Arctic Sea enpresa azken ukituak ematen ari zaio Coollogger termografoari, gai izan dadin GPRS bidez eta denbora errealean kontrolatzeko garraio prozesuko tenperatura
Euskal konpainiak giro-parametroen kontrol eraginkorra eskaintzen du elikagaien eta produktu farmazeutikoen garraiatze- eta biltegiratze-prozesuetan
4.0 logistika edo logistika adimenduna estuki lotuta dago 4.0 industriarekin, teknologia gorakorrak erabiltzen baititu produktuen biltegiratze eta banaketa prozesuetarako. Bere egoitza Mungian (Bizkaia) duen Arctic Sea euskal enpresa 2014an hasi zen konponbide berritzaileak garatzen elikagaien eta produktu farmazeutikoen tenperatura monitorizatzeko garraio- eta biltegiratze-prozesuetan. Iñigo Alonso Echevarria, Arctic Sea enpresako zuzendari nagusiarekin mintzatu gara horrelako konponbideei eta sektoreko etorkizuneko joerei buruz.
Nola sortu zen Arctic Sea?
Artic Sea-ren aurreko enpresa batean du jatorria. Ozeano zuen izena eta iragazkiak saltzen genituen distantzia luzeko garraioetan fruta kontserbatzeko, fruta hori baldintza onenetan iritsi zedin kontsumitzailearenganaino. Ikusirik negozioa nahiko ondo zihoala, erabaki genuen gure produktu-eskaintza osatzea eta termografo batzuk garatzea, hotz-katea monitorizatzeko garraio prozesuan. Coollogger izena eman diegu termografo horiei.
Nolakoak dira termografoak eta zein da eskaintzen duten zerbitzua?
USB bidezko termografo sinple batzuekin hasi ginen. Esku-ahurrean sartzen den pendrive antzeko bat da, bi urteko iraupena duen bateria batez eta tenperatura-sentsore batez hornitua dagoena. Jomugara iristean, termografo hori PC bati konektatu behar zaio, USB konektorea erabiliz, datu guztiak ateratzeko. Gainera, aukera ematen du grafikoak egiteko eta informazioa zuzenean lainora igotzeko. Nola gurea bezalako merkatuetan garrantzitsua den inbertitzen eta garatzen jarraitzea, bertsio berriagoak atera ditugu azken urteotan, adibidez, Bluetooth bidezko Coollogger bat, aukera ematen duena datuak zuzenean irakurtzeko sakelako telefono batetik, PC batera konektatu beharrik gabe. Orain GPRSdun bertsio berri bat egiten ari gara, zeinak denbora errealean igorriko dituen datuak eta funtzionaltasun gehiago ere izango dituen, adibidez, azelerometro bat. Asmoa da konponbide hori hotz-katerako IoT (Gauzen Internet) plataforma bihurtzea.
Hardwareaz gain, bere garrantzia eman nahi diogu lainoko plataformari ere. Gure helburua da ez bakarrik produktu bat saltzea, baizik eta monitorizazio-zerbitzu ahalik eta integralena eskaintzea. Asko interesatzen zaigu, adibidez, Blockchain teknologia, aukera ematen digulako kargaren trazagarritasuna bermatzeko; gero eta bezero gehiagok eskatzen digute hori eta ez hemen bakarrik, batez ere, Asiako merkatuan. Badakigu zer egin behar dugun eta modu errazena bilatu nahi dugu aukera horiek gure bezeroei eskaintzeko.
Nolako harrera izan du Coollogger-ek merkatuan?
Egia esan, pozik gaude. Gure merkatu potentziala 8 milioi itsas-edukiontzira iristen da eta gure merkatu erreala 30.000koa da. Munduan ekoizten ditugun elikagaien %50 galdu egiten da, beraz, funtsezkoa da hotz-katea monitorizatzea. Ibilbide luzea dugu eta bide onetik goaz, baina hazi egin behar dugu, eta inbertsioa eta garapen komertziala azkartu.
Non diseinatu eta fabrikatzen da Coollogger?
Beste enpresa batzuekin kolaboratu dugu Coollogger termografoaren hardwarea eta softwarea fabrikatu eta diseinatzeko. Coollogger-en data logger sistema Bizkaian fabrikatzen da.
Coollogger-en helburua da elikagaiak monitorizatzea itsasoko garraioetan. Pentsatu duzue erabili ote daitekeen trena hori beste mota batzuetako produktuak monitorizatzeko? edo posible den beste garraio-bide batzuetan erabiltzea?
Negozio-nitxo honetan zaila da operatzaile edo produktu guztientzat balio duen zerbait egitea. Esparru zehatzetan espezializatu beharra dago, bakoitzak bere premiak dauzkalako. “Azken miliako” garraioa etorkizun handiko nitxoa da guretzat, baina hotz-katea monitorizatzeko sistema arinak inplementatu behar dira horretarako, zehaztasun oso zorrotzak dituztenak laginen maiztasunean, transmisio moduluetan edo datuen deskargan. Neurri-neurriko produktu bat egin behar da. Lehiakor izan nahi badugu, ezinbestekoa da espezializatzea.
Zein da Coollogger bezalako monitorizazio gailuen etorkizuna?
Badirudi hazkunde-tasa handiak erregistratuko direla merkatu-gaien sektorean eta milaka milioi euroko merkatu bat dagoela. Badaude operatzaile handiak, hardwarean eta softwarean asko inbertitzen ari direnak. Denborarekin ikusiko dugu paperezko edo USB bidezko termografoek garrantzia galduko dutela eta, aldiz, orokortu egingo direla 4.0 ekipoak, zeintzuek, tenperaturaz gain, beste hainbat parametro ere neurtuko baitituzte.
Zeintzuk dira Arctic Sea enpresaren etorkizuneko erronkak?
Gure erronka nagusia da azken ukituak ematea GPRS teknologiadun Coollogger modelo berriaren diseinuari, lehenbailehen merkaturatzea eta jauzi kualitatibo bat ematea gure jomuga-bezeroari dagokionez. Oraingoz produktu esportatzaileengan -fruta, arraina, loreak, farmaziako produktuak- zentratu gara. Gure estrategia berriari jarraiki, inportatzaileengana zuzendu nahi dugu, banaketa-kate handietara, Coollogger berriak zerbitzu berritzaileak eskainiko dituelako.
Lotutako albisteak
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.