-a. Guk Europan fabrikatuko dugunez, gai izango gara bezeroarentzat hain beharrezkoa den laguntza emateko. Gure Alba inprimagailuak badu beste abantaila bat lehiakideen aldean: ijezketa-software propioa dugu, urteotan guk geuk garatua, zeinak aukera ematen baitio bezeroari inprimaketa prozesuko parametro desberdinak aldatzeko. Beste markek ez dute horrelakorik eskaintzen. Bezeroak hainbat parametro aldatu ditzake: geruzaren lodiera, geruza metatzeko denbora, potentzia, laserraren abiadura, moduak, pasadak, offset-a… Gure softwarearekin posible da inprimatzeko behar den denbora eta inprimatutakoaren kalitatea kontrolatzea.
Nolako harrera egin dio merkatuak SamyLabs-en proiektuari?
Bikaina. Dena oso azkar doa. Ideia duela bi urte sortu zen, 2016ko ADDIT3D azokan. Urtebeteren buruan Alba 250 aurkeztu genuen azoka hartan bertan. Interesatu asko hurbildu zitzaizkigun, besteak beste, inbertitzaile pribatuak, enpresak eta inbertsio funtsak, baina erabaki genuen geure kabuz jarraitzea, ez genuelako bazkide baten menpe egon nahi. Geure dirua inbertitu dugu, eta hau guztia ez zen posible izango ez bagenitu jaso Ekintzaile programaren laguntza (SPRI Taldea eta Eusko Jaurlaritza) eta Bizkaiko Foru Aldundiaren 1. Arloko diru-laguntza, ez bagenu parte hartu Europar Batasunaren OpenMaker programan Tecnaliaren eskutik, eta ez bagenu lankidetzarik abiatu ONA Electroerosión enpresarekin. ADDIT3D azokaren azken edizioan Alba 500 aurkeztu genuen, eta ikusi dugu jendeak oraindik baduela interesa. Ondo bidean, datorren urtean aurkeztuko dugu metalean inprimatzeko Espainiako lehenengo 3D SLM makina, prezio eta guzti.
Lotutako albisteak
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
MEPRO Medical Reproductive Solutions, gizarte-helburu teknologia: ugalkortasun maskulinoa berritzen
Gure helburua osasun-profesionalei eta bikoteei antzutasunaren erronkei aurre egiteko tresna berritzaile, seguru eta eraginkorrak eskaintzea da
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.