Bronymecek polimeroen ingeniaritzan duen espezializazioa sendotu du, fabrikazio gehigarria eta doitasunezko mekanizazioa integratuz
Urteetan zehar, Bronymec ingurune industrial zorrotzetarako osagai teknikoen fabrikazioan aplikatutako polimeroen ingeniaritzan espezializatutako enpresa gisa sendotu da. 1995ean Elgoibarren sortuta, orain 22 pertsoneko taldea du. Hasieran brontzearen mekanizazioarekin lotuta egon arren, denborarekin errendimendu handiko polimeroetan espezializazio argia garatu du.
Gaur egun, Bronymecek materialen ezagutza aurreratua doitasun handiko mekanizazioa eta Multi Jet Fusion (MJF) teknologia bidezko fabrikazio gehigarri industriala bezalako teknologiekin uztartzen du. Konbinazio horri esker, aplikazio bakoitzerako egokitutako irtenbideak garatzen dira, ez bakarrik ekoizpenaren ikuspegitik, baita materialaren hautaketan, osagaiaren diseinuan eta prozesu egokienaren definizioan ere.
Fabrikazio gehigarriak piezak zuzenean modelo digital batetik fabrikatzea ahalbidetzen du, geruzaz geruza eraikiz eta molde edo tresneria tradizionalik behar izan gabe. Teknologia honek diseinu eraginkorragoak ahalbidetzen ditu eta, ohiko prozesuekin alderatuta, hondakinak murrizten ditu. Bronymecentzat, ez da mekanizazioa ordezkatzea, baizik eta hura osatzea, aplikazio bakoitzerako funtzionaltasuna, fidagarritasuna eta prozesu egokiena lehenesten dituen ikuspegi tekniko baten barruan.
“Testuinguru honetan, funtsezkoa da prozesu mota horien konbinazioan aurrera egitea eta kasu bakoitzean teknologia egokiena hautatzea, osagaiaren baldintza teknikoen eta bizi-zikloaren arabera denboran jasangarriak izango diren irtenbide tekniko sendoak eskaintzeko”, ondorioztatu du Amaia de Castro enpresako I+G arduradunak.
Bere ibilbidean zehar, Gipuzkoako enpresak ingeniaritza gaitasun berriak txertatu ditu, espezializazio teknikoa indartu du eta bere balio-proposamena zabaldu du, materialen hautaketa, osagaien diseinua eta aplikazio bakoitzera egokitutako ekoizpen-prozesuen definizioa uztartuz. Berrikuntza eta eraldaketa digitaleko estrategia horri esker, Bronymecek bere kudeaketa- eta ekoizpen-sistemen interoperabilitatean aurrera egin du, balio-kate osoan zehar trazabilitatea eta datu industrialaren kalitatea eta koherentzia hobetzeko. Ikuspegi horri esker, euskal enpresak erabakiak arinago hartu ditzake, informazioaren kalitatea indartu eta bere ezagutza sendotu.
Berrikuntzaren aldeko apustu hori, gainera, jasangarritasunarekiko konpromiso sendoarekin lotuta dago. Konpainiak osagai metalikoak ordezkatzeko aukera ematen duten soluzio polimerikoak garatzen ditu, pisua murriztuz eta materialaren erabilera optimizatuz. Horrek energia-eraginkortasuna hobetzen eta ingurumen-aztarna murrizten laguntzen du. Era berean, fabrikazio gehigarriak lehengaiaren erabilera eraginkorragoa sustatzen du eta, ohiko prozesuekin alderatuta, hondakinak murrizten ditu.
Espezializazio eta etengabeko hobekuntza testuinguru honetan, Bronymecek beste urrats bat eman du bere eraldaketa industrialeko estrategian, BIND SME 2025 programaren 5. edizioan parte hartuz. Programa hori SPRI Taldeak bultzatzen du, euskal ETEak startup teknologikoekin konektatzeko helburuarekin. “Programaren ikuspegi praktikoak, startup espezializatuekin benetako irtenbideak kontrastatzera bideratuta dagoenak, gure beharrak zorrotz aztertzeko, ziurgabetasuna murrizteko eta modu ordenatuan aurrera egiteko esparru egokia eskaintzen zigun, bereziki prozesuen kontrol aurreratuarekin eta digitalizazio industrialarekin lotutako arloetan”, azaldu du de Castrok.
Proiektu zehatz honetatik haratago, Bronymecek balorazio positiboa egiten du SPRI Taldeak bere ibilbidean zehar eskainitako laguntzaz ere. Izan ere, euskal enpresak aurretik ere parte hartu izan du Hazitek bezalako programetan, Tekniker zentro teknologikoarekin lankidetzan, I+G+b-ren aldeko apustua eta bere prozesuen etengabeko hobekuntza indartzeko.
SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
