Saitec enpresaren teknologia eoliko flotatzailea bidea egiten ari da AEBetan
Euskal enpresa hori Bizkaia International Startup Connection programarako aukeratuetako bat izan da
Saitec Offshore Saitec Taldearen spin-off bat da, 2016an sortua itsas-plataforma eolikoetarako teknologia berritzaile batetik abiatuta. Beren konponbidea, Swinging Around Twin Hull (SATH), 2012an hasi zen garatzen Taldeko I+G sailean eta diseinu guztiz berria du, zeinari esker posible baita kostuak murriztea eta parke eolikoen instalazioa erraztea itsaso zabalean.
“Ikusi genuen teknologia eoliko flotatzailea garapen bidean zegoela eta ordura arteko plataforma guztiak oil & gas sektoreko konponbideetan oinarritzen zirela, non kostuen optimizazioa txikiagoa izan baita historikoki” dio Luis González-Pintok, Saitec Offshore enpresako operazio-zuzendariak, “Saitec taldeak lan zibilen ingeniaritzan duen ezagutza aplikatzen dugu egun eskaintzen ditugun konponbideen kostua murrizteko”.
Bi dira plataformaren elementu berritzaileenak: materiala (hormigoia erabiltzen da altzairua erabili beharrean) eta diseinua (katamaran baten antzeko forma du). Gainera, egiturak ez dira hainbat punturekin finkatzen, baizik eta bakar batekin: “ainguratze-sistema berritzaile bat da, aukera ematen diona plataformari errotazio mugimendua egiteko; horrela, ainguratzearen kostua murrizten da eta instalazio- lanak errazten dira” dio enpresako operazio buruak. Konponbide hori 25 metrotik gorako sakoneretan instalatu daiteke, hau da, orain arteko konponbideek baino aukera gehiago ematen ditu eta %40 murrizten ditu kostuak.
Saitec Offshore izan da Bizkaia International Startup Connection 2018 programarako aukeratuetako bat. Horrek esan nahi du 6 hilabeteko egonaldia egin ahal izango duela Bostongo Cambridge Innovation Center-en, hots, Estatu Batuetako erreferentziazko ekintzaile-komunitate batean, eta aukera izango du orobat bertako azelerazio programan parte hartzeko. “Gure helburua da egonaldi hori aprobetxatzea Estatu Batuetan kokatzeko eta kolaborazioak bilatzea epe ertainean han errotzeko” azaldu du Luis González-Pintok.
Saitec enpresa-taldeak 30 urteko esperientzia du lan-zibilen ingeniaritzan, eta azken urteotan bidea ireki du industria eta energia arloetako ingeniaritza-azpiegituren beste merkatu batzuetan sartzeko. Konpainiak Leioan du egoitza zentrala, eta bulegoak ditu Europan, Ekialde Ertainean, Erdiko Amerikan eta Ozeanian.
