Inalia-k Monbolt garatu du, torloju bidezko lotuneak monitorizatzeko plataforma
Hasiera arriskatu samarra da COVID-19ak eragindako Alarma Egoeraren erdian lana utzi eta enpresa berri bat martxan jartzea. Eta horixe egin zuten bi ingeniari gasteiztarrek, 2020ko otsailean lana utzi eta handik bi hilabetera Inalia eratu zutenean. Itxialdiak eragindako arazoez harago, Gasteizko startup honetako kideek baikortasunez ikusten dute euren konponbideen etorkizuna, eta halaxe adierazi digu Inalia-ko zuzendari nagusi Alejandro Andak elkarrekin izan dugun solasaldian.
Nolako jarduera garatzen duzue Inalia-n?
Gure helburu nagusia da industriako makina eta sistemen iraunkortasun-arazoak konpontzea, gure ezagutza baliatuz horretarako. Hiru alderdi lantzen ditugu: lehenengoa da produktu propioak garatzea, hala nola, Monbolt eta Datia. Monbolt torloju bidezko lotuneak monitorizatzeko sistema bat da, eta Datia, berriz, datuen plataforma. Gure negozioaren bigarren ardatza da bezeroen neurrira eginiko monitorizazio-sistemak garatzea: eurek definitutako makineria diseinatzen, kalkulatzen eta instrumentatzen dugu. Azkenik, diziplina anitzeko ikuspegia txertatzen duten ingeniaritza arloko proiektuak egiten ditugu, hau da, diseinua, kalkulua eta instrumentazioa batzen dituzten proiektuak.
Zertan dautza Monbolt eta Datia?
Monbolt eta Datia garapen-prozesuan daude oraindik. Monbolt monitorizazio-sistema bat da eta torloju bidezko lotuneak kontrolatzen ditu denbora errealean. Konponbide interesgarria da mantenimendu-kostu handiak dituzten edo toki irisgaitzetan dauden torloju bidez jositako sekzioentzat. Harremanetan jarri gara hainbat bezerorekin eta interesatuta daude. Gureak beste konponbide batzuen aldean duen abantaila da ez dugula monitorizazio inbaditzailerik egiten. Ez gara torlojuaren monitorizazioan oinarritzen, baizik eta zeharka egiten dugu, zirrindolaren bitartez, hots, ez dugu lotunea monitorizatzen. Horretarako, banda extensometrikoak erabiltzen ditugu: altzairuaren gainean itsasten den material batekin eginiko sareta modukoak dira, eta luzatzen direnean erresistentzia aldaketak izaten dituzte. Guk aldaketa horiek neurtzen ditugu, eta datu horiek informazio bihurtu. Aldaketa horiek neurtzeko gailu elektrikoak konektatu behar zaizkie.
Gainera, gutxi dira denbora errealeko etengabeko monitorizazioa eskaintzen duten konponbideak, eta guk Datia-ren bitartez eskaintzen dugu hori. Ez dugu ematen datu gordinik; ingeniaritzako interpretazio bat egiten dugu eta, horrela, alerta sistema bat sor dezakegu torlojuak askatzen hasten badira abisatzeko, e.a. Hasieran, Monbolt plataformako datuak bistaratzen zituen zatia zen Datia, baina hainbat bezerorekin hitz egin ondoren, uste dugu baduela berezko izaera. Orain, asmoa da edozein motatako sentsoreen neurketa eta analisiekin erabiltzea.
Bestelako zein konponbide eskaintzen dizkiezue zuen bezeroei?
Esparru berriak aztertzen ari gara neurrira eginiko produktuak garatzeko. Adibidez, gerta liteke bezero batek neurrira eginiko sistema bat eskatzea bere makina guztien bihurdura-momentua neurtzeko. Guk neurketa-sistema hori sortzen dugu eta, gainera, datu horiek denbora errealean eskaintzen ditugu. Esan liteke mantenimendu prediktiboa dela, hainbat helburu dituena: mantenimenduaren denborak eta kostuak murriztea, arrisku estrukturalak gutxitzea eta iraunkortasun-arazoak konpontzea; hau da, gauzak ez daitezela apurtu, gauza horien (makinak edo tresnak) mantenimendu-kostuak gutxitu daitezela, eta norberak jakin dezala zer gertatzen zaien bere makina, tresna edo sistemei instrumentazioa kontuan hartuta.
Zein da zuen bezeroen profila?
Oro har, Monbolt-en kasuan, sektore eolikoko enpresa handiak dira (Gamesa, General Electric…), baina beste sektore batzuetara ere zabaldu gara, hala nola, obra zibilera, energiara edo eguzki energiara. Denek duten ezaugarri komuna da nahiko enpresa handiak direla.
Noiz eta zergatik jarri zineten martxan?
Nire bazkide Jaime Fernándezek eta nik Gasteizko zerbitzuetako ingeniaritza batean lan egiten genuen, eta iaz otu zitzaigun produktu bat garatzeko ideia. Aurtengo otsailaren amaieran gure enpresa utzi eta apirilean Inalia sortu genuen, Alarma Egoeraren erdian. Ez genuen halako hasierarik espero, eta ezbehar galanta izan da, bageneuzkalako apirilean proiektu pilotuak garatu nahi zituzten hainbat kontaktu, baina dena atzeratu behar izan dugu eta hori nahiko negatiboa izan da. Baina, bestalde, itxialdian eta jarduera geldirik egon denean, aprobetxatu dugu negozio-eredua lantzeko eta hasieran pentsatutakoez bestelako jarduera batzuetara bideratzeko. Beraz, positibotik ere izan du.
Koronabirusaren pandemiak eragin duen krisi honen testuinguruan, nola ikusten duzue zuen etorkizuna?
Oro har, nahiko baikorrak gara. Perspektiba onak dauzkagu. Gure lehen proiektua lortu dugu eta hainbat enpresarekin harremanetan jarri gara Monbolt edo neurrira eginiko gure monitorizazio-produktuak euren konpainietan txertatzeko. Perspektibak nahiko onak dira, baina egia da interesa gorpuztu egin behar dela gero. Baikorrak gara, eta ziur gaude panorama asko argituko dela hemendik eta hiru hilabetera.
Gure etorkizuneko erronketako bat da Monbolt garatzea erreferentziazko konponbidea izan dadin torlojuen monitorizazioan. Eta horretarako, ezinbestekoa da benetako proiektu pilotuak egitea. Horrez gain, neurrira eginiko monitorizazio-sistemak eskaini nahi dizkiegu beste era bateko enpresei.
Lotutako albisteak
Sariki, metrologian liderra den ETEa: “BIND SMEk zure erronketarako soluzioak dituzten startupekin konektatzen zaitu”
Gipuzkoako ETEak 40 urte beteko ditu 2025ean, eta BIND SMEren, Eusko Jaurlaritzak sustatutako eta startupekin berrikuntza irekian jarduteko programaren, 2. edizioan parte hartu zuen
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko