Kata School Euskadik laguntzaile digital adimenduna eskaintzen du industriako ETE-en lehiakortasuna hobetzeko
Kata School Euskadi aholkularitza-enpresak laguntzaile digital adimenduna eskaintzen du industriako ETE-en lehiakortasuna hobetzeko. Fakturazioaren % 15 baino gehiago bideratzen du I+Gren arlora, berrikuntza digitalera batik bat.
Enpresa 2020 amaieran sortu zen, industriako ETE-ek emaitza jasangarriak lortzeko “etengabe hobetzeko kultura sortzeko” zuten beharrari erantzuteko. “Ikuspegi tradizionalek ez zuten hori finkatzea lortzen”. Antolaketa-kultura eraldatzeko asmoz sortu ginen, Toyota Kataren diziplina aurreratuaren bitartez. Sistema horrek etengabe hobetzeko ohitura sortzen du lider eta prozesu bakoitzean”, azaldu du Fernando Torre zuzendariak.
Munduko Kata School sareko 30 kideetako bat da enpresa, eta tokiko ikuspegia eskaintzen du Euskadin, baina lankidetza globalaren barruan, kudeaketaren eta bikaintasunaren ikuspegietan eguneratuta egoteko.
Erreferentea bihurtu da Toyota Kata praktikan, “Toyota Production Systemen esentzian”. 2025ean “Mi Coach IA” gure 24/7 laguntzaile digital adimenduna sortzea mugarri nagusia izan da I+Gren arloan. Garapen disruptibo horri esker, gure coaching Kata eredua erakunde bakoitzeko maila guztietara eraman dezakegu, pentsamendu zientifikoa eta etengabeko hobekuntza bermatuz. Euskadiko enpresek hobetzeko eta erresilientziarako beren sare propioa sortzeko gida aditua gara”.
Lehiakortasuna eraldatu eta helburu estrategikoak lortu nahi dituzten industria-sektoreko enpresa txiki eta ertainak dira haien bezero nagusiak. “Operazioaren bikaintasunaren arloko aholkularitza eta coachinga eskaintzen dugu Toyota Kataren gure ikuspegiarekin. Ikuspegi hori esperientzia praktikoaren transferentzian oinarritzen da: erakutsi egiten dugu, elkarrekin egiten dugu eta bezeroak berea egiten du, hobekuntzak egiten dituen bitartean ikasiz”.
Adimen artifizialaren ezarpenak bultzatuta, datozen urteetan 1,2 milioi euroko fakturazioa lortzeko plan estrategikoa dute.
I+G da bere bereizgarritasunaren motorra eta urteko fakturazioaren % 15 baino gehiago bideratzen du arlo horretara. “Arreta berezia jartzen dugu berrikuntza digitalean, Toyota Kataren praktika aurreratua abangoardiako soluzioetan integratzeko. Coaching-elkarrizketa simulatzen duten adimen artifizial sortzaileko ereduen garapenean eta entrenamenduan dago espezializatuta gure ekipoa, eta, hala, enpresek hobekuntza lortzeko eta mantentzeko duten modua eraldatzen dugu.
Mi Coach IA laguntzaile digital adimenduna “lidergoa eta etengabe hobetzeko ohitura estandarizatzeko munduko tresna liderra” bihurtzea da datozen urteetarako erronka. Gure helburua da Toyota Kata modeloaren ezarpenean esponentzialki eskalatzea, gure coaching hibridoaren bitartez”.
Enpresaren asmoa da industriako ETE bakoitzak bere helburu estrategikoak betetzea eta “etengabeko hobekuntzarako barne-kultura eraikitzea. Gure asmoa da gure bezeroak modu autonomoan ikasten duten eta egokitzen diren erakunde bihurtzea, Euskadiko enpresa-ehunduraren lehiakortasuna eraldatzeko”.
SPRI Taldeak bere kanaletan euskal enpresei beren jardueraren berri emateko aukera eskaintzen die Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
