Net-Zero Basque Industrial Super Cluster arrakasta-eredu gisa aurkeztu dute trantsizio energetikoari eta deskarbonizazioari buruzko hiru ekitalditan
Net-Zero Basque Industrial Super Cluster ekimena arrakasta-kasu moduan aurkeztu da aste honetan trantsizio energetikoari eta deskarbonizazioari buruzko hiru ekitalditan; Bartzelonan, Bilbon eta Madrilen izan dira, hurrenez hurren: Net-Zero Tech azoka, Energia Ekonomiarako Espainiako Elkartearen XX. Kongresua, eta «BBVA & Hy24 Hydrogen Conference».
Agenda horrek Euskadi eraldaketa industrial jasangarrian izaten ari den paper estrategikoa islatzen du; izan ere, Europako erreferentziazko nodo gisa ari da posizionatzen, hainbat faktoreri esker, besteak beste, gaitasun teknologikoa, azpiegitura energetiko aurreratua eta alor publikoaren eta pribatuaren arteko lankidetzaren aldeko apustua. Aldi berean, instituzioen konpromisoa azpimarratu du, hauek konbinatzen dituen trantsizio energetiko industrialarekin: isurpenak murriztea, lehiakortasuna eta Euskadiko ekonomiarentzat aukera berriak sortzea. Esparru energetikoko eragile nagusiekin lankidetzan aritzeak —esaterako, Iberdrola eta Petronor, Aclima, Siderex eta AFV klusterrak, edo paperaren klusterra— aukera ematen dio Euskadiri era koordinatuan aurrera egiteko industria garbiago eta erresiliente baterantz. Era berean, prest egon beharko du etorkizuneko erronketarako ere.
Ondoz ondoko bigarren urtez, Net-Zero Basque Industrial Super Cluster ekimenak parte hartu du Bartzelonako Net Zero Tech azokan; Europako erreferentziazko foroa da, industriaren deskarbonizazioan eta trantsizio energetikoan ardaztua. Ekimen horrek jasangarritasunarekin konprometitutako 1.500 profesional, enpresa eta erakunde baino gehiago biltzen ditu, eta espazio bat eskaintzen du irtenbide berritzaileak erakusteko, baita 70 ekimen tekniko eta estrategiko baino gehiago egiteko ere, gai hauen ingurukoak: eraginkortasun energetikoa, energia berriztagarrien elektrifikazioa, hidrogeno berdea, biometanoa eta ekonomia zirkularra.
Nazioarteko hitzorduaren markoan, Net-Zero Basque Industrial Super Cluster ekimenak, Eusko Jaurlaritzak SPRIren bitartez sustatuta, parte hartu du Energiaren Klusterrarekin lankidetzan, industriaren deskarbonizazioari eskainitako berariazko saio batean. «Euskadiko industria-jardueraren deskarbonizazio-estrategia» izeneko jardunaldian, Cristina Oyónek, SPRI Taldeko zuzendari nagusi laguntzaileak, azaldu du Euskadin Net-Zero Basque Industrial Super Cluster ekimenaren bidez garatutako ikuspegi integral eta kolaboratiboa.
Hitzaldian zehar, Cristinak ekimenaren gakoak eta azken aurrerapausoak aurkeztu ditu: deskarbonizazioko irtenbideetan sakontzen duten txosten tekniko-ekonomikoak lantzea, industriako isurpenak neurtzen dituen metodologia sistematizatzea, edo NZBISC plataforma digitala sortzea. Azken tresna horrek Euskadin industriaren deskarbonizazioaren estrategia sustatu, koordinatu, jarraitu, neurtu eta zabaltzeko balio du.
Saioa, ondoren, haien enpresetan irtenbide aurreratuak aplikatzen ari diren Euskadiko enpresen arrakasta-kasuen bloke bat izan zen. Horien artean, EIPC Eibar Precision Castingek galdaketaren sektorean ETE-ek deskarbonizazio eskuragarria izateko esperientzia erakutsi zuen; TAMOINek, berriz, berreskuratze termikoko sistemak erakutsi zituen, baita bero-transformadoreen erabilera ere; SARRALLEk, altzairuaren ekoizpenera aplikatutako hidrogeno eta oxigenoko erregaien teknologian egindako lana; SBS Thermal Technologies enpresak karbonatatze azeleratuaren bitartez altzairutegietako zepetan CO₂ mineralizatzeaz hitz egin zuen; azkenik, SENERek eta Acideka taldeak sektore kimikoko trantsizio energetikoaren proiektua partekatu zuten. Amaitzeko, mahai-inguru bat egin zen, Jose Ignacio Hormaechek moderatua, Energia Klusterreko zuzendari orokorrak, eta industriaren deskarbonizazioaren erronkei eta aukerei buruz hitz egin zuten bertan, konpainia protagonisten beren ikuspegitik.
Hitzordu horren aurretik, SPRIk Energia Ekonomiarako Espainiako Elkartearen (AEEE) XX. Kongresuanparte hartu du. Zehazki, Cristina Oyón izan zen «Clean Industrial Dealen erronkak eta aukerak» mahai-inguruko ordezkarietako bat, eta bertan eztabaidatu egin zuen NZBSIC, Iberdrola eta Petronor bazkideekin, baita ingurumeneko beste eragile batzuekin ere, Europako estrategia horrek Euskadiko industriarentzat dituen inplikazioen inguruan.
Azkenik, ekainaren 6an, astelehenean, instituzioen agendak Madrilen izan zuen jarraipena, Cristinak parte hartu baitzuen «BBVA & Hy24 Hydrogen Conference» goi-bileran. Goi-bilera honek hidrogenoaren zeregina azpimarratzen du, Europaren energia-gaitasuna iturri propio eta iraunkorrekin indartzeko funtsezko irtenbide gisa. «Strengthening Europe’s Energy Sovereignty Through Spain’s Hydrogen Leadership» izenburupean, batzarrak ekosistema energetikoko eta industrialeko lehen mailako ordezkariak bildu zituen, besteak beste, Maribel Rodríguez Olmo, Hydrogen Business en Repsoleko burua, Alejandra Lwoff, Enagás Renovableko burua, eta Fertiberiako zuzendaritzako taldeko kide bat. Testuinguru horretan, Oyónek adituen panelean hartu zuen parte, eta Net-Zero Basque Industrial Super Clusterren esperientzia partekatu zuen, adibide gisa, erakusteko nola eskualdeko estrategia batek hidrogenoari lotutako balio industrialak aktiba ditzakeen, baita eragin ekonomikoa, teknologikoa eta ingurumenekoa duten trakzio-proiektuak zabaltzea erraztu ere.
