Autokontsumo energetikoa % 30 hazi da Euskadin industriak bultzatuta
• Laguntza-programa honen barruan onartutako 44 MWak Labrazako Parke Eolikoaren potentziarekin konpara daitezke.
• Autokontsumorako potentzia berriaren % 55 industriako eguzki-instalazioei dagokie.
• Guztira, Eusko Jaurlaritzaren laguntzek 100 milioi euro inguruko inbertsioa mobilizatu dute energia-autokontsumorako.
• Programa honek energia biltegiratzeko laguntzak barne hartzen ditu, eta, aldi horretan, 30 MWh-ra iritsi da, egungo edukiera bikoiztuta.
• Etxebizitzarako laguntzak inbertsio osoaren % 50era iristen dira.
• Industriaren kasuan, zuzeneko laguntzak tamainaren araberakoak dira: % 25 enpresa handiarentzat eta % 45 txikientzat. Horri % 35eko
kenkari fiskala gehitzen zaio.
Autokontsumo energetikoa % 30 hazi da Euskadin, joan den maiatzean Eusko Jaurlaritzaren Autokontsumorako Laguntza Programa abian jarri zenetik. Bultzada handi hori, zortzi hilabetetan, industrian autokontsumorako instalazio fotovoltaikoen hazkundeak eragin du, neurri handi batean, Euskadin instalatutako potentzia berriaren % 55 baitira.
Eusko Jaurlaritzaren Autokontsumorako Laguntzen Programa, Energiaren Euskal Erakundeak (EEE) kudeatzen du, eta Euskadi sorkuntza berriztagarriari dagokionez lurralde dinamikoenetako bat bezala posizionatzen du. Laguntza-programa honen barruan onartutako 44 MW potentziako mugarriak Labrazako Parke Eolikoaren potentziarekin konpara daitezke. Horrek, dirulaguntzarekin 30 MWh-ko energia-biltegiratzea bultzatzearekin batera, euskal ekoizpen-sarearen energia-lehiakortasuna bizkortzen du.
Guztira, Eusko Jaurlaritzaren laguntzek 100 milioi euro inguruko inbertsioa mobilizatu dute energia-autokontsumorako. Etxebizitzarako inbertsio osoaren % 50era iristen dira laguntzak. Industriaren kasuan, autokontsumo elektrikoko instalazioetan inbertitzeko zuzeneko laguntzak enpresen tamainaren araberakoak dira, batez beste % 25 enpresa handiarentzat eta % 45 txikientzat. Horri % 35eko kenkari fiskala gehitzen zaio. Onartutako potentziari esker, 17.000 bat etxeren kontsumoaren baliokidea den elektrizitate garbia sortu ahal izango da, eta, horri lotuta, 14.000 tona CO₂ murriztu ahal izango dira urtero. Hedapen hori Euskadi 2030 Industria Planean eta Energia Berriztagarriak Garatzeko bere proiektu eraldatzailean txertatzen da, 2028an ahalmen berriztagarri berriko 550 MWko helburu gehigarria ezartzen duena.
Mikel Jauregi Eusko Jaurlaritzako Industria, Trantsizio Energetiko eta Jasangarritasun sailburuak adierazi duenez, "euskal industriak autokontsumoaren alde egindako apustua deskarbonizazioaren eta lehiakortasunaren alde hartutako konpromisoaren adibide da. Eusko Jaurlaritzak euskal industria osoa animatzen du, eta, bereziki, ETEa, autokontsumorako laguntzak eskatzera eta laguntza horiek jasotzera. Laguntza horiei esker, inbertsioaren % 45erainoko dirulaguntza zuzenak jasotzen dituzte, eta horri % 35eko kenkari fiskala gehitzen zaio ". Industria-lidergoa eta trakzio-efektua Eskariaren trakzioa argia da. 2020aren amaieran erregistratu ziren autokontsumorako 7 MWetatik 192 MWetara igaro da 2025aren amaieran.
Zifra hori EAEn instalatutako potentzia elektriko berriztagarri osoaren (679 MW) % 28 da jada, eta % 30eko hazkundea 2024aren aldean. Gaur egun, autokontsumorako 8.000 instalaziok baino gehiagok jarduten dute Euskadin. Onartutako potentziaren % 55 industria estalkietan kokatzen da, ekoizpen- sektorearen trakzio-papera berretsiz. Enpresentzat, autokontsumoak efektu hirukoitz bat eskaintzen du: itzuli beharrik gabeko dirulaguntzak instalazio fotovoltaikoetan % 45erainoko inbertsioa egiteko, % 35eko kenkari fiskalak, eta fakturaren murrizketa auto-kontsumitutako energian karguak eta bidesariak kentzeagatik.
44MWen mugarrira iritsi ondoren, gaur egun enpresek aukera paregabea dute EEEk autokontsumorako ematen dituen laguntzetan aukera hori aprobetxatu eta eredu energetikoa aldatzeko bidean aurrera egiteko. Biltegiratzea programaren ardatz estrategikoa da, eta hazteko potentzial handiena duen eremuetako bat. Hasierako ezarpen mugatu batetik abiatuta, Euskadik hazkunde esponentziala izan du, bai etxeko instalazioetan, bai industria-instalazioetan. Diruz lagundutako 30 MWh-ko ahalmena, egungo ahalmena bikoiztuta, oinarri sendoa da energia berriztagarriak integratzeko eta modu eraginkorragoan banatutako kontsumoak kudeatzeko.
