Bideroad, adimen artifizialaren bitartez azpiegituren mantentze-lanen kudeaketa asmatu duen startupa
Mantentze-lanak ikusmen artifizialarekin kudeatzeko tresna asmatu duen startupa da Bideroad, baina oraindik ez dago merkatuan. Errepideak, kaleak, bidegorriak eta bestelako instalazio handiak hobetzeko dago pentsatuta, besteak beste, unibertsitateko campusak, golf-zelaiak, portuak eta abar. Arazoa hautematen du (zuloak, pintura falta edo hainbat kalte), soluzioa proposatzen du eta baliabideak planifikatzen ditu. Orain, lan hori guztia eskuz egiten da. Ekintzailetza berritzailea saritzen duten Top 101 Spain Up Nation Errekonozimenduen II. edizioko finalisten artean egon diren Euskadiko sei startupetako bat da enpresa.
Proiektuak SPRI Taldearen laguntza du eta Donostiako Ceiten (irabazi asmorik gabeko zentro teknologikoa) du jatorria: “software-garapen bazkide batzuk zituen eta hainbat proba egin ondoren organismo publikoetan, balio komertziala izan zezakeela ikusi zen”. Trafikoa kudeatzeko sistemen arloko profesional bat bilatu zuten eta nirekin jarri ziren harremanetan”, adierazi du Roberto Viudezek, Bideroadeko CEOak eta sortzaileetako batek.
Enpresa apirilean eratu zuten eta hilabete hauetan identitate korporatibo propioa, webgunea eta marka sortu dute, “eta hainbat kontzeptu-proba egiten ari gara hainbat bezerotan, funtzionamendua ingurune erreal batean egiaztatzeko, probatzeko eta haien benetako iritzia jasotzeko”.
Bideroadek mantentze-lanak kudeatzeko tresna eskaintzen du eta produktu bakar batean uztartzen ditu kudeaketa tradizionala eta ikusmen artifiziala. Bideetako azpiegiturak, errepideak, bidegorriak, kaleak edo, are, golf-zelaiak eta ikastetxea mantentzeko erabil daiteke.
“Adibidez, Donostiako Udalarekin ari gara lanean eta ibilbide bat egin dugu kamerarekin lau autobus-lineetan zehar. Bideoa plataformara igoko dugu, sistemak aztertu egingo du eta GIS baten gainean (geoerreferentzia bidezko planoa) irudikatuko du, seinaleak, espaloiak, bankuak eta bestelako elementuak identifikatuz eta kalteak hautemanez: oinezkoentzako igarobide bat gaizki margotuta baldin badago edo zuloak baldin badaude”.
Orain arte eskuz egiten dute funtzio hori garbiketako langileek eta udaltzainek. Bideroad tresnak arazoa hautemateaz gain, soluzioa proposatzen du eta horretarako baliabideak planifikatzen ditu.
“Denbora asko aurreztu daiteke, aktibo askoren mantentze-lanak egin behar direlako. Efizienteagoa izan dadin lortzen dugu guk. Egunero pasa daiteke kamera”.
Gainera, eremuan bertan erabiltzeko aplikazio bat du tresnak aktiboaren egoeraren gaineko jarraipen osoa egiteko. “Mantentze-lanetako inbertsioak planifikatzeko trazabilitatea eta datuak eskaintzen ditu. Halaber, galtzadan dagoen irristatze-arriskua estimatzeko gai gara eta hala istripuak prebenitu ditzakegu. Inork ez du halakorik. Egun merkatuan ez dago horrelako tresnarik”.
Administrazio publikoentzat, kontserbazio-enpresentzat, hotelentzat, portuentzat, azoka-eremuentzat eta “errepideak dituen edozein enpresarentzat” egiten dute lan.
Tresna irisgarria da edonorentzat eta ez da inbertsio handirik egin behar. “Ez duzu ez zerbitzaririk, ez ekiporik behar. Eta hilabetean kaleko elementu guztien inbentarioa izango duzu, mantentze-lanak egiteko”.
Proiektu honetan, I+G da dena, sentsoreak, adimen artifiziala, ikusmen artifiziala, matching learninga edo deep teacha baititu. “Dirua aurrezteko eta azpiegiturak hobeto mantentzeko, ibilgailuen zirkulazio hobetzeko eta desplazamenduen denbora eta CO2a murrizteko aukera ematen du tresnak. Faktore sozial oso garrantzitsuak ditu. Are, etorkizunean, herritarrek informazioa emateko eta feedbacka jasotzeko aukera eskaini dezake, adibidez, zulo bat noiz konpontzea aurreikusten den jakiteko”.
Enpresaren epe laburreko erronkak dira (proiektu-`pilotuak martxan daude dagoeneko) “bezeroak tresnaren balioa ikustea. Eta, gero, merkatu guztietan komertzializatzeko modukoa izatea, SPRIren, udalen eta aldundien partetik jaso dugun laguntzarekin hasita”.
Asmoa da urtebetean atzerriko merkatuan egotea. “Ez da lekuz aldatu beharrik, hemendik ezarri daiteke. Edozein lekutan erabili ahal izateko produktu orokorra izango da”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
