Eusko Jaurlaritzaren ibilgailuak berritzeko planek matrikulazio berrien eskaera ia % 30ean bultzatzen dute, 2024arekin alderatuta
- Deskarbonizazioaren aurrean, automobilgintzaren sektorearen eskutik lan egin behar dugu, gure industriari lagundu eta herritarrei aukera desberdinak eman. Teknologikoki agnostikoak izan behar dugu eta ezin diogu auto elektriko bat inposatu bere prezioa bere gain hartu ezin duenari edo kargatu ezin duenari”, azpimarratu du Mikel Jauregi sailburuak.
Eusko Jaurlaritzak, EEE – Energiaren Euskal Erakundearen bidez, abian jarritako “Emisio Gutxiagoko Ibilgailuak” planak Euskadiko automobilgintzaren merkatua nabarmen dinamizatzea lortu du, eta iazko apirilaren aldean % 28,2ko marikulazio-hazkundea lortu du. Zifra horiek gaur aurkeztu dira Euskadiko Automozioaren VI. Jardunaldian, SEA – Arabako Enpresak elkartearen Gasteizko egoitzan, Faconauto automobilgintzako kontzesionarioen elkarteen federazioak antolatuta.
Jardunaldiaren amaieran, Mikel Jauregi Industria, Trantsizio Energetiko eta Jasangarritasun sailburuak Eusko Jaurlaritzaren helburu bikoitza nabarmendu du: errepideko garraioaren deskarbonizazioan aurrera egitea, ibilgailu berrien salmenta bultzatzea eta automobilgintzaren euskal industriari laguntza ematea, 40.000 pertsona enplegatzen baititu. “Herritarrei aukera desberdinak eskainiz egiten dugu. Bagenekien apustu aitzindaria zela, ez zuela parekorik Estatuan. Eta gaur egungo emaitzak oso positiboak dira. Otsailetik hona lortu dugu grafikoaren kurbari buelta ematea, ibilgailu berrien salmenta oso nabarmen handitzea iazkoarekin alderatuta. % 25 apirilean, % 28 maiatzean eta % 32 ekainean. Dagoeneko 1.000 eskaera badiditugu auto elektrikoetarako eta 500 karga-puntuetarako MOVES III programarekin; eta 800 eskaera baino gehiago Emisio Gutxiagoko Ibilgailuen programarako”.
“Datuek baieztatzen dute laguntza-programa horiek ibilgailuen parkea berritzen eta isurketak murrizten laguntzen dutela. Herritar ertainaren errealitatera egokitzen diren programak dira. Trafiko gehiago dago kontzesionarioetan, eragiketa gehiago ixten dira eta matrikulazioak hazten ari dira. Seinale hori da laguntzek funtzionatzen dutela eta ez direla kajoi batean geratzen ari. Jakina, hobetzeko tartea dago, baina bide onetik goaz”, azpimarratu du Jauregik.
“Deskarbonizazioaren aurrean, automobilgintzaren sektorearen eskutik lan egin behar dugu, gure industriari lagundu eta herritarrei aukera desberdinak eman. Teknologikoki agnostikoak izan behar dugu, eta ezin diogu auto elektriko bat inposatu prezioa bere gain hartu ezin duenari edo kargatu ezin duenari”, esan du sailburuak. “Gure errepideetatik autorik zaharrenak eta kutsatzaileenak ateratzea da kontua, eta erabilgarri dauden teknologietako eraginkorrenak erabiliz berritzea, erabat elektrikoak, hibridoak edo kilometroko 120 gramo CO2 baino gutxiagoko errekuntza-motor eraginkorra dutenak”.
Bestalde, Marta Blázquez Faconautoko presidenteak adierazi duenez, “Euskadiren kasuak erakusten du plan eraginkorrak diseinatzen direnean, lankidetza publiko-pribatutik abiatuta, eta azkar gauzatzen direnean, merkatuak erantzuten duela, eta, kasu honetan, elektrifikatuen merkatuak bereziki. Deskarbonizazioa bizkortzeko moduaren adibide bat da, inor atzean utzi gabe. Izan ere, erreferentzia zuzen gisa jarri dugu, beste autonomia-erkidego batzuetan martxan dauden gainerako planekin batera, parkea berritzeko plan nazional bat proposatu berri dugulako, funtzionatzen duelako eta itzulera sortzen duelako. Politika mota horiek eskalatu egin behar dira, gaur egungo deskarbonizazio-prozesuan aurrera egin nahi badugu, herritar ertainaren erritmora egokituz”.
