Eusko Jaurlaritzaren BIND plataformak urteko bizkortze-ekimenik onenaren aitorpena jaso du
Eusko Jaurlaritzaren berrikuntza irekiko plataformak, BINDek, bizkortze-ekimenik onenaren saria jaso du Disruptores Innovation Awards 2025 sarietan. Ane de Ariño Eusko Jaurlaritzako Ekintzailetza eta Nazioartekotzearen zuzendariak ostegun honetan, urriaren 23an, jaso du saria Madrilgo Neptuno Jauregian, digitalizazioaren sektoreko profesionalak, korporazioak eta erakundeak bildu dituen ekitaldian.
Disruptores Innovation Awards sariek espainierazko arlo zientifiko-teknologikoko eta berrikuntzaren esparruko proiektu eta eragilerik onenak aitortzen dituzte. Sariak hamar kategoriatan banatzen dira: startup edo scaleup onena; bizkortzaile edo inkubagailu onena; inbertitzaile onena; enpresa handietako digitalizazio-proiektu onena; enpresa txiki eta ertainetako digitalizazio-proiektu onena; zentro teknologikoek edo parke zientifikoek bultzatutako ekimen onena; CIO onena; ikerketa-proiektu onena; digitalizazioan laguntzeko proiektu publiko onena; eta Latinoamerikako ekimen digital onena.
Berrikuntzan, negozioan, teknologietan eta ikerketan adituak diren 15 lagunek osatutako epaimahaiak BIND izendatu du irabazle kategoria horretako bost finalisten artean —BINDez gain, Cemex Ventures, Órbita, Pascual Innoventures eta Eria zeuden—.Eusko Jaurlaritzaren eta SPRI Taldearen ekimenak mundu osoko startupak lotzen ditu Euskadiko korporazioekin, enpresa txiki eta ertainekin eta sozietate publikoekin, BIND Corporate, BIND SME eta BIND GovTech bidez berrikuntza-proiektuak garatze aldera. Gainera, BIND+ekin, plataformak prestakuntza eskaintzen du korporazio partnerrek berrikuntza irekiaren arloan dituzten barne-gaitasunak gara ditzaten. Disruptores-ek aitortu du BINDek ekonomia digital berriaren arloko ekintzailetzaren bilakaera gidatzeko egin duen lana.
Izan ere, lehen ediziotik, berrikuntza irekiko plataformak 250 startup eta 350 proiektu baino gehiago bizkortu ditu, startup berritzaileen eta korporazioen, enpresa txiki eta ertainen eta sozietate publikoen eskutik. Ane de Ariñoren hitzetan: “BINDek konpromiso irmoa du Euskadiko enpresa-ehunaren berrikuntzarekin, hazkundearekin eta lehiakortasunarekin. Sari horrek Eusko Jaurlaritzako eta SPRIko taldeek egindako lana aitortzen du. Izatez, hamarkada batez berrikuntza irekia bultzatu dute BINDen bidez, eta benetako elkarlanerako aukerak sortu dituzte startup eta enpresa finkatuen artean eta erakunde publikoen artean”.
Plataformak hazten jarraitzen du, eta Euskadiko industriaren eta ekintzailetzaren ekosistemarekin duen konpromisoa berresten du. Irailean itxi zen BIND Corporate programarako startupen 10. deialdia, eta 74 herrialdetako 883 hautagai izan ziren, inoizko kopururik handiena. Hautatutako startupek, izen handiko bezeroekin garatuko dituzten proiektuez gain, bizkortze-programan sartu ahal izango dira. Programa horrek mentoriak, inpaktu handiko tailerrak eta murgiltzeak eskaintzen ditu erreferentziazko lurralde berritzaile batean.
BIND
BIND plataforma Industria, Trantsizio Energetiko eta Jasangarritasun Sailak SPRI Taldearen bitartez sortutako berrikuntza ireki publiko-pribatuko plataforma da. BIND plataformak hiru ekimen ditu —BIND Corporate, BIND SME eta BIND GovTech—, Euskadiko enpresak, ETEak eta sozietate publikoak mundu osoko startup disruptiboekin konektatu eta berrikuntza-proiektuak garatzeko. Programa 2016. urtean hasi zenetik, 250 startup eta scaleup baino gehiago eta 350 proiektu baino gehiago bizkortu dira, eta 9,6 milioi euroko fakturazioa gainditu. Era berean, plataforma erreferente gisa posizionatu da sektorean, lurraldeko industriaren eta enpresa-sarearen digitalizazioan laguntzeagatik.
