Indartuz Funts Estrategikoa 65 milioi eurorekin jarri da abian, euskadiko ekonomia eraldatzen lagunduko duten inbertsioak finantzatzeko
Gobernu Kontseiluak onartu du «Indartuz kapitala SA» sozietate anonimo publikoa sortzeko Finantzen Euskal Institutuari baimena ematen dion dekretua. Funts estrategiko hori Euskal Finantza Aliantzaren “Euskadi Eraldatuz 2030” Inbertsio Eraldatuen Planean jasotzen da. Indartuzek bideratuko ditu, Finkatuzekin batera, Eusko Jaurlaritzak Euskal Finantza Aliantzaren esparruan hitz emandako 1.000 milioi euroko baliabideetako gehienak.
Indartuz funtsa Eusko Jaurlaritzaren finantza-politikan jarduteko bestelako modua da, kudeaketa pribatuko bitartekoen bidez egingo den zeharkako inbertsiorako funtsen funtsa, proiektuetan edo enpresetan zuzeneko inbertsioak egiteko aukera mugatuko ez duena.
Funts estrategiko horren helburua “Euskadi Eraldatuz 2030” inbertsio-planaren berezko helburuetan sartzen da: baliabide propioak eta kanpokoak mobilizatzea euskal enpresa-ehunaren errotzea, hazkundea eta lehiakortasuna bultzatzera zuzenduko diren inbertsio eraldatzaileetarantz. Zehazki, funtsak garatu beharreko zor malguari, enpresa-eskalagarritasunari, etorkizuneko azpiegiturei eta trantsizio sozialari buruzko programak identifikatzen dira inbertsio-planean.
Sozietate berriak ez du bere plantillan giza baliabiderik izango, kudeaketa-lan guztiak Finantzen Euskal Institutuko langileek egitea aurreikusten baita.
Funtsak Eusko Jaurlaritzaren baliabide propioen 65 milioi euro izango ditu 2025. urterako. 2026ko Aurrekontu Proiektuaren berrikuntzetako bat da “Euskadi Eraldatuz 2030” proiekturako 935 milioi euroko zorpetze gehigarria sartzea; izatez, proiektu hori da Eusko Jaurlaritzak Euskal Finantza Aliantzan duen konpromisoaren bide-orria. Zenbateko horri gehitu behar zaio Indartuzentzat baliabide propioekin hasiera batean egindako 65 milioiko ekarpena, eta, horrela, lortuko da lehendakariak martxoaren 3an iragarritako 1.000 milioi euroko zenbateko biribila.
“Euskadi Eraldatuz 2030” inbertsio-plana lau tresna publikoren bidez garatuko da: Indartuz sozietatea, gaur sortua; Finantzen Euskal Institutua bera, ohiko jarduera garatuko duena proiektu eraldatzaileetarako finantzaketa- eta berme-lerro berriekin; Finkatuz, kapital-partaidetzaren bidez trakzio-enpresak errotzeko funtsa; eta Euskal Autonomia Erkidegoko Arrisku Kapitala, eratu beharreko titulartasun publikoko arrisku-kapitaleko bi funts berri kudeatuko dituena —bi funts horiek industria/startup berrira eta garapen bidean dauden sektoreetara bideratuko dira—
