Infoboxek kongresu perfektua eskaintzen du, klik bakarrean
Javier Roblesek Ingeniaritza Informatikoa ikasi zuen Deustuko Unibertsitatean. Kontsultore gisa lan egin zuen hainbat konpainiatan, hala nola PricewaterhouseCoopers eta IBMn. 2006an, ordea, bere kabuz ekitea erabaki zuen. Aspalditik ideia bat zuen buruan eta, lehiaketa bat irabazi zuenean, Infobox Solutions eratu zuen, Interneterako soluzioen diseinuan, garapenean eta programazioan espezializatutako zerbitzu informatikoen konpainia. Gasteizen du egoitza eta diziplina anitzeko 15 langile ditu une honetan. Programazioarekin, diseinuarekin, aholkularitzarekin eta marketinarekin lotutako profesionalek osatzen dute plantilla. Sortzen dituzten soluzio teknologikoak, aplikazioak eta webguneak, batez ere, lehen mailako multinazionalek erosten dizkiete, eta dagoeneko 40 herrialdetan baino gehiagotan saltzen dira.
Zerk bultzatu zintuen aholkularitza atzean utzi eta zure proiektu propioari ekitera?
Beti izan nuen buruan enpresa bat muntatzea. Egia esan, asko erakartzen ninduen neure proiektu bat aurrera eramateko aukerak eta, tira, aholkularitzan lanean igaro nituen urte horiek oinarri gisa balio izan zidaten neure kabuz ekiteko. Une horretan aholkulari gisa lan egiten nuen sektore publikoan. Aldi berean, Adimen Artifizialari buruzko doktoretza egiten ari nintzen nire kabuz, gai horrek asko erakartzen baininduen. Orduan konturatu nintzen enpresei zaila egiten zitzaiela sektore publikoko kontratuen berri izatea. Behar horretatik eta Adimen Artifizialarekin lotuta aplikatu nitzakeen ezagutzetatik abiatuta, Infoconcurso sortu nuen, Estatu mailako lehiaketen, lizitazioen eta esleipenen bilatzaile bat. Gaur egun, Infobox Solutions bilakatu da. Garai hartan oinarri teknologikoko enpresak sortzeko lehiaketa bat zegoen martxan, Caja Vitalek eta SPRIk antolatua. Ideia aurkeztu nuen eta sari bat eman zidaten. Neurri batean, jauzia ematen lagundu zidan horrek.
Nola gogoratzen dituzu lehenengo urte haiek?
Argi dago hasiera ez dela inoiz erraza izaten, baina konfiantza handia nuen ideian, Infoconcurson. Ziur nengoen enpresa askori lagunduko ziela haien intereseko lehiaketen eta lizitazioen berri izaten. Funtsean, alerten eguneroko zerbitzu bat da Infoconcurso, eta sektore publikoko kontratuei buruzko informazio eguneratua jaso nahi duen edo lizitazioen edo esleipenen gaineko txostenak sortu nahi dituen edozein enpresari zuzenduta dago.
Eta zer da gaur egun Infobox?
Gaur egun, Infoconcurso baino zerbait gehiago gara. Beste produktu izar bat dugu etxean: Eventool. Ekitaldietarako plataforma teknologiko bat da. Eguneroko zereginak errazteko eta bertaratuen esperientzia hobetzeko soluzioak nahi dituen edozein ekitaldi-antolatzaileri zuzenduta dago. Gainera, softwarea garatzen adituak garenez, % 100 online inguruneetan oinarritutako hainbat proiektutan parte hartzen dugu. Eta hori guztia ez litzateke posible izango enpresa diziplina anitzeko lantalde batek osatuko ez balu. Programazioaren, diseinuaren, aholkularitzaren eta marketinaren arloko profesionalak ditugu, eta gure bezeroei arreta pertsonalizatua eta kalitatezkoa eskaintzeko ahalegina egiten dute horiek.
Pisu handia duzue nazioartean…
Bai, hori da. Hasieratik online enpresa gisa aurkeztu ginen, teknologiak ahalbidetzen digun guztiarekin, eta egia da munduko edozein lekutatik iristen zaizkigula bezeroak. Zifrak berrikusi nituen azken aldian, 41 herrialdetan genituen bezeroak. Hala, gure salmenten % 40 baino ez ditugu egiten Estatuan; gainerakoak, atzerrian. Eta atzerriko salmenta horien artean, bolumen handia dugu Alemanian, Frantzian, Brasilen, Portugalen, Mexikon, Suitzan, Italian… Halaber, gure bezero asko gomendatuta etortzen dira, edo ekitaldiren batean gure teknologia erabili dutelako ezagutzen gaituzte. Lurralde mailan, adibidez, Magialdiarako, Gasteizen urtero egiten den magia jaialdirako, aplikazio mugikorra diseinatzen dugu duela urte batzuetatik. Aurretik, Frantzian egiten duten antzeko ekitaldi baterako aplikazioa egin genuen. Antolatzaileak Magialdiako arduraduna ezagutzen zuen, eta gure soluzioa gomendatu zion; horrela ezagutu gintuen bezeroak.
Zuen webgunean diozue “Ekitaldien munduarekiko pasioa” duzuela. Zer esan nahi du horrek?
Eventoolen bidez lortzen dugu hori. Aurrez aipatu dudan aplikazioa da Eventool, ekitaldien sektorera bideratutako tresna teknologikoa. Horrekin, posible da ekitaldiaren mugikorreko aplikaziotik webgunea, izena emateko formularioak, ekitaldi birtualak, sarreren kontrola, gonbidapenen bidalketa edo bertaratze-ziurtagiriak egitea. Ekitaldi profesionalen (orokorrean, kongresuak, hitzaldiak, azokak, konbentzioak…) antolatzaileei zuzendutako produktu sorta bat da. Eta, zertan laguntzen diegun? Soluzio hauen bidez antolatzaileek eguneroko zereginak errazago egin ditzaketela uste dut, eta aukera ematen die haien ekitaldia profesionalizatzeko. Ekitaldiak antolatzea lanbide oso polita da, baina, aldi berean, estresagarria. Ekitaldi horretan gerta daitekeen guztia kontrolatuago izaten laguntzen dute gure tresnek; ez maila teknologikoan bakarrik, pertsonei dagokienez ere bai. Enpatia handia dugu antolatzailearekin, eta hark aliatu gisa ikus gaitzan nahi dugu, ez hornitzaile soil gisa.
Pentsatu duzue Infoboxen garatzen dituzuen produktuei Adimen Artifiziala aplikatzea?
Modako hitza da. Adimen Artifiziala leku guztietan dago orain eta guk, enpresa teknologiko bat garen heinean, arretaz jarraitzen ditugu azken berriak. Karreran zehar beka bat jaso nuen, arlo horretan lan egiteko aukera eman zidana. Horregatik matrikulatu nintzen gero Adimen Artifizialari buruzko doktoretza batean. Eta bai, gaur egun Infobox izena duen enpresaren jatorrian egon zen eta, zalantzarik gabe, etorkizunean ere egongo da.
Lotutako albisteak
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Zaher Taldeak bere eraginkortasun operatiboa hobetzea du helburu eraldaketa digital nabarmen baten bidez
Enpresa gipuzkoarra bere zuzendaritzaren errelebo betean murgilduta dago, galdaragintzan eta mekanizazioan aritzen da, eta nazioartekotzearen aldeko apustua ere egin du.