Metal78 enpresa, Zumarragako Arcelorreko eremua berreskuratzeko aurrerapausoaren adibide

• • • Gainera, Eusko Jaurlaritzak ia % 20ko partaidetza du enpresaren kapitalean, Jaurlaritzak Zumarragara enpresak eta ekonomia zirkularraren sektorea erakartzearen alde egindako apustuaren erakusgarri.

     

    Zumarragako Arcelor Mittalen eremua erritmo onean ari da berreskuratzen, eta bertan Bidasoa Metal 78 enpresa ezartzea —Eusko Jaurlaritzak ia %20ko partaidetza du— aurrerapen horren adibide da. Operazio konplexua da, eta, 2016an enpresa itxi ondoren, Eusko Jaurlaritzak, SPRILURen bidez, 25 milioi euroko jarduera integrala egingo du, barne hartuta lurren erosketa, ingurumena deskutsatzeko eta birsortzeko lanak, eraispenak eta pabiloi berrien eraikuntza, baita urbanizazio-lanak ere.

    Enpresa hori ezartzea Arcelorren fabrika zaharra egokitzen hasteko lehen urratsa da. Bertan, industria-jardueretarako pabiloiak kokatuko dira, eta 67.000 metro karratu hartuko dituzte. Horietatik, dagoeneko obretan dauden Bidasoa Metal 78ko instalazioek 6.090 metro karratu baino gehiagoko pabiloia izango dute. Pabiloiko lanak urte honen amaierarako amaitzea aurreikusten du enpresak, industriagune berrian, eta 2026 hasieran ekiteari jarduerari. 12 milioiko inbertsioa egiten ari da, eta horietatik 5 milioi Europako Funtsetatik datoz.

    Zumarragako industria-garapen berriko lehen enpresak metal kritiko preziatuak berreskuratzea bultzatuko du, hala nola paladioa, rodioa eta platinoa, hala Europar Batasunarekiko kanpo-mendekotasuna murrizteko eta industriaren autonomia estrategikoa indartzeko. Enpresaren jarduera ekonomia zirkularraren sektorearekin dago lotuta, eta zonalderako etorkizuneko aukera da; Eusko Jaurlaritza apustu nabarmena egiten ari da.

    Hala jakinarazi dio Josu Bilbao Eusko Jaurlaritzako Ingurumeneko sailburuordeak Alejandro Dorado Espainiako Gobernuko Ekonomia Zirkularrerako ordezkariari, José Manuel Muriel enpresako zuzendari gerentearekin batera instalazioetan egindako bisitan. Haiekin batera izan dira José Ignacio Asensio, Gipuzkoako Foru Aldundiko Jasangarritasuneko diputatua, eta Mikel Serrano, Zumarragako alkatea, besteak beste.

    Josu Bilbao sailburuordeak nabarmendu duenez, “Eusko Jaurlaritzak Zumarragan egin duen lana ingurumen-jarduketa baino askoz gehiago da; izan ere, Arcelor zaharreko lursailak deskutsatzeaz gain, industria-eremu berri bat berregokitzearen aldeko apustu handia egin du. Horretarako, industria berdearen sektoreko Metal 78 enpresaren alde egin dugu. Enpresa horren kapitalean % 18,84ko partaidetza dugu, SPRI Taldearen Arrisku Kapitalaren Kudeaketarako Sozietatearen bidez. 15 milioi euroetatik, Zumarragako eremuan 12,5 milioi eurotik gorako inbertsioa aurreikusi da, SPRILURek bere gain hartzen dituen pabiloien egokitze-kostuak kontuan hartu gabe. Urbanizazioak eta eraispenek 8,5 milioi euro inguru beharko dituzte; deskutsatzeak, berriz, 4 milioi euro inguru. Guztira, 25 milioi euro baino gehiagoko inbertsioa da. Gainera, beste ingurumen-jarduketa batzuk eta herritarrentzako onuragarriak direnak garatuko ditugu, besteak beste, industrialderako sarbide berri bat, bizitegi-eremurako sarrera urruntzen duena eta, horrekin batera, ibilgailu astunen zirkulazioak eragiten dituen eragozpenak. Urola ibaiaren ibilguaren zati bat azaleratu egingo da”.

    Ekonomia zirkularraren sektoreko enpresentzako Europako funtsak

    Hain zuzen ere, bihar, uztailak 18, Eusko Jaurlaritzak eta Estatuko Gobernuak antolatutako jardunaldi bat egingo da Bilbon. Bertan, Irantzu Allende Trantsizio Energetikoko sailburuordeak eta Alejandro Dorado Espainiako Gobernuko Ekonomia Zirkularrerako ordezkariak euskal enpresei azalduko diete zer aukera dituzten Europako Funtsek ekonomia zirkularreko ESEPEren bidez.

    Ekitaldian, orain arte egindako lorpenak, Trantsizio Ekologikorako eta Erronka Demografikorako Ministerioak Energia Dibertsifikatzeko eta Aurrezteko Institutuaren (IDAE) bidez egindako RENOCICLA deialdi berriaren gakoak, Eusko Jaurlaritzaren laguntza-programak eta eskuragarri dauden zerga-pizgarriak jorratuko dira. Gainera, bertaratutakoen zalantzak eta kontsultak argitzeko tartea ere eskainiko da, hala ezagutza trukatzea eta enpresen, administrazioen eta sektoreko eragileen arteko lankidetza sustatzeko.