Lis Solutions: “’Anaia nagusi’ bat sortzen dugu hornikuntza-kateak zaintzeko”
Asier Barredo, Lis Solutions enpresako zuzendari nagusia.
Lis Solutions startup-aren bereizgarria da elkarrekin konbinatzen dituela datuen analitika eta tamaina handiko konpainientzako aholkularitza logistikoan duen esperientzia zabala. Enpresak egoitzak dauzka Gasteizen, Bartzelonan eta Ulm hirian (Alemania), eta 2013an sortu zenetik, sektore oso desberdinetako enpresa industrialekin egin du lan. Lis Solutions Bind 4.0 programaren bigarren edizioan hautatutako startupetako bat izan da, eta une honetan proiektu bat dauka martxan Elay enpresa gipuzkoarrarekin azeleragailu horren barruan.
Zerk bereizten du zuen enpresa gainerakoetatik?
Adituak gara prozesu industrialetako datuen analitika aurreratuan, eta gure bereizgarria da bi munduak batzen ditugula, hau da, batetik operazio, errentagarritasun eta produktuen mundua, eta, bestetik, datuen mundu ukiezina. Esperientzia handia dugu aholkularitza tradizionalean eta Big dataren analitika aurreratuan, eta ikuspegi bikoitz horri esker lortzen ditugu proiektuak, bezeroen hizkera berbera darabilgulako. Teknologiekin hype handiak dauzkagu, baina enpresa-munduak sarritan ez du ongi ulertzen nolako ekarpena egin diezaioketen eguneroko lanari. Ni neu logistikako arduraduna eta operazioetako zuzendaria izan naiz hainbat urtez, beraz, konponbideak eskaintzen hasi aurretik beste aldean egon nintzen, eta badakit zer den eredu analitiko aurreraturik ez izatea negozioa kudeatzeko.
Nolako abantailak eskaintzen dituzte zuen konponbideek?
Hasieratik ohartu ginen enpresa ertain eta handietara bideratu behar genuela, enpresa horiek datu bolumen masiboa dutelako eta eurekin aplika dezakegulako gure datuen analitika. Banaketa-sare oso konplexuak dira, modu isolatuan kudeatu ezin daitezkeenak. Demagun erosketa txar bat egiten dudala; erosketa hori biltegira iritsiko da, eta han dagoenak akatsa transmititzen jarraituko du kate osoan barrena, eta horrek diru asko galaraziko dio enpresari. Guk sare digital adimendunak sortzen ditugu eta algoritmoak gai dira hornikuntza-kateko edozein puntutako desbideratzeak detektatzeko, baita gertatu baino lehen ere. Desbideratzeak saihestezinak badira, sareak aldaketak iradokitzen ditu akatsaren eragina ahalik eta txikiena izan dadin. Robot-kudeatzaile moduko bat da, etengabe ikusten ari dena sistemaren informazio guztia, faltsua noiz den detektatzen duena eta hornikuntzaren segurtasuna zaintzen duena. Dagoeneko badago hori guztia lortzeko teknologia, baina guretzat garrantzitsuena da negozioa ongi ezagutzea.
Nola inplementatu dituzue aholkularitza-konponbide horiek enpresa industrialetan?
Orain Volkswagen enpresaren hornikuntza-kate osoa digitalizatzen ari gara, banaketa-sare eta azpi-sare guztiak barne. Hala, datu horiek informazio-sistema bakar baten barruan egongo dira eta sistema hori gai izango da taldeko ibilgailu guztiak modu bisualean kudeatzeko. Horri esker, aplikazio bat erabiliz denbora errealean jakin ahal izango da non dagoen auto bakoitza. Beste adibide bat: iaz proiektu bat egin genuen Mango enpresarentzat. Astebete eman genuen gure zentro teknologikoetan Black Friday eguneko datuak denbora errealean aztertzen. Horrela jakin genuen non sortzen ziren inbutuak, hornikuntza guztiak bermatuta zeuden, arropa zekarten itsasontziak garaiz iristen ziren…
2017an beste proiektu bat egin genuen BMWk Munichen daukan lantegian: algoritmo bat sortu genuen jakiteko pertsona bat lanpostu egokian ari den lanean. Langile bakoitzaren mugei eta lanpostu bakoitzaren ezaugarriei buruzko informazioa bildu genuen, 200 milioi konbinaziotik gorako matrize batean. Hortik abiatuta, programa bat sortu genuen, zeinak iradokizunak egiten baitzituen plantillaren asebetetze-maila eta ergonomia hobetzeko, eta horri esker, %25 hobetu zen linearen produktibitatea.
Zertan datza Bind 4.0 ekimenaren barruan Elay enpresarekin martxan daukazuen proiektua?
Alderantzizko ingeniaritza proiektu bat da. Elay enpresak automoziorako osagaiak fabrikatzeko makinak dauzka, fabrikazio kode oso itxiak dituztenak. Pieza horiek fabrikatzeko ezinbestekoa da hornitzaile nagusiarengana jotzea; jakina, pieza berriak entregatzeko epeak ez dira bezeroak nahi lituzkeenak, eta prezioak ere oso garestiak dira. Hala, sistema bat garatu dugu makinatik kodifikazio konplexu hori guztia erauzteko, eta simulagailu bat sortu dugu, enpresak autonomia izan dezan pieza propioak sortzeko.
Eta zein puntutan dago orain?
Bukatu dugu lehen fasea, eta fase horretan bideragarritasuna egiaztatu dugu, kodea eskuratu, ulertu, deskodifikatu eta antolatu. Orain garapen fasean gaude, hau da, Elay enpresako langileei pieza berriak fabrikatzeko aukera emango dien simulazio-tresna egiten ari gara.
Lis Solutions
Lotutako albisteak
Alterity, robotika mugikorrarentzat eta mugikortasun elektriko arinarentzat bateriak fabrikatzen dituen enpresa bizkaitarra
Elkarteak SPRI taldearen nazioartekotze-programaren laguntza bat jaso du, eta bezeroak ditu jada Italian, Suitzan eta Herbehereetan
Sariki, metrologian liderra den ETEa: “BIND SMEk zure erronketarako soluzioak dituzten startupekin konektatzen zaitu”
Gipuzkoako ETEak 40 urte beteko ditu 2025ean, eta BIND SMEren, Eusko Jaurlaritzak sustatutako eta startupekin berrikuntza irekian jarduteko programaren, 2. edizioan parte hartu zuen
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.