Mikel Jauregi Industriako sailburuak Schaeffler enpresaren lantegia bisitatu du Elgoibarren, industria-digitalizazioan aitzindaria
- Sailburuak balioetsi nahi izan du Euskal Autonomia Erkidegoko industriak trantsizio digitala eta deskarbonizazioa gidatzeko egin duen apustua “eta Schaeffler adibide argia da Eusko Jaurlaritzaren Industria Planean funtsezkoak diren bi fronte horietan”.
Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburua Schaeffler enpresak Elgoibarren (Gipuzkoa) duen lantegian izan da gaur goizean. Bisitan, bertatik bertara ezagutu ditu industria-digitalizazioan erreferenteak diren instalazioak, Schaeffler Taldearen digital pilot plant-etako bat hain zuzen. Sailburuari eta Jaione Ganzarain Teknologia, Berrikuntza eta Eraldaketa Digitaleko sailburuordeari harrera egin die Valentín Guisasola Schaeffler-en Espainiako country managerrak eta lantokiko zuzendariak.
Elkarrekin bisitatu dituzte enpresaren instalazioak, eta bertatik bertara ezagutu ahal izan dituzte enpresaren proiektu nagusiak eta enpresa-estrategia, baita Elgoibarko plantan digitalizazioak duen inplementazioa ere. Izatez, produkzio-makinak erabat konektatuta daude sistema informatikora, eta ahalmena dute zer fabrikatu erabakitzeko, pieza berrirako beharrezko doikuntzak beren kabuz egiteko, eta produkzioan dauden piezen fluxuak erregulatzen dituzten gidaririk gabeko garraio-sistemak zuzentzeko, fabrikazioaren autonomia-maila handia lortuta.
Schaeffler Taldea enpresa liderra da mugimendu-teknologian, eta automozioko eta industriako hornitzaileen arloko eragile nagusietako bat da. Mundu osoan 120.000 langile eta 100 produkzio-lantegi baino gehiago ditu, eta 18.200 milioi eurotik gorako salmentak lortu ditu 2024an.
Estatuan 388 langile ditu, Elgoibarko produkzio-plantan (240) eta Bartzelonako eta Madrilgo salmenta-egoitzetan banatuta. Schaeffler Taldearen fakturazioa, Espainian, 650 milioi eurokoa izan zen 2024an.
Elgoibarko lantegiak deskarbonizazioaren aldeko apustu handia egin du, 2020. urtetik aurrera iturri berriztagarrietatik soilik datorren energia kontsumitzen baitu, 400 MW-eko autosorkuntza fotovoltaikoko instalazioari esker eta energia-efizientzia etengabe hobetzeari esker. Jasangarritasunarekiko konpromisoan, kontsumitutako altzairuaren % 75 Euskadiko hornitzaileei erosten die, zehazki emisioetan neutroa den altzairua eskaintzen diote —energia berriztagarrietan egindako inbertsioen konpentsazio-ziurtagiri bidez—.
Bisitaren barruan, Mikel Jauregi sailburuak balioetsi nahi izan du Euskal Autonomia Erkidegoko industriak trantsizio digitala eta deskarbonizazioa gidatzeko egin duen apustua “eta Schaeffler adibide argia da funtsezkoak bi fronte horietan”. Bi arlo horiek funtsezko atalak dira Eusko Jaurlaritzaren Euskadi 2030 Industria Planean, betiere industria gehiago, industria hobea eta emisio gutxiago lortzeko bidean lagunduko duen lehiakortasun-palanka gisa.
“Schaefflerren kasuan bezalaxe, Euskal Autonomia Erkidegoko industriak energia-autokontsumoaren alde egindako apustua deskarbonizazioarekin eta lehiakortasunarekin duen konpromisoaren adibide argia da. Autokontsumo energetikoa % 30 hazi da Euskadin, industriak bultzatuta. Eusko Jaurlaritzak Euskal Autonomia Erkidegoko industria osoa eta, bereziki, enpresa txiki eta ertainak animatzen ditu, autokontsumorako laguntzak eskatzera eta baliatzera. Laguntza horiei esker, inbertsioaren % 45erainoko dirulaguntza zuzenak jaso ditzakete, eta horri % 35eko kenkari fiskala gehitu behar zaio. Deskarbonizazioan inbertitzea ona da gure ekonomiarentzat, industria-lehiakortasuna indartzen duen heinean”, eman du aditzera sailburuak.
