Nazioartekotzea emakumeen lidergorako aukera-gune gisa sendotzen ari da Euskadiko ETEetan
Basque Trade & Investment-ek, (BasqueTrade) SPRI taldean integratuta dagoen eta euskal enpresen nazioartekotzeaz arduratzen den agentziak, Euskadiko ETE esportatzaileetako emakumeen parte-hartzeari eta ibilbide profesionalari buruzko azterlanaren emaitzak ezagutarazi ditu. Interreg Europe programak finantzatutako WOMEX – The role of women in the competitiveness of exporting SMEs proiektuaren baitan landutako txostenak euskal enpresa-sare esportatzailearen egungo erradiografia eskaintzen du, genero-ikuspegitik.
Ikerketan, emakumeek erabaki-postuetan duten presentzia aztertu da, baita nazioarteko jarduerari lotutako postuetan sartzeko eta horietan gora egiteko eragina duten faktoreak ere. Horretarako, Euskadiko 231 ETE esportatzailetako 281 profesionalek parte-hartu dute, eta 17 elkarrizketa sakon egin dira.
Nazioartekotzea eta lidergo-ereduak
Txostenaren ondorio nagusietako batek adierazten duenez, esportazio-esparruan genero-oreka handiagoa da enpresen goi-zuzendaritza orokorrean baino. Nazioarteko inguruneetan eta merkatu-dinamika irekietan aritzeak inklusioarekiko sentsibilitatea sustatzen du, eta talde mistoen balioa indartzen du lehiakortasun-faktore gisa.
Testuinguru honetan, emakumeek zuzendaritza-postuetan aurrera egiteak lankidetzan eta konfiantzan oinarritutako lidergo-ereduak sendotzen laguntzen du. Estilo horiek erabaki-ingurune inklusiboak bultzatzen dituzte, eta horrek eragin positiboa du konpainien nazioarteko egokitzapenean eta errendimendu jasangarrian.
Erronkak eta arrakalak goi-zuzendaritzan
Aurrerapauso horiek eman diren arren, analisiak berresten du gizonen presentzia nagusi dela oraindik ere jabetza-espazioetan eta nazioarteko estrategiaren gaineko azken erantzukizunean. Zuzendaritza-postuetan dauden emakumeen ibilbideak berriagoak izan ohi dira, nazioartekotze-arloari lotuagoak eta, sarritan, zorrotzagoak, emakumeen talentuaren garapena baldintzatzen duten faktoreei aurre egin behar baitiete.
Baldintzatzaile horien artean, nabarmentzekoak dira kontziliazio-zailtasunak, kristalezko sabaiaren iraupena, eragin-sareetarako sarbide txikiagoa eta sustapen-prozesu gutxi egituratuak egotea. Guzti honi genero-alborapenen aurrean etengabe legitimatu beharra gehitu behar zaio. Aldiz, gizonen kasuan, antzemandako oztopoak sare profesionaletan eta negozio-aukeren identifikazioan pilatzen dira nagusiki.
Eraldaketarako palankak
Hala ere, euskal ekosistema esportatzaileak baditu erakunde berdinzaleagoetarantz eraldatzeko palankak, honako hauetan oinarrituta: profesionalen prestakuntza-maila altua, etengabe ikasteko bokazio sendoa, aniztasunaren balorazio gero eta handiagoa, eta erreferente zein mentore gisa jarduten duten gero eta zuzendari gehiago egotea.
Txostenak berresten du erakunde berdinzaleagoetarako trantsizioa ez dela hutsetik abiatzen. Oinarri sendo bat badago, eta, barne-politika berariazkoen bidez sendotuz gero, bereziki sustapenaren, erantzunkidetasunaren eta talentuaren garapenaren arloan, zuzendaritza-mailetan berdintasun eraginkorrerantz aurrera egitea ahalbidetuko du, modu estrukturalean, jasangarrian eta euskal enpresen nazioarteko lehiakortasunarekin lerrokatuta.
Analisi honen emaitzek nazioartekotzea laguntzeko etorkizuneko tresnak orientatzeko balioko dute, euskal enpresek lan-ingurune lehiakorragoak sendotu ditzaten erraztuz, talentuaren kudeaketaren bidez.
Laburpen exekutiboa hemen deskarga daiteke:
Txosten osoa helbide honetan ere eska dezakezu: elegarreta@basquetrade.eus.
