DESI 2024 txostenak baieztatu du Euskal Autonomia Erkidegoaren digitalizazioa erritmo onean doala aurrera

• Orkestrak egindako analisiaren arabera, enpresen eraldaketa digitala da, oraindik ere, erronka nagusietako bat

Euskal Autonomia Erkidegoko Ekonomia eta Gizarte Digitalak. DESI 2024 txostenak, Orkestra-Lehiakortasunerako Euskal Institutuak (Deusto Fundazioa) eginak, baieztatu du gure lurraldearen digitalizazioa erritmo onean doala aurrera, nahiz eta oraindik tartea egon euskal enpresen eraldaketa digitalean aurrera egiteko.

Europako Batzordeak Hamarkada Digitalaren testuinguruan garatu duen metodologiari jarraituz, azterlanak Euskal Autonomia Erkidegoak, Europar Batasuneko estatu kideekin alderatuta, duen kokapenaren eta bilakaeraren analisi holistikoa eskaintzen du, lurraldearen eraldaketa digitalerako funtsezkoak diren 4 dimentsiotan bildutako 27 adierazletan.

Euskal Autonomia Erkidegoa Europako rankingeko lehen hamar posizioen artean dago txostenean aztertu diren adierazleen % 74an. Gainera, horien % 83tan bilakaera positiboa du, aurreko urtearekin alderatuta. Bereziki azpimarratzekoa da azpiegitura digitaletan duen lidergoa. Enpresen eraldaketa digitalean, ordea, erronka handiagoak ditu:

• Azpiegitura digitalak: EAE Europako rankingeko lehen postuan dago zuntz estaldurari (etxeen % 95,9) eta banda zabal mugikorraren ezarpenari (% 99,9) dagokienez. Gainera, ongi kokatuta dago 5G estalduran eta beste azpiegitura aurreratu batzuetan. Hala, agerikoa da lurraldearen lidergoa eta 2030erako Europako Hamarkada Digitaleko helburuekiko lerrokatzea.
• Zerbitzu publikoen digitalizazioa: Euskal administrazioaren digitalizazioan aurrerapausoak ikusten dira, batez ere historia mediko elektronikorako sarbidea Gobernu elektronikoko zerbitzuen erabilerari dagokionez, azken hamabi hilabeteetan Internet erabili duten 16 eta 74 urte arteko pertsonen % 83,1ek erakunde publikoen webguneak edo aplikazio mugikorrak kontsultatu ditu.
• Gaitasun digitalak: Euskal Autonomia Erkidegoak maila handia du gaitasun digital orokorretan, eta Europako batezbestekoaren gainetik dago adierazle guztietan. Hala ere, alderdi batzuetan aurrera egin behar da, bereziki Europako beste lurralde batzuk erritmo handiagoan hobetzen ari diren funtsezko arloetan, esate baterako, IKTetako lanbideetan ari diren pertsonen kopuruan edo IKTetako arloan graduatzen diren pertsonen kopuruan.
• Enpresen eraldaketa digitala: Txostenaren arabera, enpresen eraldaketa digitala, bereziki enpresa txiki eta ertainena, da oraindik ere erronka nagusietako bat. Bilakaera positiboa ikusten da oinarrizko tresnen erabileran, adibidez informazioaren trukean edo bitarteko sozialetan, baina oraindik urria da teknologia konplexuagoen erabilera, horien artean, datuen analitika, adimen artifiziala edo hodeiko konputazioa.

Euskal Autonomia Erkidegoaren digitalizazioa bultzatzeko hiru gomendio

Orkestrak egindako azterketak hiru gomendio planteatzen ditu Euskal Autonomia Erkidegoaren lidergo digitalari eusteko eta beste alderdi batzuetan aurrera egiten jarraitzeko: (1) azpiegitura digital aurreratuetan inbertitzen jarraitzea; (2) etengabeko prestakuntza indartzea eta talentu espezializatua erakartzea, IKT profilei arreta berezia eskainiz; eta (3) enpresei laguntzea teknologia sofistikatuagoak erabiltzen, adimen artifiziala, esate baterako, funtsezkoak baitira euskal industriaren produktibitateari eta nazioarteko lehiakortasunari eusteko.

Gomendio horietako batzuk Euskadi 2030 Industria Planean jasotzen dira jada. Hain zuzen ere, plan horren hiru ardatz estrategikoetan (industria gehiago, industria hobea eta isuri gutxiago) aurreikusten da azpiegitura digitaletako inbertsioa indartzea, adimen artifiziala erabiltzea bultzatzea, eta talentu berria erakartzea eta garatzea.

Txostena eskuragarri dago jada Orkestraren webgunean, nahi duenak jaisteko