Material berriak robot industrialen piezak arintzeko
Gipuzkoako Branka Solutions enpresak material ultra-arinak erabiltzen ditu robotentzako piezak sortzeko eta, horrela, produkzio-prozesuen eraginkortasuna hobetzeko
Orioko Branka Solutions enpresa material berrien garapenean eta itsasoko teknologia autonomoetan espezializatuta dago. Azti zentroarekin batera sortu du Itsasdrone, Euskadin fabrikatutako itsasorako dron bat. Robotikari eta material berriei buruz duen ezagutzari esker, manufaktura sektorean murgildu da, non pieza arinagoak egiten baititu robot industrialentzat. Jon Lasarekin hitz egin dugu. Jon Managing zuzendaria da Branka Solutions enpresan, zeinak bost enplegatu eta hainbat partner teknologiko dituen Erresuma Batuan, Alemanian, Frantzian eta Txinan.
Zer egiten duzue Branka Solutions-en?
Branka-n bi negozio-ildo dauzkagu. Lehenengoak material konposatuetan (adibidez composite-ak) oinarritutako konponbide teknologikoak egiten ditu. Helburua da ingeniaritza eta fabrikazioa integratzea material konposatuen indar-guneak aprobetxatzeko eta askotariko sektoreetan aplikatzeko. Ingeniaritzari dagokionez, gure know-how-a honexetan oinarritzen da: egitura arinagoak, composite-ei aplikatzen zaizkien prozesuak eta prototipoetan nahiz serie laburretan oinarritutako fabrikazioa. Mota guztietako teknologiak eta sistemak integratzen ditugu, eta produktu propioak nahiz hirugarrenentzako lanak egiten ditugu.
Bigarren negozio-ildoa da teknologia autonomoarena eta robotikarena, zeintzuk batez ere itsasoko teknologia autonomoan espezializatuta dauden. Askotariko proiektuak egin ditugu itsasoko lanen prozesuak automatizatzeko, bai ikerketarako, eta bai konponbide robotikoak erabiliz optimizatu daitezkeen lan astun eta errepikakorrak arintzeko. Itsasoko robotikari dagokionez, material konposatuekin in house fabrikatzeko dugun gaitasuna aprobetxatzen dugu eta, horri esker, guk geuk egiten ditugu fabrikazioa eta muntaia.
Zein ekarpen egiten diozue 4.0 Industriari?
Material konposatuak erabiltzen ditugu ekoizpen-ildo batzuetan, hain zuzen halako automatizazio-maila bat duten prozesuak dauzkatenetan, arreta berezia eskainiz robotei. Uste dugu material ultra-arinez ekoitzitako robotentzako piezekin eraginkortasun handiagoa lortzen dela manufakturaren industriako produkzio-prozesuetan. Adibidez, karbono-zuntzezko pieza bat jartzen badiogu piezak manipulatzen dituen beso antropomorfiko bati, beso hori metalezko beso arruntak baino arinagoa izango da eta, beraz, orobat hobeak izango dira abiadura, errepikakortasuna eta zehaztasuna. Behin pisua arinduta, robot batek minutuko 25 mugimendu egin ditzake 20 egin beharrean, eta horrek esan nahi du lineak ere eraginkorragoak izango direla. Material konposatuen, batik bat, karbono-zuntzaren abantailak aprobetxatzen ditugu linea robotikoen produktibitatea hobetuko duten osagaiak fabrikatzeko eta garatzeko.
Robot industrialak fabrikatzen dituzten enpresa gehienek pieza trukagarri estandarrak merkaturatzen dituzte. Zuen kasuan, kartara eginiko pieza bereziak ekoizten dituzue, ezta?
Bai, kartara eginiko diseinuak egiten ditugu, hots, aplikazio bakoitzerako ad hoc konponbideak. Bi arlotan zentratzen gara. Batetik, diseinu eta funtzionaltasun jakin batzuk dituzten piezen hornitzaileak gara, baina beste material batzuekin optimizatzen ditugu pieza horiek. Bestetik, prozesuak ere eraldatzen ditugu. Adibidez, beso antropomorfiko komertzial bati atxikitzen zaion pieza bat garatu dugu. Hutsaren bidezko xurgatze-kamera bat da, gai dena xurgatze bidez tamaina handiko pieza bat hartzeko (adibidez metalezko xafla bat) eta beste lan-eremu batean uzteko. Robot horrek karbono-zuntzezko huts-kanpai bat dauka lotuta, eta xurgatze bidezko sistema erabiltzen du xaflak mugitzeko. Orain arte bi langile behar ziren xaflak eskuz mugitzeko. Hori bakarrik lortu daiteke robot industrialentzako karbono-zuntzezko pieza arinek eskaintzen duten abiadura eta zehaztasunari esker.
Zuen prozesuetan fabrikazio gehigarriko teknologiak ere erabiltzen dituzue.
Asko zaintzen dugun arlo bat da, eta Europa osoan dauzkagun partner-ekin kolaboratzen dugu, zeren, fabrikazio gehigarria hain azkar doa aurrera, ezin ditugula makina guztiak eskuratu, oso garestiak direlako eta ezin diegulako errentagarritasunik atera. Baina fabrikazio gehigarria erabiltzen dugu gure garapenen zati asko egiteko; gure produktuetan integratzen dugu eta alderantzizko ingeniaritza edo prototipoak egiteko baliatzen dugu. Fabrikazio gehigarria egiten dugu plastikoarekin, metalarekin eta composite-ekin. Eta kalitate handiko amaierako pieza funtzionalak lortzen ditugu. Duela 5 edo 10 urte ezinezkoak ziruditen gauzak nahiko maiz egiten ditugu gaur egun. Prozesu gero eta optimizatuagoak dira, eta guk hurbiletik jarraitzen ditugu aurrerapen guztiak.
Zure ustez zein norabide hartuko dute 4.0 Industrian aplikatutako material berriek?
Arlo horrek bide luzea du egiteko eta material berriek propietate oso disruptiboak dauzkate, baina oraindik ez daude guztiz integratuta industrian. Orain badugu erronka tekniko bat, alegia, grafenoan edo bestelako nano-teknologia batzuetan oinarritutako produktuak ekonomikoki bideragarri egitea. Teknologia existitzen da, eta aplikazioak ikaragarriak dira, baina teknikoki eta ekonomikoki bideragarria izan behar du industriak masan erabili dezan. Fabrikazio gehigarriak eta beste teknologia batzuek bizi izan duten bezalako bilakaera bat behar dugu kasu honetan ere. Duela 20 urte oso garestia zen piezak fabrikazio gehigarri bidez ekoiztea, eta gainera piezen kalitatea ez zen oso ona. Baina gaur egun teknologia oso aurreratuta dago, bai kalitatean eta bai kostuetan, besteak beste, patenteak ireki egin direlako.
Zeintzuk dira Branka Solutions-en etorkizuneko erronkak?
Nazioartekotze-fasean gaude, batik bat itsasoko robotikaren ildoan. Gure erronka da nazioartean sendotzea, erreferente bihurtzea itsasoko aplikazioetarako konponbide autonomoen garapenean, eta sendotzen jarraitzea material konposatuen merkatuan, bai Estatuan eta bai nazioartean. Aurrera egin nahi dugu gure egunerokotasunean, baina epe luzeko ikuspegia da garrantzitsuena, eta egunero lan egin beharra dago 5 edo 10 urte barru egon nahi dugun tokiraino iristeko. Helburu horiek erdietsi nahi ditugu.
Lotutako albisteak
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.