Euskadi mundu mailako elektrifikazioaren protagonista
- Grid4Industry Euskadi 2030 Industria Plan berriaren proiektu eraldatzailea da, eta euskal industria elektrikoaren aldeko apustua dakar, sareen modernizazioaren protagonista gisa.
- Proiektuak Euskadiko balio-katearen ahalmen industrialak eta teknologikoak integratzen ditu, lehiakortasuna irabazteko eta sektore hori mundu mailako erreferente bihurtzeko.
- Sare elektrikoak modernizatzearen aldeko apustu hori funtsezkoa da gure industria deskarbonizatzeko, eta trantsizio energetikoaren abangoardian kokatzen du Euskadi.
- Industria – Euskadi 2030 Planak Hazi sektore estrategiko gisa kokatzen ditu sare adimendunak, eskariaren hazkunde oso indartsuarekin eta intentsitate teknologiko handiarekin, eta “industria gehiago, industria hobea eta emisio gutxiago” ardatz estrategikoekin lerrokatuta.
Mikel Jauregi Eusko Jaurlaritzako Industria sailburuak ENLIT Europa nazioarteko azokaren irekiera instituzionalean parte hartu du gaur goizean. Lehenengo aldiz egingo da azoka hori Estatu osoan, eta, elektrifikazioa bultzatzeko eta trantsizio energetikoaren alorrean aukerak aztertzeko, Bilbao Exhibition Centre hautatu du helmuga gisa.
Sailburuak bere hitzaldian esan duenez, “deskarbonizazioaren eta berrindustrializazio europarraren botila-lepoa sare elektrikoak dira. Euskadik bere gaitasun industrial eta teknologikoekin lagundu ahal eta behar du Europako elektrifikazio-erronka horretan. Europako Herri gisa gure betebeharra da, eta garapen industrialerako, teknologikorako eta gure seme-alabek nahi dituzten lanpostuak sortzeko ezinbesteko aukera”.
Ondoren gaineratu egin du ere, “harro gaude Iberdrolak euskal bazkide industrial eta teknologikoekin batera sare adimendunak garatzeko hartu duen konpromisoarekin. Lankidetza horrek Euskadi Europako eta munduko elektrifikazioaren protagonista egiten du”.
Haren mintzaldian, sailburuak Grid4Industry ekimena aurkeztu du, Euskadi 2030 Industria Planaren proiektu eraldatzaile nagusietako bat, zeinak industriaren elektrifikazioa eta deskarbonizazioa sustatzen baititu, euskal sektore elektrikoaren gaitasun teknologikoak aprobetxatuz. Mikel Jauregi sailburuak gaineratu duenez, “Grid4Industry da lankidetza honen hurrengo jauzia, eta Eusko Jaurlaritzaren eta gainerako erakundeen babesa izango du”.
Helburua da euskal industriak teknologia elektriko berria garatzea eta banaketa-sareetan bertan ezartzea. Eredu errepikagarri eta esportagarria, non Euskadik erreferente izan nahi duen.
Grid4Industry proiektu eraldatzaile hau euskal industria elektrikoaren aldeko apustua da, sareen modernizazioaren protagonista gisa. Grid4Industry Europako ekonomiek aurre egin behar dieten erronka handiei erantzuteko sortu da: emisio gutxiagorekin energia gehiago hornitzea, nazioarteko testuinguru zalantzagarri baten aurrean erresilientzia ziurtatzea eta mundu osoko sare elektrikoak birdefinitzen ari den berrikuntza-olatua aprobetxatzea.
Grid4Industry-k Euskadiko balio-katearen gaitasun industrial eta teknologikoak integratzen ditu, lehiakortasuna irabazteko eta sektore hori mundu mailako erreferente bihurtzeko. Proiektu horren helburua azpiegitura elektrikoak modernizatzea eta digitalizatzea da, trantsizio energetikoaren eta deskarbonizazioaren erronkei erantzuteko gai izango den sistema bermatuz.
Grid4Industry sareen eguneratze teknologiko hutsetik harago doa; oinarrizko proiektu bat da, eta haren gainean eraikiko da elektrifikazio adimenduna Euskadin. Bere helburua etorkizuneko sare elektrikoa garatzea, probatzea eta martxan jartzea da, azpiegituren digitalizazioa, eskariaren kudeaketa aktiboa, tentsio ertainaren eta baxuaren automatizazioa, biltegiratzearen integrazioa eta zibersegurtasuna eragiketaren zutabe gisa bultzatuz. Horren bidez, sistema elektrikoaren egonkortasuna ziurtatu eta emisioak murriztu nahi dira.
Sare elektrikoak modernizatzearen aldeko apustu hori funtsezkoa da gure industria deskarbonizatzeko, eta trantsizio energetikoaren abangoardian kokatzen du Euskadi. Grid4Industryren eragina funtsezkoa izango da sektore elektrikoan eta industria osoan; izan ere, azpiegitura elektrikoa modernizatu, energia berriztagarrien integrazioa sustatu, mugikortasun elektrikoa bultzatu eta sistemaren erresilientzia bermatuko du erronka globalen aurrean.
Gainera, berrikuntzarako, ekintzailetzarako eta enplegu kualifikatua sortzeko aukerak sortuko ditu, eta Euskadi lehen mailako polo teknologiko gisa finkatuko du. Horren bidez, Euskadik urrats erabakigarria egingo du energia-eredu garbiago, seguruago eta digitalago baterantz. Ekimen horrek, behar global bati erantzuteaz gain, aukera historiko bat irekitzen du aberastasuna, enplegua eta ongizatea sortzeko, eta Euskadi berrikuntza elektrikoaren abangoardia teknologikoan kokatzen du.
Jauregi sailburuak joan den ekainean aurkeztu zuen Euskadi 2030 Industria Planaren barruan dauden 15 lehentasun estrategikoen multzoaren parte da proiektu hau. Plan horren helburua da Euskaditik Europako berrindustrializazioan laguntzea.
ENLIT, azoka eta erakusleihoa Euskadirentzat
Grid4Industry eta Electriv Valley Hub-en aurkezpena Enlit Europe 2025 ekimenaren barruan egin da, sektore elektrikoaren nazioarteko erreferentzia den ekitaldiaren barruan. Lehen aldiz egingo da Euskadin, eta 140 herrialdetako 15.000 profesional eta 700 enpresa erakusketari baino gehiago bilduko ditu Bilbao Exhibition Centren, azaroaren 18tik 20ra. Azoka eta kongresua uztartzen ditu ekitaldi horrek, eta trantsizio energetikoaren erronkei eta aukerei buruzko 100 txosten eta panel baino gehiago aurkezten edo eskaintzen ditu.
Enlit Europe azokak, Euskadin, nazioartean protagonismo handia duten sare eta osagai elektrikoen euskal industria indartsua eta Industria, Trantsizio Energetiko eta Jasangarritasun Sailaren Industria-Euskadi 2030 Plana aintzatesten ditu. Azoka BECen egiteak Euskadi munduko elektrifikazioaren protagonista gisa finkatzen lagunduko du.
