Eusko Jaurlaritzak bikoiztu egingo du elektrizitate berriztagarria, 80 milioi euroko ko-inbertsioarekin 2030era arte
- Eusko Jaurlaritzak autonomia energetikoan aurrera egitearen aldeko apustua egin du, elektrizitate berriztagarri propioa sortzeko gaitasuna garatzearen bitartez
- Hauek dira “Energiaren Euskal Erakundearen eredua” aplikatuta hautatutako eremuak. Eredu horrek Euskadin energia-iturri berriztagarriak “modu errealista eta arrazionalean” hedatzeko baldintzak ezartzen ditu
Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak gaur goizean aurkeztu ditu “Energiaren Euskal Erakundeak 2030era arte lehentasunez jardungo duen eremuak”. Eremu horiek identifikatu dira Euskadin energia eolikoa eta fotovoltaikoa sortzeko instalazio handien hedapen antolaturako.
Urrats horrekin, Euskadik bikoiztuko egingo luke energia berriztagarria sortzeko duen gaitasuna, bere autonomia energetikorantz aurrera egiteko. Helburua hornidura segurtasun handiagoa, industria lehiakortasuna eta gizarte ongizatea bermatzea da.
Urrats horrekin, Euskadik bikoiztu egingo luke energia berriztagarria sortzeko duen gaitasuna,
Gobernu Kontseiluaren ostean egindako prentsaurrekoan, Mikel Jauregi sailburuak ohartarazi duenez, “Euskadik aurrera egin behar du autonomia energetikorako bidean, elektrizitate berriztagarria sortzeko gaitasuna garatzearen bitartez. Errealitate geopolitiko berri honetan, autonomia energetikoa premia estrategikoa da Europarentzat eta Euskadirentzat. Euskadiren autonomia eta segurtasun energetikoa indartu nahi ditugu, gure etxeak eta industriak kanpoko shock energetikoekiko ahulagoak izan ez daitezen”.
Jauregik iragarri du Eusko Jaurlaritzak, Energiaren Euskal Erakundearen bitartez, eta lankidetza publiko-pribatuaren bidez, garapen fotovoltaiko eta eoliko handien aldeko apustua egingo duela, eta 2030era arte 80 milioi euro inbertituko direla industria-bazkideekin batera. Aurreikusten da proiektu eoliko eta fotovoltaiko horiekin 450 MW sortzea. Honela, eta 2030era arte autokontsumoan iragarrita dauden 300 MWak gehituta, bikoiztu egingo da berezko elektrizitate sorkuntzaren ratioa, % 7,9tik % 15eraino hobetuta.
Ildo horretan, Energiaren Euskal Erakundeak bere lan-ildoa bizkortuko du industria-bazkide izan daitezkeenekin, 2030era arte lehentasunez jardungo duen eremuetan identifikatutako proiektuak gara daitezen.
“Maila guztietan aurrera egin behar dugu elektrizitate eolikoa eta fotovoltaikoa sortzeko gaitasunaren garapenean —adierazi du sailburuak—.Keinu oro da baliagarria eta beharrezkoa. Autokontsumoarekin hasita, garapen eoliko eta fotovoltaiko handien aldeko apustu garbia ere egin behar dugu. Hedapen errealista eta arrazionala izango da. Tokian-tokian eragin positiboa izango duena. Autonomia energetiko handiagoa, kokapen hobea izango duten iturri berriztagarri gehiagorekin”.
Azken 5 urteetan, Euskadin autokontsumorako instalatutako potentzia 186 MW handitu da, eta 2020an 7 MW izatetik 2025ean 193 izatera igaro da. Joera horrek lagunduko du 2030. urtea baino lehen autokontsumoari dagokionez Europako mailara iristen.
Energiaren Euskal Erakundearen bitartez proiektu eoliko eta fotovoltaiko handietarako baterako inbertsioa sartzen da Eusko Jaurlaritzak onartutako industria-ezkutuko neurrien artean; hain zuzen, Autonomia Estrategikoaren ardatzaren barruan. Ardatz horrek 215 milioi euroko zuzkidura du Euskal Autonomia Erkidegoko energia-sistemaren erresilientzia indartu dadin.
