Euskadiko ETEek AAren aldeko apustua bizkortu dute, Eusko Jaurlaritzak, IndesIAk eta BAICek bultzatutako prestakuntza-programaren ondoren
- Programa amaitu duten enpresek IndesIA plataformara sarbidea dute orain, zereginak automatizatzeko eta erabakiak hobetzeko, inbertsiorik eta ezagutza tekniko aurreraturik gabe
Eusko Jaurlaritzak, IndesIArekin eta Adimen Artifizialaren Euskal Zentroarekin (BAIC) elkarlanean, arrakastaz amaitu ditu Euskadiko ETEei adimen artifiziala gerturatzeko antolatutako bi tailer trinkoak. SPRIren bidez NextGenerationEU funtsen babesarekin finantzatutako ekimenak 80 euskal enpresa baino gehiagoren interesa piztu du, eta berretsi du AA jada enpresa-sarearen agenda estrategikoaren parte dela.
Hogeita hamar ETE inguruk osatu dute prestakuntza-ibilbidea Bilbon eta Arrasate-Mondragónen, eta programaren jarraipen natural gisa, beste urrats bat emango dute orain: hilabete batez IndesIA plataformara sarbidea izango dute, ETEek adimen artifiziala beren eguneroko jardueran modu praktikoan eta eskuragarrian txertatzeko bereziki diseinatutako ingurune batera.
Tailerretan zehar, parte-hartzaileek plataformaren funtzionamenduaren eta autokontsumo-produktuen erakustaldia ikusi ahal izan zuten, eta zuzenean egiaztatu zuten erabiltzeko erraztasuna eta benetako aplikagarritasuna. Oro har, plataformak jauzi kualitatiboa dakar ETEek beren datuak aprobetxatzeko, administrazio-lanak automatizatzeko eta erabakiak hobetzeko moduan, inbertsio handirik egin edo ezagutza tekniko aurreratuak izan beharrik gabe.
IndesIAren zuzendari nagusi Nuria Ávalosek, BAICeko zuzendari nagusi Laura Marrónek eta Eusko Jaurlaritzako Eraldaketa Digitaleko zuzendari Eli García Caballerok nabarmendu dute ekimenaren harrera bikaina. Halaber, azpimarratu dute euskal ETEak urrats sendoak ematen ari direla AA beren jardueran txertatzeko, eta BAICek, IndesIAk eta Eusko Jaurlaritzak —bakoitzak bere erantzukizun-esparrutik— “AAren ekosistema sendo, lankidetzazkoa eta gure balioekin lerrokatua bultzatu eta koordinatzeko lanean” dihardutela, “adopzio etiko, arduratsu eta burujabea sustatuz, euskal enpresa-sarearen lehiakortasuna indartzeko”.
Erabiltzeko prest dauden bost AA-soluzio
Tresnak bost AA-produktuko multzo bat eskaintzen die ETEei, edozein sektoretako edo tamainatako enpresen eguneroko prozesu zeharkakoei erantzuteko bereziki diseinatuak:
- Salmenten analisia. Tresna honek ETEei eguneroko jardunean sortzen dituzten merkataritza-datuak ahalik eta gehien aprobetxatzen laguntzen die. Datuak erraz kargatzeko aukera ematen du, ezagutza tekniko aurreraturik gabe, eta automatikoki sortzen ditu hizkuntza naturalean ulergarriak diren analisiak eta bistaratzeak. Horri esker, salmenta-arduradunek edo zuzendariek erosketa-ereduak identifika ditzakete, merkatu-joerak aurreikusi, gorabeherak antzeman eta erabaki informatuak hartu denbora errealean, kanpoko aholkularien edo tresna konplexuen mendekotasuna murriztuz.
- Lizitazioen kudeatzailea. Laguntzaile digital honek ETEen lehiakortasuna handitzea du helburu, kontratu publiko eta pribatuen bidez negozio-aukerak eskuratzean. Sistemak argitaratutako lizitazioak aztertzen ditu eta enpresa bakoitzaren profilari egokienak hautatzen ditu; horrez gain, beharrezko dokumentazioa prestatzen laguntzen du eta eskakizunen laburpen automatikoak sortzen ditu, bilaketa eta eskaintza-prestaketa optimizatuz.
- Barne-laguntzaileen sortzailea. Plataformak ETE bakoitzari bere laguntzaile birtual pertsonalizatua sortzeko aukera ematen dio, enpresaren ezagutza eta barne-prozeduren biltegi adimentsu gisa jarduten duena. Langileen ohiko zalantzak argitzen ditu, prozesuei, barne-araudiei edo ohiko tresnen erabilerari buruzko erantzun azkarrak eskainiz. Gainera, erabileraren bidez ikasten du, ezagutza eguneratua eta eskuragarri mantenduz.
- Dirulaguntzen kudeatzailea. Laguntzaile honek dirulaguntza garrantzitsuak identifikatzen ditu eta eskaeren prestaketa eta aurkezpena automatizatzen du. Horrela, ETEek kanpoko finantzaketa lortzeko aukerak handitu, burokraziara bideratutako denbora murriztu eta hazkundea edo berrikuntza bultza dezaketen deialdirik ez galtzea lortzen dute.
- Albaranen digitalizatzailea. Soluzio honek dokumentuen kudeaketa digitalizatzen laguntzen du. Paperezko dokumentuak edo PDF formatuko albaranak automatikoki datu egituratu bihurtzen ditu, enpresaren fakturazio- eta kontabilitate-sistemetan integratzeko modukoak. Horrela, datuak eskuz sartzea saihesten da, akatsak murrizten dira, kontabilitate-itxierak arintzen dira eta kudeaketa eraginkorragoa bermatzen da.
IndesIA plataformara emandako sarbidearekin, programak indartu egiten du parte hartu duten erakunde eta entitateen konpromisoa AArako sarbidea demokratizatzeko eta euskal enpresa-sarearen lehiakortasuna sustatzeko. Era berean, lankidetza publiko-pribatua funtsezko palanka gisa sendotzen du Euskadin berrikuntza bizkortzeko.
IndesIAri buruz
IndesIA datuen eta adimen artifizialaren erabilera industria espainiarrean sustatzeko sortutako elkartea da. Repsol, Gestamp, Navantia, Técnicas Reunidas, Telefónica, Airbus, Inditex, Acerinox eta Sacyr enpresek bultzatu zuten, eta gaur egun industria arloko enpresa handi eta ETE ugari biltzen ditu. Elkarteak BAIC, Accenture eta Microsoft ditu erakunde laguntzaile gisa, baita bestelako erakunde akademiko eta hornitzaile teknologikoak ere. Bere helburua da Espainia datuen eta AAren erabileran erreferente bihurtzea industria-eremuan eta herrialdeko ekonomiaren garapena bultzatzea.
BAICi buruz
BAIC —Basque Artificial Intelligence Center— 2021eko uztailean sortu zen, izaera desberdinetako erakundeak biltzen dituen talde sustatzaile baten ekimenez: enpresa handiak, startupak, IKT hornitzaileak, ezagutza-eragileak eta Eusko Jaurlaritza. Zentroaren misioa da AAren ezarpena azkartzea euskal industrian, eta Euskadi teknologia honen aplikazioan erreferente gisa kokatzea.
