Serbitizazioaren aldeko apustua egiten duen ekipo eta osagarri hidraulikoen fabrikatzailea da Oilgear
Oilgear multinazionalak fabrika bat du Hernanin eta ekipoak eta osagarri hidraulikoak fabrikatzen ditu 1963tik. Gipuzkoako fabrikak bost milioi eurotik gorako fakturazioa du urtean eta serbitizazioa da bere etorkizuneko erronka, besteak beste, bezeroei energia aurrezteko eta monitorizazio adimendunaren soluzio prediktiboetarako sarbidea eskaintzeko. SPRI Taldearen Konpetentzia Digital Profesionalen programaren dirulaguntza jaso du, eta, horri esker, giza baliabideen eta digitalizazioaren arloko aholkularitza espezializatua jaso du.
Hernaniko fabrikak 33 langile ditu, “ingeniaritza hidraulikoaren eta automatizazioaren arloko espezialista teknikoak, salmenta osteko zerbitzuetako teknikari adituak, esperientzia eta ezagutza handiarekin arlo horretan, zerbitzu komertzialak eta administratiboak”, azaldu du Pedro Chartonek, zuzendarietako batek.
Oilgearrek fluxuen ingeniaritzaren arloko proiektu guztietan laguntzen die bere bezeroei, erabiltzeko prest dauden soluzioak eskaintzeko: “Diseinua, ingeniaritza, simulazio dinamikoak, nazioarteko proiektuen kudeaketa, ekipo elektrohidraulikoen modernizazioa, POD ‘Power On Demand’ soluzioak; betiere, fidagarritasuna hobetzeko, produktibitatea handitzeko eta ekoizpen-ekipoetan energia aurrezteko”.
Enpresak produktu-gama zabala eskaintzen du, hala nola zilindro-ponpa hidraulikoak, betetze- huste-balbulak, bloke eta sistema hidraulikoak, kartutxoak edo balbulak. Horrez gain, soluzio hidrauliko guztientzako eta ingeniaritzako hainbat soluziorentzako salmenta osteko zerbitzuaren pakete osoak ere eskaintzen ditu, “eskakizunik zorrotzenak ere modu iraunkor eta fidagarrian ezarri ahal izateko”.
Era askotako sektoreentzat egiten du lan. Prentsa hidraulikoentzat, defentsarentzat, aeronautikarentzat, energiarentzat, siderurgiarentzat, obra zibilentzat, itsasoko sektorearentzat eta petrolioa eta gasarentzat.
Gaur egun, Oilgearrek osagarri hidraulikoak diseinatzeaz eta fabrikatzeaz gain, “sistema konplexuak, neurrira egindako soluzioak, integrazioa, automatizazioa, kontrol elektronikoa, salmenta osteko zerbitzua, mantentze-lanak, laguntza globala edo prestakuntza ere eskaintzen ditu”.
Hernaniko fabrikaren urteko fakturazioa bost milioi eurotik gorakoa da. Amerikan, Asian eta Europan dago enpresa.
I+G “bereziki garrantzitsua” da, “sektore oso zorrotzentzat” lan egiten duelako eta “soluzioen fidagarritasuna handia izan behar delako”. Gainera, bere lehiakideengandik teknologikoki bereizteko eta neurrira egindako soluzioak eskaintzeko balio die, “proiektu asko ez direlako produktu estandarrak, sistema pertsonalizatuak baizik. Hori dela eta, berrikuntza ezinbestekoa da pertsonalizazio-maila hori eskaini ahal izateko”.
SPRI Taldearen Konpetentzia Digital Profesionalen programarekin diagnostikoa egin du enpresak eta “langile guztiek hartu dute parte”. Horrez gain, “enpresaren digitalizazio-maila” hobetzeko ekintza-plana definitu du.
Etorkizuneko erronka serbitizazioa da; alde batetik, gure POD (Power On Demand) soluzioa ezartzeko, gure bezero guztiei energia-ekintza eraginkorrak egiteko soluzioak eskaintzeko, energia asko aurrez dezaten”. Eta, bestetik, monitorizazio adimendunaren soluzio prediktiboak eta mantentze-lanen modalitate desberdinak eskaintzeko.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