Energiaren Euskal Erakundearen ereduaren hedapen antolaturako baldintzak
“Energiaren Euskal Erakundeak 2030era arte lehentasunez jardungo duen eremuak” “Energiaren Euskal Erakundearen eredua” aplikatuta hautatu dira. Eredu horrek Euskadin energia berriztagarriak “modu lasai eta arrazionalean” hedatzeko baldintzak ezartzen ditu.
Energiaren Euskal Erakundearen ereduak alderdi hauek betetzen dituzten kokapenak lehenesten ditu, ordena honetan:
- Baliabidearen existentzia: eguzkia edo haizea.
- Ingurumen- eta hirigintza-bideragarritasuna.
- Azpiestazio elektrikoa hurbil egotea (gehienez 15 kilometrotara).
- Proiektuaren bideragarritasun komertziala.
Irizpide horiek erakundeen jarduna gidatzen duten hiru mapa publikotan islatzen dira, eta azalera potentziala Euskadiko lurraldearen % 0,2ra murrizten dute. Horrela, hedapena metatzen da baliabide gehien dauden, eragin txikiena duten, saretik hurbil dauden eta ahalmen ekonomikoa duten lekuetan.
Trakzio-proiektuak eta 2030 horizontea
Energiaren Euskal Erakundearen eredua jada aplikatzen ari da hedapen berria bultzatuko duten proiektuetan. Horien artean daude Labrazako Parke Eolikoa (40 MW) eta Ekienea planta fotovoltaikoa (108 MW), Euskadiko handiena izango dena. Mugarri horiek tamaina handiko parke eoliko berririk eraiki gabe emandako bi hamarkada zuzentzen dituzte —azkena Badaia izan zen (50 MW)—, eta jarraipena ematen diete eguzki-energia fotovoltaikoko erreferentzia diren plantei, hala nola Ekian (24 MW, 2020an).
Euskadiren abiapuntua hartu behar da aintzat: Euskadin elektrizitate-produkzio berriztagarria kontsumo elektrikoaren % 7,9 izan zen 2024an, Europako batez bestekoa % 46,9 izan zenean. Ikuspegi berriak sorkuntza propioa bizkortzen du, lurraldea estandar kontinentaletara hurbildu dadin. Eta horretarako, autokontsumoko instalazioen bultzada —tamaina ertaineko eta txikiko instalazioak— eta kokapen onenetako garapen eoliko eta fotovoltaiko handiak konbinatzen ditu.
Mapak eta lehentasunak
- mapa
Lehenengo mapak Ingurumenaren eta hirigintzaren aldetik bideragarriak diren eremuak identifikatzen ditu (haizea/eguzkia duten eremuak). Energia Berriztagarrien Lurralde Plan Sektorialaren eta lurralde- eta hirigintza-plangintzaren arabera, eragin txikia eta behar besteko haizea edo eguzkia dituzten eremuak jasotzen ditu.
Esteka LPS kartografia
- mapa
Bigarren mapak azpiestazioetatik hurbil dauden eremu bideragarriak identifikatzen ditu, gehienez 15 kilometrora daudenak. 1. mapako eremuak iragazten ditu, sare elektrikorako konexioekiko hurbiltasuna kontuan izanik, eta, hala, elektrizitatearen ebakuazioa bermatzen da, azpiegitura berrien premia txikiagoarekin. Sarearekiko hurbiltasunak bideragarritasuna hobetzen du eta epeak eta eraginak murrizten ditu.
- mapa
Hirugarren mapak Energiaren Euskal Erakundeak 20ra arte lehentasunez jardungo duen eremuak jasotzen ditu. Ingurumen- eta hirigintza-bideragarritasuna, sarearekiko hurbiltasuna eta merkataritza-bideragarritasuna kontuan hartzen dituen azken hautaketa erakusten du.
Energiaren Euskal Erakundearekin batera egingo den inbertsioa bideratuko du, baita 2026-2030 aldirako proiektu helduen prestaketa ere, programazio mailakatuari jarraituta eta tokiko administrazioekin hitz eginda. Garapena metatzen du eta azalera potentziala % 0,2ra murrizten du, ezarpen ordenatu eta mugatura begira.
Info gehiago: EEE web gunea
