WOMEXen Eskualde Taldea martxan da Euskadin, nazioartekotzean genero-berdintasuna sustatzeko
Topaketa modu birtualean egin zen, eta Basque Trade & Investment (BasqueTrade) SPRI taldearen parte den euskal enpresa nazioartekotzeko agentziak antolatu zuen.
Jardunaldian parte hartu zuten erakundeek erronkak, esperientziak eta ekimenak partekatu zituzten, emakumeen talentua euskal enpresa sarera erakartzen laguntzeko eta lidergo orekatua sustatzeko.
Lehen saio horien helburua Euskadin dauden ekimenak bateratzea, haien arteko lotura puntuak identifikatzea eta ETEen nazioartekotzean genero berdintasuna indartuko duten ekintza bateratu berriak garatzeko aukera aztertzea da.
Eskualde Taldearen lanaren jarraipena etorkizuneko bileretan ziurtatuko da, eta hurrengoa 2026ko hasierarako programatuta dago.
WOMEX proiektua Interreg Europe programa europarrak kofinantzatzen du, lau urteko iraupena du (2025-2029) eta aurrekontua, guztira, 1.738.950 eurokoa da. BasqueTrade-k Euskadi ordezkatzeaz gain, Katalunia, Austria, Hungaria, Polonia, Serbia eta Lituaniatik etorritako zortzi bazkidek parte hartzen dute.
Eskualdeen arteko lankidetzaren bidez, WOMEXek genero berdintasuna integratu nahi du Europako ETEen nazioarteko lehiakortasuna bultzatzen duten politika publikoetan eta zerbitzuetan. Horretarako, eskualdeen arteko trukeetan eta analisi konparatuetan oinarritutako praktika egokien katalogo bat egitea aurreikusten da, oztopoak identifikatzeko, irtenbideak partekatzeko eta hazkunde inklusibo eta jasangarria sustatzeko.
