Euskal industria aeronautikoak Europako berrindustrializazioan duen paper estrategikoa azpimarratu du Jauregik
Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregik ITP Aeroren XXII. Konbentzio Teknologikoa inauguratu du gaur. Urriaren 23an eta 24an egingo da Bilboko Guggenheim Museoan, eta funtsezko foroa da berrikuntza eta konpainiaren estrategia bultzatzen dituen ezagutza teknologikoa trukatzeko eta zabaltzeko.
“Technology for Growth” lelopean, konbentzioaren ardatza teknologia da, berrikuntzaren, lehiakortasunaren eta jasangarritasunaren motor gisa, ITP Aero hedatzen ari den une honetan. Hala, Euskadik duen lidergo industriala eta teknologikoa indartuko du, baita sektore aeroespaziala maila globalean hazteko eta eraldatzeko konpromisoa ere.
Bere hitzaldian, Jauregik azpimarratu du “ITP Aerok gure herriko industriaren onena zintzoki irudikatzen duela. Bi minutuz behin, hemen, Euskadin, garatutako teknologiak bultzatutako hegazkin bat aireratzen da munduan”.
Konpainiak berrikuntzaren alde egin duen apustu iraunkorra nabarmendu du sailburuak. 600 milioi euro baino gehiago inbertitu ditu I+G arloan azken hamarkadan, eta aitzindaria izan da abiazio jasangarrian eta aireko garraioaren deskarbonizazioan, propultsio hibrido-elektrikoko eta hidrogenozko teknologiak bultzatuta.
Eusko Jaurlaritzak sustatzen duen lankidetza publiko-pribatuaren ereduaren barruan kokatu du apustu hori Jauregik, eta “etorkizuneko euskal industria sortzea du helburu, sustraitzetik, berrikuntzatik eta industria-sarearen balio-kate osoranzko trakziotik”. Ildo horretan, gogorarazi du Eusko Jaurlaritzak ITP Aeroren kapitalean duen parte-hartzea—akzioen % 6a—, errotzearekin eta garapen teknologikoarekin duen konpromisoaren erakusle.
Era berean, sektore aeronautikoak eta aeroespazialak Euskadi 2030 Industria Planean duten zeregina nabarmendu du, etorkizuneko sektore estrategikoetako bat baita. Plan horrek 15.900 milioi euro mobilizatuko ditu inbertsio publiko-pribatuan legealdian, “industria gehiago, industria hobea eta emisio gutxiago” sustatzen dituzten proiektuekin.
Horien artean, ITP Aerorekin lotura zuzena duten bi ekimen aipatu ditu Jauregik: Euskadin motorren arkitektura jasangarri berriak garatzea eta Bikaintasun Polo bat sortzea hidrogeno berdearen eta erregai berriztagarrien garapen teknologikorako.
Amaitzeko, sailburuak nabarmendu duenez, “ziurgabetasun-garai hauetan, Euskadik Europaren berrindustrializazioaren protagonista izateko oinarriak ditu. ITP Aero izango da industria berpizte horren liderretako bat”.
Konbentzioan, ITP Aeroko 200 ingeniari baino gehiago eta sektore teknologiko eta industrialeko profesionalak bildu dira, lehen mailako nazioarteko hizlariekin batera, hala nola Val Miftakhov ZeroAviaren sortzaile eta CEOa, eta Frank Haselbach Airbuseko SVP Propulsion Engineering.
